ინფორმაციის თავისუფლების განვითარების ინსტიტუტის (IDFI) კვლევის მიხედვით, საჯარო დაწესებულებების ხელმძღვანელის მრჩევლის პოზიციას მცირე სამუშაო გამოცდილების მქონე ან ნაკლებად კომპეტენტური პირები იკავებდნენ.
IDFI- მ კვლევის მიხედვით, რომელიც საჯარო დაწესებულებებში მრჩეველთა ინსტიტუტის შესახებ ჩატარდა, ირკვევა, რომ რთულია იმ კრიტერიუმების განსაზღვა, რომლებითაც შეირჩევიან მრეჩევლები და ხშირად გამოკვეთილია ნეპოტიზმის ნიშნებიც.
როგორც ინფორმაციის თავისუფლების განვითარების ინსტიტუტის გამგეობის თავმჯდომარემ, ლევან ავალიშვილმა განაცხადა, გარემოსა და ბუნებრივი რესურსების დაცვის სამინისტროდან IDFI-ისთვის მოწოდებული ინფორმაციის თანახმად, მინისტრმა ელგუჯა ხოკრიშვილმა მრჩევლებად 2014 წლის ივლისსა და სექტემბერში სამი პირი დანიშნა.
"სამივე მათგანი მანამდე მუშაობდა რეგიონული განვითარებისა და ინფრასტრუქტურის სამინისტროში ასევე მინისტრის მრჩევლის თანამდებობაზე, სწორედ იმ პერიოდში, როცა აღნიშნულ უწყებას თავად ელგუჯა ხოკრიშვილი ხელმღვანელობდა. ამასთან, აღნიშნული მრჩევლებიდან ერთ-ერთი, 2013 წელს ეკონომიკისა და ბიზნესის საბაკალავრო პროგრამის დამთავრების შემდეგ, დასაქმებული იყო საქართველოს მუნიციპალური განვითარების ფონდში, სადაც ელგუჯა ხოკრიშვილი აღმასრულებელი დირექტორის პოზიციას იკავებდა. მინისტრ ხოკრიშვილის ერთ-ერთი მრჩეველი დაბადებულია 1990 წელს, მეორე მრჩეველი კი -1991 წელს. შესაბამისად, მათ 24 და 23 წლის ასაკში უკვე ორ უწყებაში მოასწრეს მინისტრის მრჩევლობა", _ აცხადებს ავალიშვილი.
მისივე ინფორმაციით, რეგიონული განვითარებისა და ინფრასტრუქტურის მინისტრის მრჩევლის თანამდებობას იკავებდა გედევან ფოფხაძის ძმა, ისტორიკოსი ბესიკ ფოფხაძე.
"შსს-ს სასაზღვრო პოლიციიდან მოწოდებული ინფორმაციით თანახმად, 2014 წლის 11 დეკემბრის მდგომარეობით აღნიშნული უწყების ხელმძღვანელის, ზურაბ გამეზარდაშვილის მრჩეველი საერთაშორისო საკითხებში ებრაული ენისა და ლიტერატურის სპეციალისტი, აკადემიკოს ელიზბარ ჯაველიძის შვილი დიმიტრი ჯაველიძეა", _ აცხადებს ლევან ავალიშვილი.
