შიდა საწარმოო ურთიერთობების მოწესრიგების, კოოპერატივების გაძლიერებისა და მდგრადობის ხელშეწყობისთვის "სასოფლო-სამეურნეო კოოპერატივის შესახებ" საქართველოს კანონში ცვლილებები შედის.
როგორც კანონპროექტის ავტორები განმარტავენ, ცვლილებების მიზანი კოოპერატივის შიდა საწარმოო ურთიერთობების მოწესრიგებით, სასოფლო-სამეურნეო კოოპერატივის გამართული მოდელის შექმნაა, რომელიც მიმართული იქნება წევრთა შრომითი რესურსების კაპიტალიზაციის გააქტიურებაზე.
როგორც "გურია ნიუსთან" საუბრისას სოფლის მეურნეობის სამინისტროს სასოფლო-სამეურნეო კოოპერატივების განვითარების სააგენტოს ხელმძღვანელი გიორგი მიშელაძე განმარტავს, კანონში განხორციელებული ცვლილებებით კოოპერატივებს წევრთა რაოდენობის ზრდასთან ერთად, მეტი შემოსავლის მიღების უფლება ექნებათ.
"დღეისათვის კოოპერატივის შექმნა მაღალმჭიან რაიონში 3 ადამიანს, დანარჩენ საქართველოში კი 5 პირს შეუძლია. ცვლილებების თანადხმად კი, გაიზრდება მინიმალურ წევრთა რაოდენობა მაღალმთიან რეგიონებში ფიზიკური პირებისთვის, მიმუმუმ 5, დანარჩენ საქართველოში კი 11 წევრი. თუ კოოპერატივი კოოპერატივების მიერ შეიქმნება, ანუ კოოპერატივთა კოოპერატივი, იქ შესაძლებელია მინიმუმ სამი კოოპერატივი გაერთიანდეს მაღალმთიან რეგიონში, დანარჩენ საქართველოში კი, მინიმუმ 5.
ეს შეეხება როგორც ახალ კოოპერატივებს, ასევე, ძველებსაც. ამავე დროს, უკვე რეგისტრირებულ კოოპერატივებს, რომლებიც ვერ ჩაეტევიან ამ კვოტაში ვადა განესაზღვრებათ წევრების დასამატებლად“, _ ამბობს მიშელაძე.
დღეს მოქმედი კანონმდებლობით, სასოფლო სამეურნეო კოოპერატივებს, აქვთ უფლება არაწევრებისგან შეისყოდონ მიწები თავიანთი ბრუნვის 90%-ის ფარგლებში, რაც მიშელაძის განმარტებით, კოოპერაციული საქმიანობა არ არის.
"ამიტომ დავაწესეთ კოოპერატივებისათვის არაწევრი პირებისაგან შესაძენი პროდუქციის ან მათთვის გასაწევი მომსახურების ზედა ზღვარი, რასაც წარმოდგენილი პროექტით, მთლიანი ბრუნვის, არაუმეტეს 30%-ისა უნდა იყოს. ამით სამ-ხუთკაციან კოოპერატივს ბიძგი მიეცემა, რაც შეიძლება მეტი წევრი მოიზიდონ, რომ უფრო მეტმა გლეხმა მიიღოს სიკეთე“, _ ამბობს მიშელაძე.
ამასთან, მოქმედი კანონმდებლობით, კოოპერატივის დარეგისტრირების შემდეგ, ნებისმიერ დროს, მას წევრების შევსების უფლება აქვს, თუმცა ცვლილებით, რომელიც კანონში უახლოეს მომავალში უნდა შევიდეს გათვალისწინებულია, რომ კოოპერატივმა მეპაიეთა რეესტრის აღრიცხვა აწარმოოს.
"კანონის ძალაში შესვლიდან ერთი თვის ვადაში საქართველოს სოფლის მეურნეობის მინისტრი დაამტკიცებს წესს კოოპერატივების მეპაიეთა რეესტრის აღრიცხვის შესახებ, რომელშიც განსაზღვრული იქნება ყველასთვის თანაბრად თუ რა პირობებს უნდა აკმაყოფილებდეს ის, რომ არ შეილახოს მისი ახალი წევრების ინტერესები. დღეს არ არის განსაზღვრული, რა სახით უნდა იყოს ამის წარმოება, რა მონაცემებს უნდა აკმაყოფილებდეს, რა მონაცემები უნდა შევიდეს მასში და ა.შ.“, _ ამბობს გიორგი მიშელაძე.
ამავე თემაზე:
კოოპერატივების ეფექტური მუშაობისთვის კანონში ცვლილებები იგეგმება
ქართულ კოოპერატივში უცხო ქვეყნის ინვესტორები შემოვლენ
კოოპერატივში დამატებითი საპაიო შენატანი დამატებით მოგების საშუალებას იძლევა
