საქართველოს პრემიერ-მინისტრი, ირაკლი ღარიბაშვილი, თავდაცვის ყოფილი მინისტრის ირაკლი ალასანიას დღევანდელ განცხადებებს გამოეხმაურა. როგორც ირაკლი ღარიბაშვილმა განაცხადა, მისთვის არ არის საინტერესო ასეთ უპასუხისმგებლო განცხადებებზე კომენტარის გაკეთება.
"ეს არის ტყუილი და ძალიან ვწუხვარ, რომ სახელმწიფოებრივი საკითხებით ხდება სპეკულირება, ამაზე სერიოზულ კომენტარს ვერ გავაკეთებ", – განაცხადა ღარიბაშვილმა.
მისი თქმით, ხელისუფლება ნერგავს საერთაშორისო სტანდარტებს, ის რაც არის მსოფლიოში, განვითარებულ და დემოკრატიულ სახელმწიფოებში.
"სულ რამდენიმე დღის წინ, ამერიკის სენატის საერთაშორისო ურთიერთობების კომიტეტის თავმჯდომარეს წაუყენეს ბრალი კორუფციური ბრალდების მუხლით. მენენდესი პასუხისგებაში იქნა მიცემული. შესაბამისად, ჩვენს მთავრობას აქვს გაცხადებული, რომ ჩვენ არავის არ დავაყენებთ კანონზე მაღლა. არც ერთი ადამიანი არ უნდა იყოს პრივილეგირებული, იქნება ეს პრეზიდენტი, პარლამენტის თავმჯდომარე, მინისტრი თუ სამინისტროს თანამშრომელი. ერთხელ და სამუდამოდ ყველამ კარგად უნდა გაიგოს, რომ არავინ არ დგას და ვერავინ დადგება კანონზე მაღლა. ეს არის ჩვენი მთავარი პრინციპი და ჩვენი მთავარი მიდგომა", – განაცხადა ღარიბაშვილმა.
შეგახსენებთ, ირაკლი ალასანიამ დღეს განაცხადა, რომ ფუნდამენტური თავდაცვითი შესაძლებლობის შეძენაზე საქართველოს ირაკლი ღარიბაშვილმა და ბიძინა ივანიშვილმა ათქმევინეს უარი.
თავდაცვის ყოფილმა მინისტრმა იმ კავშირზეც ისაუბრა, რომელიც საქართველოს თავდაცვისუნარიანობის ამაღლებასთან დაკავშირებით საფრანგეთში გაფორმებულ მემორანდუმსა და ე.წ. კაბელების საქმეს შორის არსებობს.
