სოფლის მხარდაჭერის პროგრამის თანხები გადანაწილებულია
ლანჩხუთის მუნიციპალიტეტის საკრებულომ 23 აპრილს რიგგარეშე სხდომა ჩაატარა, რომელსაც დეპუტატთა მცირედი ნაწილი არ ესწრებოდა და იგი მხოლოდ ორ საკითხს მოიცავდა. თავდაპირველად საკრებულოს თავმჯდომარე და დეპუტატები ფეხზე წამოდგომით მიესალმნენ დარბაზში მყოფ ახალგაზრდებს, რომლებიც სხდომას „post-ალიონისა“ და გაზეთ „გურია ნიუსის“ ერთობლივი პროექტის – „აირჩიე დემოკრატია“ ფარგლებში ესწრებოდნენ.
პირველი საკითხი დეპუტატების წინაშე გამგეობის ინფრასტრუქტურისა და არქიტექტურის სამსახურის უფროსმა ლევან ჩხაიძემ გამოიტანა, რომელმაც სოფლის მხარდაჭერის პროგრამის ფარგლებში, ლანჩხუთის მუნიციპალიტეტისთვის 2015 წელს საქართველოს მთავრობის მიერ გამოყოფილი თანხების განაწილების შესახებ, ლანჩხუთის მუნიციპალიტეტის საკრებულოს განკარგულების პროექტის დამტკიცების თაობაზე ისაუბრა.
როგორც ირკვევა გამგეობის იურიდიულმა სამსახურმა შეისწავლა აღნიშნული პროექტი და მას ვიზირებაც გაუკეთა. ლევან ჩხაიძის ინფორმაციით მთლიანობაში სოფლის მხარდაჭერის პროგრამის ფარგლებში სახელმწიფომ 817 447 ლარი გამოყო. აქედან სოფელ შუხუთში 45 319 ათასი ლარით რვა პროექტი დაფინანსდება. ჩოჩხათის ადმინისტრაციულ ერთეულში კო – 14 პროექტი და საამისოდ 85 021 ლარი დაიხარჯება. ნიგოითის ადმინისტრაციაში 79 784 ლარია გათვალისწინებული 16 პროექტის განსახორციელებლად.საგულისხმოა, რომ აქედან 15 328 ლარი სოფელ ჩოლობარგში სასაფლაოზე მისასვლელი გზის შესაკეთებლად უნდა დახარჯულიყო, რაც თავის დროზე სოფლის კრებაზე მოსახლეობამ ერთხმად მოითხოვა. თუმცა, გამგეობამ ამ თანხის გადამისამართება საზოგადოებრივი ცენტრის შენობისთვის სახურავის ნაწილობრივ შეკეთებისთვის და მინის შეძენა- მონტაჟისთვის მოინდომა, რაც დასამტკიცებლად სხდომაზე წარმოდგენილ პროგრამის პროექტში ასახულიც იყო. გაირკვა, რომ საბოლოოდ სოფელთან კომპრომისი ვერ შედგა და სასაფლაოს გზის შეკეთებისთვისაც 13 315 ლარი მაინც დაიხარჯება, დარჩენილი თანხით კი საზოგადოებრივი ცენტრის შენობის სახურავი ნაწილობრივ შეკეთდება.
აკეთში ექვსი პროექტის განხორციელებას 49 234 ლარი მოხმარდება. აცანაში ამდენივე პროექტი განხორციელდება და საამისოდ 28 561 ლარია გამოყოფილი. მამათშიც და მაჩხვარეთშიც ასევე ექვსი პროექტი განხორციელდება, შესაბამისად 33 061 ლარით და 29 355 ლარით. გვიმბალაურის ადმინისტრაციაში რვა პროექტისთვის 40 862 ლარია განსაზღვრული, ხოლო ჩიბათის შვიდი პროექტისთვის – 54 189 ლარი.
ლესაში სულ ხუთი პროექტია განსახორციელებელი, მთლიანობაში 50 180 ლარის მოცულობით, აი, ჯურუყვეთის ადმინისტრაციაში კი 51 484 ლარით შვიდი პროექტი. ნინოშვილში მხოლოდ ორი პროექტია შესასრულებელი და ამისთვის 24 438 ლარი გაიხარჯება სოფლის პროგრამებიდან. ნიგვზიანის ადმინისტრაციულ ერთეულში კი 11 პროექტი განხორციელდება, რომელიც 74 890 ლარს მოიცავს. სუფსაში 14 პროექტი დაფინანსდება 96 312 ლარით.რაც შეეხება ღრმაღელეს, იქ 88 861 ლარი ხუთ პროექტს მოხმარდება.
დეპუტატ გია გოგუაძის აზრით, გაუგებარია რატომ უნდა დაიხარჯოს სოფლის პროგრამიდან რაიმე თანხა საზოგადოებრივი ცენტრის შენობის სახურავის შეკეთებისთვის.
დეპუტატ ნონა მურვანიძის აზრით კი, გაუმართლებელია, როცა ჯერ თანხა გამოიყოფა და შემდეგ ამ თანხაზე ხდება პროექტის მორგება.
საკრებულოს სამანდატო, საპროცედურო, იურიდიულ საკითხთა და ეთიკის კომისიის თავმჯდომარის, რომან ბიწაძის მოსაზრებით, თანხები, რომელიც სოფლის პროგრამით იხარჯება, ფაქტობრივად, წყალში გადაყრილია.
ბიწაძისგან განსხვავებით სოფლის მხარდაჭერის პროგრამის არსებული მოდელი სავსებით მისაღებია საკრებულოს ინფრასტრუქტურის კომისიის თავმჯდომარე ბესიკ ტაბიძისთვის, რომელსაც მხარი ნიგოითის თემის დეპუტატმა თემურ ალექსაიამაც დაუჭირა.
ტაბიძემ აქვე ნინოშვილის მემორიალურ მუზეუმამდე მისასვლელი გზის პრობლემა დასვა და გამგებელს წინასწარ მადლობაც გადაუხადა, რომ იგი დაინტერესებულია ამ საკითხის მოგვარებით.
სოფლის პროექტებთან დაკავშირებით ორიოდ სიტყვა მუნიციპალიტეტის პირველმა პირმა ზაზა ურუშაძემაც თქვა.
„წლების წინ სოფელ ქვიანში სოფლის პროგრამით ბაზარი გაკეთდა, თუმცა, დღეს იგი უფუნქციოა და შიგ არავინ შედის. ახლა ქვიანის ცენტრში საპირფარეშოს გაკეთებას ითხოვენ, გამაგებინეთ ერთი რამდენი უნდა გაკეთდეს, ორი ხომაა, მესამე უნდა დავამატოთ?“, _ აღნიშნა ურუშაძემ, რაზეც მას თემურ ალექსაია გამოეპასუხა და აღნიშნა:
„ერთი კუსტარულად დამზადებულია ბატონო და კაპიტალური გვესაჭირეობა. თანაც ერთი საბავშვო ბაღზეა მიბმული, მეორე (ანუ კუსტარული) სამედიცინო პუნქტზე, ამიტომ ცენტრიდან მოშორებით უნდა გაკეთდეს“.
რაზეც მას გამგებელიც დაეთანხმა.
საბოლოოდ, გამოტანილ საკითხს საკრებულომ მხარი დაუჭირა.
მეორე საკითხად საფინანსო სამსახურის უფროსმა როლანდ ლაშხიამ ლანჩხუთის მუნიციპალიტეტის 2015 წლის ადგილობრივი შესყიდვების გეგმის დამტკიცების შესახებ ლანცხუთის მუნიციპალიტეტის საკრებულოს გასული წლის #107 განკარგულებაში ცვლილების შეტანის თაობაზე ისაუბრა.
კერძოდ, გეგმაში აისახა ხის მორების დამუშავების თანხა 2 500 ლარის ოდენობით და მუნიციპალიტეტში ვაკანტურ თანამდებობაზე კონკურსის ჩატარების ხარჯების დაფინანსების თანხა 1500 ლარის ოდენობით. ამ საკითხს დეპუტატებმა მხარი ისე დაუჭირეს, რომ არც ერთი კითხვა და შენიშვნა არ გასჩენიათ.
