პროექტ „განავითარე ბიზნესის“ ფარგლებში, სახელმწიფო ინსტიტუციებისა და მცირე მეწარმეეების მონაწილეობით მრგვალი მაგიდა გაიმართა
ახალგაზრდა ფინანსისტთა და ბიზნესმენთა ასოციაცია – „აფბამ“, პროექტ „განავითარე ბიზნესის“ ფარგლებში, მცირე მეწარმეებთან და სახელმწიფო ინსტიტუციების წარმომადგენლებთან შეხვედრა გამართა.
შეხვედრა მრგვალი მაგიდის ფორმატში მიმდინარეობდა, სადაც ეკონომიკის სამინისტროს მეწარმეობის განვითარების სააგენტოს და სოფლის მეურნეობის სამინისტროს პროექტების მართვის სააგენტოს წარმომადგენლებმა მიმდინარე პროექტების პრეზენტაციები გამართეს, რის შემდეგაც საკუთარი მოსაზრებები მეწარმეებმა გამოთქვეს.
მეწარმეობის სააგენტოს ბიზნესის განვითარების მრჩეველმა ირინა მეზურნიშვილმა, პოექტ „აწარმოე საქართველოშის“ პრეზენტაცია გამართა და პროექტის პრიორიტეტებსა და უკვე არსებულ შედეგებზე ისაუბრა.
მისი გამოსვლა, ძირითადად, ინდუსტრიულ მიმართულებებს შეეხო.
"საქართველოს მთავრობის ინიციატივით ხორციელდება სახელმწიფო პროგრამა „აწარმოე საქართველოში,“ რომლის მიზანია ქვეყანაში მეწარმეობის განვითარება და მხარდაჭერა, ახალი საწარმოების შექმნის ხელშეწყობა და საექსპორტო პოტენციალის გაზრდა. პროგრამის კოორდინაციას ახორციელებს საქართველოს ეკონომიკისა და მდგრადი განვითარების სამინისტრო და მასში ჩართულია სამინისტროს სისტემაში შემავალი შემდეგი სსიპ-ები: „მეწარმეობის განვითარების სააგენტო“, „სახელმწიფო ქონების ეროვნული სააგენტო“ და „საქართველოს ინოვაციებისა და ტექნოლოგიების სააგენტო“. პროექტი უზრუნველყოფს შემდეგი სახის მხარდაჭერას, ფინანსებზე ხელმისაწვდომობა, უძრავ ქონებაზე ხელმისაწვდომობა და ტექნიკური დახმარება. პირველ შემთხვევაში ჩვენ ვაფინანსებთ შერჩეული პროექტების განხორციელებისთვის მიღებული საბანკო კრედიტების საპროცენტო განაკვეთებს, მეორე შემთხვევაში ჩვენ მეწარმეებს ვახალისებთ ბიზნესისთვის აუცილებელი უძრავი ქონების სიმბოლურ ფასად გადაცემით, ხოლო მესამე შემთხვევაში ვუზრუნველწოფთ მეწარმეთა გადამზადებით“, – განაცხადა ირინა მეზურნიშვილმა.
რაც შეეხება მეწარმეობის განვითარების სააგენტოს მცირე გრანტების პროგრამას, მისი მიმდინარეობის შესახებ სააგენტოს საერთაშორისო ურთიერთობების მიმართულების ხელმძღვანელმა ნინო სხირტლაძემ ისაუბრა.
"მოგეხსენებათ სახელმწიფომ გამოყო 20 მილიონი ლარი, რომელიც მიმართულია რეგიონებში სერვისზე ორიენტირებული ბიზნესების წახალისებისთვის. პროექტის ფარგლებში, გათვალისწინებულია ბიზნესიდეების დაფინანსება 5000 ლარით, რისთვისაც აუცილებელი პირობაა 1000 ლარიანი თანამონაწილეობა. ხაზგასმით უნდა აღინიშნოს, რომ აუცილებელია ნაღდი ფულით თანამონაწილეობა. გარდა ფინანსური დახმარებისა, პროექტი ითვალისწინებს მეწარმეთა გადამზადებას. მნიშვნელოვანია, რომ ბიზნესგეგმის მომზადებასა და მარკეტინგის საკითხებში გადამზადებას ისეთი მეწარმეებიც გაივლიან, რომლემბმაც შეიძლება გრანტი ვერ მიიღონ, ეს მნშვნელოვნად გაზრდის მათ შანსებს სხვა ანალოგიურ პროექტებში, რომლებსაც სახელმწიფო მომავალში გამოაცხადებს. პროექტი უკვე დაწყებულია იმერეთში, რაჭა–ლეჩხუმში და ქვემო სვანეთში, სამცხე–ჯავახეთში და ქვემო ქართლში, რაც შეეხება სხვა რეგიონებს, აქ მიმდინარეობს პროექტის შემსრულებელი ორგანიზაციების გამოვლენა და ვფიქრობ, მაისიდან მთელი საქართველოს მასშტაბით იქნება პროექტში ჩართვა შესაძლებელი“, – განაცხადა ნინო სხირტლაძემ.
სოფლის მეორნეობის სამინისტროს პროექტების შესახებ აგრო–კრედიტის პროექტების მენეჯერმა ირაკლი მოისწრაფიშვილმა ისაუბრა, რომელმაც შეხვედრაზე დამსწრე მეწარმეებს აუხსნა სოფლის მეურნეობის სამინისტროს, – „უპროცენტო სასაქონლო განვადება მცირე ფერმერებისთვის“, „შეღავათიანი აგროკრედიტი საბრუნავი საშუალებებისთვის“, „შეღავათიანი აგროკრედიტი ძირითადი საშუალებებისთვის“, „შეღავათიანი აგროლიზინგი“, „შეღავათიანი აგროკრედიტი გრანტით დაფინანსებული საწარმოებისთვის“, „სახელმწიფო პროგრამა „აწარმოე საქართველოში“, „აგრო დაზღვევა“ და „დანერგე მომავალი“ პროექტებში, მონაწილეობის შესაძლებლობა.
მისი განცხადებით, აგროპროექტების დაწყების შემდეგ საბანკო სექტორმა ამ მიმართულებით 800 მილიონ ლარზე მეტი სესხი გასცა.
შეხვედრაზე დამსწრე მეწარმეების მხრიდან გამოიკვეთა სახასიათო პრობლემა, ვინაიდან სახელმწიფო ფინანსურ რესურსებზე ხელმისაწვდომობას საბანკო კრედიტების წახალისებით ზრდის, მეწარმეთა ნაწილი ბანკის სტანდარტებს ვერ აკმაყოფილებს, რაც მის ჩართულობას სახელმწიფო პროგრამებში, მნიშვნელოვნად ართულებს. კიდევ უფრო რთულ მდგომარეობაში არიან ისეთი მეწარმეები, რომლებსაც ნეგატიური საკრედიტო ისტორია აქვთ, ასეთებს სახელმწიფო პროგრამებით სარგებლობა საერთოდ არ შეუძლიათ.
აღნიშნუილი პრობლემის გადაწყვეტის შესახებ ინიციატივა გამოთქვა შეხვედრაზე დამსწრე საბანკო ექსპერტმა ლია ელიავამ.
„ვფიქრობ, მთავრობამ უფრო მჭიდროდ უნდა ითანამშრომლოს ეროვნულ ბანკთან, ამ ინსტიტუაციას საშუალება აქვს, ბანკები მისცეს რეკომენდაცია, რომ გადახედონ სახელმწიფო პროექტებში მონაწილე მეწარმეებზე კრედიტების გაცემისას არსებულ სტანდარტებს“, – განაცხადა ლია ელიავამ.
