(გურია ნიუსი, ლანჩხუთი) _ ტელეკომპანია “გურიაში” ახალი მენეჯმენტის მისვლიდან რამდენიმე დღეში, ხელისუფლებამ ვანო ჩხარტიშვილსა და ოპოზიციას ტელეკომპანია ცხვირწინ აწაპნა და ამაში უზენაესი სასამართლო “დაიხმარა”. ხელისუფლებამ გამოიყენა ძველი დავა და მარინა ვასილევას ისე მიაკუთვნა სიორიძეების ტელეკომპანია, რომ მოდავე ამას საერთოდ არ ითხოვდა _ იგი მხოლოდ ფინანსურ ანაზღაურებას ითხოვდა. შემდეგ კი, მოთხოვნილი თანხის მესამედ ფასში, ტელეკომპანია საამშენებლო მასალებით მოვაჭრე “დემასის” საკუთრებაში აღმოჩნდა. საბოლოოდ, საქმე ისე “მოაგვარეს” _ ვასილევაც დაზარალდა და სიორიძეებიც. საინტერესოა ის ფაქტიც, რომ “მოგებული მხარის” ინტერესებს ადვოკატი მირდატ ქამადაძე იცავდა, რომელიც ფოტორეპორტიორების საქმეში (გიორგი აბდალაძის დასაცავად) იმ დროს ჩაერთო, როცა ხელისუფლებას ყველაზე მეტად სჭირდებოდა, რადგან ოჯახის მიერ დაქირავებულმა ადვოკატებმა სახელისუფლო თამაშში მონაწილეობაზე უარი განაცხადეს.
ტელეკომპანია “გურიას” რამდენიმედღიანი მთავარი პროდიუსერი, ელდარ მდინარაძე თვლის, რომ ყველაფერი პოლიტიკას უკავშირდება.
_ ბატონო ელდარ, რა ხდება ტელეკომპანია “გურიასთან” დაკავშირებით?
_ არაფერიც არ ხდება. შევედით შიგნით, ერთი კვირის განმავლობაში ვიყავით, გავიარ-გამოვიარეთ და წამოვედით. ეგ იყო სულ.
_ ზუსტად ეგ გვაინტერესებს, რა მოხდა ამ ერთ კვირაში? ან რას უკავშირებთ ყოველივე ამას _ პოლიტიკას თუ უბრალოდ, ძველ დავას?
_ რა გითხრათ, საერთოდ, ყველაფერი პოლიტიკას უკავშირდება. რა თქმა უნდა, იყო ძველი დავაც, თუმცა ეს ახლა გამოიყენეს. ყველა ვადა გასული იყო, 6 თვის განმავლობაში არაფერი მოხდა და უკვე 18 თვის შემდეგ, როცა დასჭირდათ, ისევ ჩამოართვეს სიორიძეებს. არ დაუძახეს მხარეებს, რადგან იქ შესაძლებელია მოლაპარაკებულიყვნენ, ამის ყველა წინაპირობა იყო, მაგრამ ვიღაცას არ აწყობდა ეს, სავარაუდოდ. დაუბრუნეს იმ ქალბატონს, იქვე მესამე პირს გადასცეს ტელეკომპანია… უფრო ზუსტად, იქვე გაყიდა მხარემ.
_ ბატონო ელდარ, როცა ტელეკომპანიაში სამუშაოდ მიდიოდით, არ იცოდით, რომ შესაძლოა პრობლემები ყოფილიყო?
_ არა, ნამდვილად არ მეგონა! 18 თვის წინ დასრულდა ეს დავა, თან მფლობელისგან ვიცოდი, რომ გადამხდელი იყო იმ თანხის, რასაც მეორე მხარე მისგან ითხოვდა.
_ თუ საიდუმლო არ არის, თქვენ ვინ მიგიწვიათ ტელევიზიაში?
_ მფლობელებმა მიმიწვიეს, რომელსაც ახლა ჩამოართვეს ტელეკომპანია. მერაბ სიორიძესთან მაქვს ძალიან ახლო ურთიერთობა, ამჟამად იგი უკრაინაშია და ჩემი ძმის კომპანიაში მუშაობს. ახლა დიდ უხერხულობაში ვარ ჩავარდნილი! მე მივდიოდი ტელევიზიაში, რომ კარგი არხი გაგვეკეთებინა. ახლა გამოდის, რომ ჩემ გამო წაართვეს ტელეკომპანია ამ ხალხს.
_ თქვენ გამო რატომ?
_ უხერხულად ვგრძობ თავს, მე რომ არ მივსულიყავი, ხომ დარჩებოდა ტელევიზია სიორიძეებს? თქვენს რას ფიქრობთ? დარჩებოდა ეს ტელევიზია სიორიძეებს და იქნებოდა, როგორც არის. ახლა მათი აღარაა და ტელევიზიაც იგივე რჩება… ჩემი სურვილი იყო, კარგი ტელევიზია გაგვეკეთებინა. ბევრი ფულიც არ უნდოდა, მაგრამ გეცოდინებათ, როგორი გაპარტახებულია ტელეკომპანია. გველებიანმა რა უნდა გააკეთოს იმ პირობებში, რაც შეუძლია, აკეთებს. გვინდოდა თოქ-შოუ გაგვეკეთებინა, სტუდია მოგვეწყო… ჩვენ არავის შემცირებას არ ვაპირებდით, პირიქით, დავუმატებდით კადრებს. 2-3 წელიწადს ვიქნებოდი მანდ, გავაკეთებდი ტელევიზიას და გურიას დავუტოვებდი, ამით ძალიან კმაყოფილი ვიქნებოდი. მხოლოდ პოლიტიკა არ არის ტელევიზია. ამასთან, მიმუშავია არაერთ ტელევიზიაში და ვერავინ იტყვის, რომ რომელიმე იყო პოლიტიკურად ორიენტირებული ან ოპოზიციური არხი.
