(გურია ნიუსი, ლანჩხუთი) _ გასულ უქმეებზე, გურიაში “ახალი მემარჯვენეების” ლიდერები _ დავით გამყრელიძე, ფიქრია ჩიხრაძე და მანანა ნაჭყებია იმყოფებოდნენ.
ცოტა ხნის წინ “ახლებმა” პარტიის ცენტრალურ ოფისში მორიგი ყრილობა გამართეს და თქვეს, რომ მათი ათწლიანი მოღვაწეობა უნდა გაგრძელდეს და ამისთვის ახალი შემართებით უნდა დაიწყონ მუშაობა. პარტიაში ცვლილებები მოხდა _ რეგიონულ და რაიონულ ორგანიზაციებში ხელმძღვანელი პირების გარკვეული ნაწილი შეიცვალა. პარტიის ლანჩხუთის ორგანიზაციის ლიდერი დავით წულაძე გავრცელებული ხმებით, პარტიიდან წასვლას აპირებდა, მაგრამ ასე არ მოხდა.
გურიის მთავარ ქალაქში ჩატარებული რეგიონული კონფერენციის შემდეგ, ჩოხატაურის და ოზურგეთის რაიონული ორგანიზაციების დღეს იგი პარტიაში მომხდარ ცვლილებებზე გვესაუბრება.
_ ბატონო დავით, როგორც გავიგეთ, “ახლებმა” გურიაში, ლანჩხუთის გარდა, ყველგან შეცვალეს ლიდერები.
_ კი, ნამდვილად ასეა. ასე იმიტომ მოხდა, რომ პარტიულ სტრუქტურას განახლება და ახალი სახეები სჭირდება.
_ განახლება მხოლოდ ლანჩხუთში არ გახდა საჭირო?
_ მათ იციან ჩემი ერთგულების შესახებ, რომ არსად წამსვლელი არ ვარ და ამიტომაც დამტოვეს. 22 წელია, ამ პარტიას ვემსახურები. ჯერ კიდევ “მოქალაქეთა კავშირი” იყო, როცა ჩვენ “ახლები” დავაარსეთ.
_ 22? 10 წლის იუბილე არ აღნიშნეთ რამდენიმე კვირის წინ?
_ ჰო, რაც არის. 22 ვთქვი? ერთგული ადამიანი ვარ და ეს იციან პარტიის პოლიტსაბჭოში.
_ მას შემდეგ, რაც დავით საგანელიძემ პარტია დატოვა, ხმები გავრცელდა, რომ შესაძლოა თქვენც წასულიყავით. საქმე იმაშია, რომ მასთან საკმაოდ ახლო ურთიერთობა გაკავშირებდათ.
_ არსად მივდივარ. “ახლებში” ვრჩები და ჩემს საქმე ვაკეთებ.
_ ამ ბოლო დროს, თუ არ ჩავთვლით საკრებულო სესიებს, თქვენი პარტიული გამონათება იშვიათად ხდება…
_ შეიძლება არ ვხმაურობდით, მაგრამ საქმეს ვაკეთებდით, ვმუშაობდით, ბატონო! ახლა ეს არ უნდა მეთქვა, წამომაცდენინე, მაგრამ უსაქმოდ ნამდვილად არ ვყოფილვართ. საარჩევნო უბნებით და სხვა პარტიული საქმეებით ვიყავი დაკავებული. ჩვენი წარმომადგენლები გვეყოლება ყველა საარჩევნო უბანზე, იმისათვის რომ არჩევნები არ გაყალბდეს. მართალია, კომისიის წევრები არ გვყავს, მაგრამ ჩვენს ხმებს დავიცავთ.
_ თქვენი პარტია ხშირად სხვა პოლიტიკურ ალიანსთან თუ ბლოკთან ერთად გამოდიოდა არჩევნებზე. როგორც პარტიის ყრილობაზე ითქვა, ამჯერად მარტო წარსდგებით ამომრჩეველთა წინაშე. გჯერათ, რომ წარმატებას მიაღწევთ?
_ ჩვენ მარტო ვიქნებით. ბლოკების და გაერთიანებების თემა ამოწურულია _ ამ სისტემამ არ გაამართლა. ჩვენ სხვადასხვა დროს ვიყავით “რესპუბლიკელების”, “მრეწველების” თუ სხვათა გაერთიანებაში, მაგრამ დღეს სხვა რეალობაა. ორთვენახევარი საკნებში ვცხოვრობდით და თბილისის ცენტრი გვეკავა, მაგრამ ამ მეთოდმა, როგორც ნახეთ, შედეგი ვერ მოიტანა. ეს წელიწადნახევარი ჩვენი შიგა სამზარეულოს მომზადებას მოვახმარეთ. მოგეხსენებათ, არჩევნებს უნდა ფული, რომლის გარეშე ვერაფერს იზამ, ეს ფული კი მოსაძიებელი იყო. ადრე ასე ხდებოდა, ჩვენი ფული იდებოდა და სხვა პარტიები ამით ფონს გადიოდნენ. დღეს ეს დრო წავიდა.
_ ბოლო დროს ჩატარებულმა გამოკითხვებმა აჩვენა, რომ თქვენი პარტიის რეიტინგი არც ისე მაღალია. მას შემდეგ, რაც პოლიტიკურ ასპარეზზე ივანიშვილი გამოჩნდა, ეს რეიტინგი კიდევ უფრო გაუარესდა…
_ ვაღიარებ, რომ დაბალი რეიტინგი გვაქვს, მაგრამ მუშაობა ყველაფერს გამოასწორებს. ივანიშვილის გამოჩენა ქართული პოლიტიკაში ცუდი არ არის. საერთოდ, არ მჩვევია, რომ ოპოზიციაზე ცუდი ვთქვა. მიუხედავად იმისა, რომ მომავალ არჩევნებზე მარტო გამოვალთ, დანარჩენ ოპოზიციაზე ცუდს არ ვიტყვი. მახსოვს, ერთმა ქალბატონმა დაწერა, წულაძე ცუდ ოპოზიციას არ ებრძვისო. ერთმანეთისგან ცუდი და კარგი ოპოზიცია არასდროს გამირჩევია _ ოპოზიცია არის ოპოზიცია! მე ლანჩხუთელი ვარ, ზოგი “მარადმწვანე” ოპოზიციონერსაც მეძახის. რას ვიზამ, ჩემს მეგობრებთან ბოლომდე დარჩენა და ერთგულება მახასიათებს. არჩევნებისთვის ფულია საჭირო, ფული!!!
_ მერე ეს ფული გაქვთ?
_ ჩვენმა პარტიამ მოაგროვა ამ წელიწადნახევარში.
_ მაგრამ თქვენი ფინანსური შესაძლებლობები ივანიშვილის ფულთან შედარებით საკმაოდ მწირი იქნება.
_ ასეა, მაგრამ ჩვენ დიდი ტორტის ნაჭერს არ ვითხოვთ, პატარითაც დავკმაყოფილდებით. ჩვენ ჩვენი საქმე გვაქვს. ხელისუფლების ოპოზიცია უნდა ვიყოთ და არა _ ერთმანეთის. ოპოზიციას ვგულისხმობ. ბოლო თვეების მანძილზე აქტიურად ვმუშაობდით და ვფიქრობთ, რომ არც თუ ისე ცუდად. ჩვენმა პარტიამ ახალი ამოცანები დაისახა მიზნად, მოხდა მთელი რიგი ცვლილებები. აქედან გამომდინარე, არჩევნებზე მარტო გამოვალთ, მაგრამ შედეგიანად!
