"ჩვენ მოვისმინეთ განცხადებები, რომ პროგნოზი ქვეყნის ეკონომიკური განვითარების მაჩვენებლის შესახებ კიდევ 2%-ით უნდა შემცირდეს, ამავდროულად ხელისუფლება აცხადებს, რომ ყველაფერი ისე მიდის როგორც დაგეგმილი იყო, ანუ ეს ნიშნავს იმას, რომ მთავრობამ დაგეგმა ისე, რომ ეკონომიკას ზრდის ნაცვლად კლება დაეწყო?" – ასე გამოეხმაურა ქვეყანაში შექმნილ ეკონომიკურ მდგომარეობას "დემოკრატიული მოძრაობის" ლიდერი ნინო ბურჯანაძე დღეს გამართულ ბრიფინგზე.
მისი თქმით, ჩვენ აღმოვჩნდით იმ რეალობის წინაშე რაც მოსალოდნელი იყო. როცა ჩვენი ქვეყნის მოსახლეობის უმრავლესობამ ჩათვალა, რომ ვინაიდან ბიძინა ივანიშვილს ჰქონდა საკუთარი რამდენიმე მილიარდიანი ბიზნესი, ის ასეთივე წარმატებით ააწყობდა ქვეყნის ეკონომიკას.
"ეს იყო ყველაზე დიდი შეცდომა, რადგან ბიზნესის და სახელმწიფო მმართველობა არის სრულიად სხვადასხვა რამ და იმ პრინციპებით და იმ პრაქტიკით, რითაც იმართება ბიზნესი, იმ მეთოდბით ქვეყანაში ეკონომიკა ვერ ვითარდება. სახელმწიფო არ არის ბიზნესი და კერძო კომპანია, ერთი პირის საწარმო. სახელმწიფოს უნდა ჰქონდეს საგარეო და საშინაო პოლიტიკა, სწორი ეკონომიკური პოლიტიკა, სწორედ ამ შემთხვევაში შეიძლება დაიწყოს ქვეყანაში ეკონომიკური ზრდა", -განაცხადა ნინო ბურჯანაძემ.
მისი თქმით, თუ ქვეყანაში ეკონომიკური ვითარება ასე გაგრძელდა, სულ რამოდენიმე წელიწადში საქართველო 119-ე ადგილზე გადავა, რაც ნიშნავს იმ ას, რომ მოსახლეობის უმრავლესობა შიმშილის ზღვარზე იქნება.
"მესმის, რომ ბიძინა ივანიშვილს და „ქართული ოცნების“ ელიტას არ ეჩქარება და 2030 წლამდეც სიამოვნებით მოიცდიან, მაგრამ ჩვენი მოსახლეობის აბსოლუტური უმრავლესობა არათუ 2030 წლამდე, არამედ 2017 წლამდეც ვერ მოიცდის, რადგან მათი შემოსავალი ყოველთვიურად მცირდება. ფაქტია, პენსიონერების შემოსავალი შემცირდა და 86 დოლარის ნაცვლად, 66 დოლარის ექვივალენტია ლარებში, ხოლო ფასები პირველადი მოხმარების საგნებზე, მათ შორის, წამლებზე და პროდუქტებზე მკვეთრად გაიზარდა", _ განაცხადა "დემოკრატიული მოძრაობის" ლიდერმა.
ნინო ბურჯანაძის შეფასებით ქვეყანაში ეკონომიკურად საგანგაშო ვითარებაა და სამწუხაროდ არსებული რეალობიდან გამომდინარე, ის ვერ ვხედავს გამოსავალს და პერსპექტივას, რომ „ქართულმა ოცნებამ“ შეძლოს რეალური ეკონომიკური გარდატეხის შეტანა ქვეყნის ეკონომიკური განვითარების პროცესში, იმ მარტივი მიზეზის გამო, რომ „ქართული ოცნების“ წევრების უმრავლესობა ვერ ფლობენ იმ ელემენტარულ ინსტრუმენტებს, რაც ქვეყნის მართვას სჭირდება. მისი თქმით, ნათელია, რომ რეალური სწრაფი და გარდამტეხი ცვლილებები ერთადერთი გამოსავალია იმისათვის, რომ ეკონომიკური ვარდნა შეჩერდეს და ქვეყანამ წინსვლა დაიწყოს.
