გაზეთ “გურია ნიუსის” #98 (2011 წ. 12.12) გამოქვეყნებული წერილი, “მქუხარე ტაში, ამჯერად ოზურგეთის საკრებულოში”, მცდარ ინფორმაციებზეა აგებული და შესაბამისად, დასკვნებიც არასწორადაა გამოტანილი.
“ბიუჯეტი დამტკიცებულად არ ითვლება, რადგან საკრებულოს სხდომას არ ესწრებოდა საკრებულოს სიითი შემადგენლობის ნახევარზე მეტი”, _ ვკითხულობთ სტატიაში, რაც სინამდვილეს არ შეესაბამება და ამ გათვლას არა მხოლოდ მკითხველი, არამედ რესპონდენტი ექსპერტებიც შეცდომაში შეჰყავს არასწორად ინტერპრეტირებული ფაქტებისა გამო. შეგახსენებთ, ბიუჯეტის მიღება-დამტკიცების წესით განსაზღვრულ პროცედურებს, რომლის ცოდნაც მსგავსი წერილის მომზადებისთვის აუცილებლობას წარმოადგენს. სამწუხაროა, რომ კვალიფიციური განმარტებებისაგან კონკრეტული სტატია ძალზედ შორსაა.
9 დეკემბერს, საკრებულოს მორიგ სხდომას ესწრებოდა 23 დეპუტატი, მუნიციპალიტეტის მთავარ საფინანსო დოკუმენტს მხარი დაუჭირა 19 დეპუტატმა, კენჭისყრაში მონაწილეობა არ მიუღია საკრებულოს 4 წევრს. “ადგილობრივი თვითმართველობის შესახებ” საქართველოს ორგანული კანონის 26 მუხლის 2 პუნქტის თანახმად, საკრებულოს გადაწყვეტილებები (დადგენილებები, განკარგულებები) მიიღება დამსწრეთა ხმების უმრავლესობით, მაგრამ არანაკლებ სიითი შემადგენლობის ერთი მესამედისა. “საქართველოს საბიუჯეტო კოდექსის 78 მუხლის მეორე ნაწილის შესაბამისად, გადაწყვეტილება ბიუჯეტის პროექტის დამტკიცების შესახებ მიიღება წარმომადგენლობითი ორგანოს სიითი შემადგენლობის უმრავლესობით.
ოზურგეთის მუნიციპალიტეტის 2012 წლის ბიუჯეტის პროექტს ხმა მისცა 37 დეპუტატიდან 19 დეპუტატმა, ანუ სიითი შემადგენლობის უმრავლესობამ. აქედან გამომდინარე, გაუგებარია, რატომ დადგა ეჭვქვეშ ბიუჯეტის ლეგიტიმურობა.
თუკი ოპონენტებს საკანონმდებლო შეუსაბამობა, ანუ დამატებითი არგუმენტი მოაქვთ თავიანთი პოზიციის გასამყარებლად, ესეც საკითხისადმი არასწორი მიდგომაა, რადგან იმ შემთხვევაშიც კი, როცა არსებობს ნორმატიულ აქტებს შორის წინააღმდეგობა, სრულიად სამართლებრივია ვიხელმძღვანელოთ “ნორმატიული აქტების შესახებ” საქართველოს კანონით, სწორედ ამ კანონით დგინდება ნორმატიული აქტების იერარქია და ურთიერთმიმართება. ამ დროს უპირატესი იურიდიული ძალა გააჩნია უფრო მაღალ საფეხურზე მდგომ ნორმატიულ აქტს. ამ შემთხვევაში, ადგილობრივი თვითმართველობის შესახებ საქართველოს ორგანულ კანონს.
ვაცხადებთ მთელი პასუხისმგებლობით, ოზურგეთის მუნიციპალიტეტის 2012 წლის ბიუჯეტს პროექტი არა მხოლოდ ორგანული კანონის, არამედ კანონმდებლობის სრული დაცვითა და მისი მოთხოვნების გათვალისწინებით იქნა დამტკიცებული. არსებობს შესაბამისი ოქმი, სადაც ასახულია სხდომის მიმდინარეობა და მონაწილეთა სახელობითი სია. ოქმები საკრებულოს მიერ მიღებულ სხვა აქტებთან ერთად საჯარო ინფორმაციას განეკუთვნება, ამდენად, დაინტერესებულ პირთათვის მისი გაცნობა არავითარ პრობლემას არ წარმოადგენს.
სამწუხაროა, რომ მსგავსი, რბილად რომ ვთქვათ, “უზუსტობები” ხშირად გამოიყენება სხვადასხვა პოლიტიკური ძალის ხმამაღალი განცხადებებისა და სარეიტინგო მაჩვენებლების ხელოვნურად ამაღლების საშუალებად. ჩვენ მსგავს ქმედებებსა და პროვოკაციულ მცდელობებს ვემიჯნებით და საზოგადოებას საქმიანი ოპონირებისკენ მოვუწოდებთ!
ოზურგეთის მუნიციპალიტეტის საკრებულო
