პრემიერის თქმით, ის ყველა რეგიონში აპირებს ჩასვლას. სამხარეო ადმინისტრაციაში გილაურის მისვლამდე რეგიონული განვითარებისა და ინფრასტრუქტურის მინისტრი რამაზ ნიკოლაიშვილი გამოჩნდა.
გვირჩევს თუ გვაფრთხილებს რამაზ ნიკოლაიშვილი
ჩვენს დანახვაზე, ნიკოლაიშვილი დაინტერესდა, არსებობდა თუ არა “გურია ნიუსის” განყოფილება ოზურგეთში და კონკრეტულად, სად მდებარეობდა ჩვენი ოფისი. შემდეგ დაგვანახა ქალბატონი, რომელიც, ნიკოლაიშვილის თქმით, მას სთხოვდა, რომ მიხეილ სააკაშვილი კიდევ ჩამოეყვანა გურიაში: _ ხომ ხედავთ, კიდევ უნდა პრეზიდენტი ოზურგეთში ნახოს, ამ ქალბატონს გააკეთებინეთ კომენტარი, _ “გვასწავლა” მინისტრმა. შემდეგ ხუმრობის ხასიათზე დადგა და მოგვიყვა, დილით როგორ დადის ჩოგბურთის სათამაშოდ: _ შეგიძლიათ, დაწეროთ, დილით, ჩოგბურთს “გურია ნიუსის” მაისურში გამოწყობილი ვთამაშობ! შემდეგ ხუმრობიდან ნიკოლაიშვილი აგრესიასა და ბრალდებებზე გადავიდა. გვირჩია, რომ ხალხი შეცდომაში არ შეგვეყვანა (სხვათა შორის, თუ კი ბატონმა რამაზმა არ იცის, ვეტყვით, რომ “გურია ნიუსი” IღI-ს კვლევების მიხედვით, საქართველოს მასშტაბით, ყველაზე კითხვად და სანდო გაზეთებს შორის პირველ ექვსეულში მოხვდა. გარდა ამისა, შეგვიძლია მინისტრს დოკუმენტურად წარვუდგინოთ ინფორმაციები “გურია ნიუსის” საკმაოდ მაღალი ტირაჟის შესახებ, ხოლო ჩვენი ვებგვერდის რეიტინგი, რომელიც ყველასთვის ღიაა, მას თავად შეუძლია გადაამოწმოს და მიხვდება, რომ “მკითხველის შეცდომაში შემყვან გაზეთს” ასეთი დიდი აუდიტორია ნამდვილად არ ეყოლება. გარდა ამისა, მინისტრის აგრესია საფუძველს გვაძლევს ვიფიქროთ, რომ ოპოზიციის მოსაზრება “ხელისუფლების მიერ გურიაში ნიკოლაიშვილის სახით ეგზეკუციის ჩაყენების შესახებ”, რეალობას მოკლებული არ უნდა იყოს. ისიც საინტერესოა, რა მინიშნებებს აკეთებს ბატონი რამაზი, როცა კითხულობს, თუ სად მდებარეობს “გურია ნიუსის” ოზურგეთის ოფისი? ხომ არ გვახსენებს, რომ ეს ოფისი პოლიციის შენობის მოპირდაპირე მხარესაა და თუ “ჭკუით არ ვიქნებით”, სამართალდამცავები შესაბამის ზომებს მიიღებენ? და ბოლოს, თუ მინისტრი მსგავსი მეთოდებით ეცდება ჩვენთან ურთიერთობის გაგრძელებას, რედაქცია იძულებული გახდება, საქმის კურსში ჩააყენოს საქართველოში აკრედიტებული დიპლომატიური კორპუსი, საქართველოს და მსოფლიოს უფლებადამცველი ორგანიზაციები, რომლებიც, გვინდა დავარწმუნოთ ბატონი რამაზი, რომ, მისგან განსხვავებით, “გურია ნიუსის” მუხლჩაუხრელ და ობიექტურ მუშაობას საკმაოდ კარგად იცნობენ და პატივს სცემენ. რედ.). როგორც მან განმარტა, ოზურგეთში მიხეილ სააკაშვილის ვიზიტის ჩვენი გაზეთის მიერ გაშუქებამ გააღიზიანა. შენიშვნები და კრიტიკა “გურია ნიუსის” მისამართით დიდხანს გაგრძელდებოდა, ნიკა გილაური რომ არ გამოჩენილიყო.
30-წუთიანი “მოთელვა”
ნიკა გილაური ოზურგეთს ნიკოლოზობას ესტუმრა. ის გურულ მაღალჩინოსნებს შეხვდა და გაიგო, თუ რა პროგრამები გახორციელდა 2011 წელს და რა იგეგმება 2012 წლისთვის. შეხვედრაზე საუბარი ვალერი ჩიტაიშვილმა დაიწყო:
_ 2012 წელს, ცენტრალური ბიუჯეტიდან გამოყოფილია 3 240 000 ლარი. ეს თანხები გადანაწილდება გზებზე, მრავალსართულიანი ბინების სახურავების გადახურვაზე, ასევე, საერთო საცხოვრებლების ეზოების კეთილმოწყობაზე. გაკეთდება სანიაღვრე არხები, სამივე მუნიციპალიტეტში გაგრძელდება გარე განათების პროექტი. ჩოხატაურში არის პრობლემები _ დაბაში, სადაც სანიაღვრე არხები არ არის, მოსახლეობა ითხოვს გაკეთებას; რაც შეეხება სოფლის პროექტებს, ჩვენ, როგორც შარშან გავაკეთეთ, ისევ ვაკეთებთ, რომ აბსოლუტურად… _ გუბერნატორს სიტყვა პრემიერ-მინისტრმა შეაწყვეტინა და საუბარი კითხვა-პასუხის რეჟიმში გაგრძელდა.
ნიკა გილაური: _ შარშანდელი კი არა, წელს როგორ ჩაიარა, რა ხდება ამ კუთხით?
ვალერი ჩიტაიშვილი: _ ე.ი. ძირითადად იყო ასე, რომ აბსოლუტურად ყველა სოფელში იყო კრებები და იმის გამო, რომ ამ კრებებს ვერ ესწრებოდა მოსახლეობის ის რაოდენობა, რომელიც ჩვენ გვჭირდებოდა, ეს არის დაახლოებით 70-80%, თვითონ ეს სანიაციატივო ჯგუფი _ სოფლის რწმუნებულები თავის თანაშემწეებთან ერთად მიდიოდნენ თითოეულ ოჯახში და ეკითხებოდნენ, რა იყო მათთვის პრიორიტეტული.
ნიკა გილაური: _ ძირითადად, რა გაკეთდა?
ვალერი ჩიტაიშვილი: _ ძირითადად, გაკეთდა სპორტული მოედნები, სანიაღვრე არხები და მილ-ხიდები. შემოიღობა სასაფლაოები, მოწესრიგდა ცენტრის გარე განათება.
შეხვედრაზე ითქვა, რომ გურიაში სამი სკოლის მშენებლობა დაიწყება: ორი _ ლანჩხუთში _ ჩიბათსა და ხაჯალიაში, ერთი კი ჩოხატაურში. იქვე ითქვა, რომ რთული სიტუაციაა გურიის რეგიონში სკოლების საკითხთან დაკავშირებით _ აქ არის 11 ავარიული სკოლა, სადაც ბავშვების სწავლა შეუძლებელია და დაახლოებით 50 სკოლაა, რომელსაც გადახურვა სჭირდება. ამ ინფორმაციის მიღების შემდეგ, ნიკა გილაურმა სამივე მუნიციპალიტეტის გამგებლებს მიმართა, ესაუბრათ პრობლემებსა და პრიორიტეტებზე. მკითხველისთვის საინტერესო იქნებოდა, რა პრობლემებს დაასახელებდნენ გამგებლები, მაგრამ ამ დროს, ჩვენი სხდომაზე ყოფნის “ლიმიტი ამოიწურა” და პრემიერ-მინისტრის ადმინისტრაციის უფროსმა დარბაზი დაგვატოვებინა.
გვაქვს თუ არა არასწორი ინფორმაცია
სამხარეო ადმინისტრაციაში გამართული შეხვედრის შემდეგ, ნიკა გილაურმა ჟურნალისტებისთვის მოკლე კომენტარი გააკეთა: _ ახლა წლის ბოლოა და ვაპირებ, ყველა რეგიონში ჩავიდე, ადგილზე გავეცნო იმ პრობლემებს. გურიაში ძალიან ბევრი რამ გაკეთდა 2011 წელს. 2012 წლისთვის 50-მილიონზე მეტი ლარის სამუშაოები არის დაგეგმილი _ აქ შედის, როგორც წყლის სამუშაოები, ასევე, გზების, ელექტროენერგიის, გაზის სამუშაოები, საავადმყოფოების მშენებლობები. არის პრობლემები. რამდენიმე პრობლემას მე თვითონ გავეცანი, გურია ის რეგიონია, სადაც საავადმყოფოების მშენებლობებთან დაკავშირებით პრობლემებია შექმნილი და ამას აუცილებლად გამოვასწორებთ. მოწესრიგდება სკოლებთან დაკავშირებული საკითხებიც. ამ შეხვედრით კმაყოფილი დავრჩი, გავიგე რა გაკეთდა 2011 წელს სოფლის განვითარების პროგრამით და რა იგეგმება 2012 წელს. კარგი ბიუჯეტი აქვს 2012 წელს გურიას. რა თქმა უნდა, პრობლემები არის, მაგრამ გამოსწორებადია და 2012 წელს საკმაოდ ნაყოფიერი წელი გვექნება აქ ინფრასტრუქტურული პროექტების თვალსაზრისით.
_ ბატონო ნიკა, თქვენ ახსენეთ, გურიას კარგი ბიუჯეტი აქვსო, მაგრამ ოზურგეთის, ლანჩხუთის და ჩოხატაურის ბიუჯეტებს თუ გადავხედავთ, ძირითად აქცენტი ადმინისტრაციულ ხარჯებზეა გაკეთებული.
_ ნამდვილად არასწორი ინფორმაცია გაქვთ(?!). მინდა, გითხრათ, რომ ძალიან დიდი თანხა მიდის ინფრასტრუქტურაზე, ძალიან დიდი თანხა მიდის გზებზე, წყალზე, სკოლების შეკეთებაზე, სხვა ინფრასტრუქტურაზე, ამას ყველაფერს მოსახლეობა იყენებს, _ გასცა ჩვენს კითხვა პასუხი ნიკა გილაურმა, უცებ დაგვტოვა და ოზურგეთის რამდენიმე ობიექტი მოინახულა (აქ კი ჟურნალისტებს გვითხრეს, რომ აღარ ვიყავით საჭირო). ნიკა გილაურის ვოიაჟი ოზურგეთში რესტორან “ქალაქურში” დასრულდა, სადაც მას რამაზ ნიკოლაიშვილი, მიხეილ სააკაშვილთან ერთად ქობულეთში ველოსიპედით გასეირნების შემდეგ შემოუერთდა.
პრემიერ-მინისტრის საყურადღებოდ
გილაურს შევახსენებთ, რომ ბიუჯეტზე მსჯელობა ინფორმაციის საფუძველზე კი არა, რიცხვების დაჯამებით ხდება და ამ რიცხვებს აქვე ვთავაზობთ:
ლანჩხუთის ბიუჯეტის 48,7% ადმინისტრაციულ ხარჯზე მოდის, ხოლო აიპ-ების დაფინანსებას ბიუჯეტის 42,3 %-ს ხმარდება. ლანჩხუთის მუნიციპალიტეტის 2012 წლის ფინანსური დოკუმენტი 5 241 600 ლარით განისაზღვრა. აქედან, მთავარი პრიორიტეტი, როგორც ამას ადგილობრივი ხელისუფლება აცხადებს, არა სოციალური დაცვა, არამედ ადმინისტრაციული ხარჯი, ე.წ. აიპ-ების თანამშრომლების შენახვა და სპორტულ-კულტურული პროგრამების დაფინანსებაა.
ოზურგეთის მუნიციპალიტეტის 2012 წლის ბიუჯეტი 9 მილიონ 692 ათასი ლარით განისაზღვრა. აღნიშნული თანხიდან ადგილობრივმა ხელისუფლებამ მთავარ პრიორიტეტად კულტურის სფერო განსაზღვრა. პროექტის მიხედვით, სოციალურ-კულტურულ ღონისძიებებზე 2 193.8 ათასი ლარია გათვალისწინებული, რაც მთლიანი ბიუჯეტის 22,63 %-ს შეადგენს. შემდეგ მოდის ადმინისტრაციული ხარჯი _ ბიუჯეტის 16,64%, ანუ ოზურგეთის მუნიციპალიტეტის საკრებულოში დასაქმებულთა ხარჯი ნახევარ მილიონ ლარს შეადგენს, აქედან, 31 თანამშრომლის ხელფასზე 248.5 ათასი ლარი დაიხარჯება, ხოლო აღმასრულებელი ორგანოს დაფინანსებაზე მილიონ ლარზე მეტია გამოყოფილი. აღსანიშნავია, რომ 2011 წლის ბიუჯეტით, არასამეწარმეო (არაკომერციული) იურიდიული პირების დაფინანსება 3 791.3 ათას ლარს შეადგენდა, 2012 წლის ბიუჯეტის პროექტის მიხედვით კი, დაფინანსება 737.7 ათასი ლარით იზრდება და 4 529.0 ათას ლარამდე ადის. ასე რომ, როგორც ოზურგეთის მუნიციპალიტეტის გამგებლის მოვალეობის შემსრულებელი, ილია ვაშაყმაძე ირწმუნება, სოციალური დაცვა პრიორიტეტად არის მიჩნეულიო, ეს ასე ნამდვილად არ არის და ამის გასარკვევად მარტივი არითმეტიკის ცოდნაც საკმარისია _ ჩვენი გაანგარიშებით, სოციალურ სფეროზე ბიუჯეტის მხოლოდ 6,84% დაიხარჯება.
3 242.9-ათასიანი ბიუჯეტიდან ადგილობრივი ხელისუფლების შენახვა ჩოხატაურს 1 288.0 ათასი ლარი უჯდება, ხოლო ჯანდაცვის და სოციალური პროგრამების დასაფინანსებლად, მხოლოდ 275.0 ათას ლარს იმეტებს!
ასე რომ, ვის აქვს არასწორი ინფორმაცია _ ჩვენ თუ გილაურს, ამ მეტად მარტივი ამოცანის ამოხსნა მკითხველისთვის მიგვინდია.
