ქალაქ ოზურგეთის მუნიციპალიტეტის საკრებულოს დეპუტატი, ნათია შარაშენიძე, განცხადებას აქვეყნებს და ქალაქ ოზურგეთს მერს ბეგლარ სიორიძეს მიმართავს:
"ქალაქ ოზურგეთის მერს!
ქალაქის სამართავად ძალიან ცუდი და არასწორი გზა აირჩიეთ, დაგავიწყდათ, რომ დროებით ხართ დაქირავებული, თქვენ უნდა ემსახუროთ ქალაქს და არა პირიქით.
არ იკმარეთ ის, რომ 2 ა(ა)იპი გააერთიანეთ და მურთაზ აბაშიძე უსამართლოდ გაათავისუფლეთ სამსახურიდან, ახლა გსურთ, რომ ახალგაზრდებს წაართვათ ახალგაზრდობა და ბავშვობა, ქალაქმა იცის რა თქვენი გაუმაძღარი მადის შესახებ, აქტიურად საუბრობს ხალხი იმასთან დაკავშირებით, რომ თქვენ შენობებს დაადგით თვალი და სხვა შენობების მსგავსად მათაც გაყიდით, სწორედ ამიტომ გსურთ ამ შენობების გამოთავისუფლება.
თქვენთვის ეს ქალაქი ბიზნესის საკეთებელ ადგილად იქცა, შემდეგ ამ ბიზნესის გასამართად და ასაწყობად სხვა ა(ა) იპის თანამშრომლებს იყენებთ, როგორც ეს ამჟამად ბაზრის ტერიტორიაზე ხდება, სადაც საბიუჯეტო თანხებზე მომუშავე ადამიანები მუშაობენ, 21-ე საუკუნეში თქვენ ზუსტად ისე იქცევით როგორც "ბატონი", არადა ბატონყმობა დიდი ხანია გადავარდა, თქვენ კი ამას არ, ან ვერ გრძნობთ და არც იმჩნევთ.
ბოლო თქვენი ახირების შესახებ გავიგე – საბილიარდოს გახსნის სურვილი გაგჩენიათ ქალაქში, რომელიც 49 ათასი ლარი დაჯდება, ეს იმ ქალაქში, სადაც ბავშვები შიმშილობენ, სცივათ, სწყურიათ და ელემენტარული პირობები არ გააჩნიათ, რომ ჯანმრთელები გაიზარდონ. ეს იმ ქალაქში, სადაც უმუშევრობა და სიღარიბე ერთნაირად მძიმედ უტევს გაჭირვებულ ხალხს, თქვენ კი გართობისთვის ათასები, ათიათასები არ გენანებათ, მაშინ როცა გასაცოდავებულ მოქალაქეებს წელიწადში 150 ლარით ეხმარება მერია, თქვენ ადრე თუ გვიან პასუხს მოგთხოვთ ხალხი და სამართალი იმ ყველაფრისთვის, რასაც სჩადიხართ.
ფეხქვეშ გათელეთ ქალაქისა და მისი მაცხოვრებლების ღირსება, ფეხქვეშ გათელეთ და არ გაინტერესებთ არავის არც რჩევა და არც პასუხი, ფეხქვეშ გათელეთ და საკუთარ ბიზნეს ინტერესებს გადააყოლეთ ეს ულამაზესი ქალაქი. პასუხი საჭირო არ არის, შეგიძლიათ ამ სტატუსისთვისაც მიჩივლოთ, სხვა მაინც არაფერი იცით," _ აღნიშნავს შარაშენიძე.
რაც შეეხება მერიის პოზიციას, აქ განმარტავენ, რომ ოზურგეთში ყველაფერი კეთდება ქალაქის საკეთილდღეოდ.
"მიმდინარეობს ზუსტად ის პროცესები, რომელიც ოზურგეთს განვითარებისთვის ესაჭიროება. ის ზღაპრები კი, რომელსაც ნათია შარაშანიძე სისტემატურად ავრცელებს, აღნიშნულ პროცესებს ვერ შეაფერხებს."
