თემურ ლორია – „ამათ ფეხბურთი ჩაის ფაბრიკაში აერიათ“

საფეხბურთო კლუბ ლანჩხუთის "გურიის" ყოფილმა მთავარმა მწვრთნელმა, თემურ ლორიამ და მისმა ასისტენტმა, თენგიზ პატარაიამ, "გურია ნიუსის" პრეს-კლუბში ადგილობრივ მედიასთან პრესკონფერენცია გამართეს, რომლის მთავარი თემა მათი კლუბიდან დათხოვნის მიზეზებზე საუბარი იყო.

თემურ ლორია: "დავიწყო უნდა ზაზა ურუშაძის მიერ პრესაში განცხადებით, სადაც ის ამბობს ერთ- ერთ შეხვედრაში გუნდი 1:0-ს იგებდა, ლორიამ შეცვლა დააგვიანა და გაგვითანაბრესო. ასევე 20 წუთი ფეხბურთელი შეცვლას ითხოვდა და ორი გოლი მისი ფლანგიდან გაგვიტანესო. სისულელე და სამარცხვინოა მისი მხრიდან ასეთი განცხადებები, მითუმეტეს, რომ 1: 1 შინ გუნდს არ უთამაშია და ეს მაინც უნდა იცოდეს. ესაა ზუსტად მწვრთნელის კონპეტენციაში უხეში ჩარევა, ესაა ფეხბურთის ის ცოდნა, რომელიც მას A კატეგორიის ლიცენზიის მქონე მწვრთნელზე მეტი ჰქონია. სწორედ ამ ცოდნას გვიწუნებენ გათავისუფლების ბრძანებაშიც, სადაც აღმასრულებელი დირექტორი, ოთარ ჩხაიძეც ეჭვქვეშ აყენებს მწვრთნელთა კვალიფიკაციას და  ამათ ფეხბურთი ჩაის ფაბრიკაში აერიათ უსათუოდ.

მიზეზი იმდენად უსუსურია, პატარა ბავშვიც ვერ მოიფიქრებს. ისიც არ იციან ამ არაპროფესიონალებმა 1:3 მარცხი, დიდი ანგარიშით მარცხს რომ არ ნიშნავს. შრომითი ხელშეკრულება ნაკისრი ვალდებულებების არაჯეროვანი შესრულებისთვის შეგვიწყვიტეს, რაც კლუბის პროგრამით გათვალისწინებული შედეგების მისაღწევად გუნდის სათანადო მოუმზადებლობით აისახა. საინტერესოა  ხსენებული პროგრამა რას ითვალისწინებდა და სად წერია ამის შესახებ?

პრესაში გაჟღერდა ლორია მოსალოდნელ შედეგებზე გაფრთხილებული იყოო. ჯერ ერთი , არავის გავუფრთხილებივარ, მეორეც, გაფრთხილება წერილობით უნდა წარმოედგინათ. გამეცინა, როცა სპორტულმა დირექტორმა ერთ-ერთ თოქ-შოუში განაცხადა, სამეულში შესვლა დაგვპირდა ლორიამო. ამ კაცს ფეხბურთთან შეხება რომ არ ჰქონდა ვიცოდი, მაგრამ შუბლის ძარღვი თუ გაწყვეტილი ჰქონდა – არა.

მანახონ ერთი სად ვთქვი ასეთი რამ, ამას როგორ ვიტყოდი, პირველი წრე უფულოდ გავათრიეთ, მეორე კი ყველაზე გვიან დავიწყეთ, თან სასურველი ფეხბურთელები უფულობის გამო არ შემარჩევინეს. ეს კი ვთქვი –  შარშანდელთან შედარებით უფრო მაღალი ადგილებისთვის ვიბრძოლებთ, მაშინ მეათე ადგილზე გავედით და ეს არ ნიშნავს მაინცდამაინც სამეულს. ექვსეულზე ბრძოლა ახლაც შესაძლებელია. ყველა თამაში რომ წავაგოთ, მაინც არ გავვარდებით და გაუშვან ბატონო,  კონტრაქტის დარღვევისთვის ფეხბურთელებიც და სეზონს ახალგაზრდებიც ჩაამთავრებენ. ამას არ იზამენ, კონტრაქტების დარღვევას ვერ გაბედავენ, ჩვენ კი მაინც გაგვიუქმეს.

ბრძანებაში აქცენტი ხელშეკრულების მე-4.4 მუხლზეა გაკეთებული, როცა სინამდვილეში ხელშეკრულების შეცვლის საფუძვლები მეექვსე მუხლშია განსაზღვრული. კერძოდ მასში კლუბის ინიციატივით ხელშეკრულების მოშლა ხდება:

1. მწვრთნელის მიერ ხელშეკრულების დარღვევის შემთხვევაში;

2. მწვრთნელის მიერ შიდაგანაწესის დარღვევის შემთხვევაში;

3. კლუბს უფლება აქვს მწვრთნელის სპორტულ-ტექნიკური ოსტატობის დაქვეითების შემთხვევაში შეწყვიტოს კონტრაქტი.

რაც შეეხება მე-4.4 მუხლს, აქ წერია, რომ  კლუბს უფლება აქვს:

მოითხოვოს ხელშეკრულებით ნაკისრი ვალდებულებების ზედმიწევნით შესრულება; მოითხოვოს შესრულებული სამუშაოს ანგარიში; დაექვითოს მწვრთნელს მასზე გაცემული ზედმეტი თანხები;

ხელშეკრულების დარღვევის ან არაჯეროვანი შესრულების შემთხვევაში დაეკისროს ჯარიმა ან შეწყვიტოს ხელშეკრულება.

აი, ის მუხლები, რითაც შეფასდა არაჯეროვნად ჩვენი მუშაობა და თავად განსაჯეთ რამდენად სერიოზული მიდგომაა ამ საკითხისადმი. უფრო მეტიც, გამგებელი თურმე ბავშვთა ფეხბურთში გადასვლას გვთავაზობს, თითქოს უმაღლესი ლიგის კონპეტენცია არ გვყოფნის და ამავე დროს ჩემი ასისტენტის დათხოვნის მიზეზად, თითქოს "გურიის" 15 – 21 წლიანთა გუნდის არასაკმარისი შედეგის მიღწევა სახელდება."

თენგიზ პატარაია – "სასაცილოა ჩემი გათავისუფლების ბრძანება, სადაც იმ გუნდის მოუმზადებლობას მაბრალებენ, რომელთანაც შეხება საერთოდ არ მქონია. ან მსოფლიოში თუ ნახავთ , 15- 21 წლის ასაკობრივი გუნდის არსებობის ანალოგს? ეს ისეთი აბსურდია, საუბარიც კი არ ღირს კლუბში ვინმეს კონპეტენციაზე."

თემურ ლორია – "გამგებელი ამბობდა ფეხბურთით ვცხოვრობ, თამაშებს და ვარჯიშებს არ ვაცდენო, მაგრამ მინდა მას ვკითხო, გაიხსენოს პირველ წრეში თუ შეხვდა საერთოდ ფეხბურთელებს? ერთი ფაქტი მაინც გაიხსენოს. მაშინ უფულო გუნდი გოგი ფაცურიას, კახა ებრალიძეს და საწვრთნელო შტაბს მიაჩეჩა. ფული გამოჩნდა და თვითონაც პრეზიდენტი დაირქვა, ჩვენ კი უკვე აღარ ვჭირდებით.

კლუბში გაბერილი შტატებიაო, რომ გაიძახის, ვინ გაბერა, მე? მე არავინ მიმიყვანია, თვითონ კი. და საერთოდ, თავად კლუბში რა ხდება, იქ ადამიანების ნაწილს გუნდის წაგება რომ უხარია, რაზეა საუბარი. ერთადერთი გუნდი შემოვრჩით, ვისაც შინ წაგება არ გააჩნდა და ამ წაგებას ელოდნენ თურმე, კლუბის მესვეურები.

როცა შესაძლო გარიგებულ თამაშებზე დაიწერა, მივედი და მოვითხოვე კლუბმა ოფიციალური განცხადება გააკეთოს ამ ბრალდებებზე – მეთქი.არადა,  გამგებელთანაც გვქონდა საუბარი, მაგრამ ისე გაატარეს ყველაფერი, ვითომაც არაფერი.