აჭარის ავტონომიური რესპუბლიკის ხელმძღვანელის არჩილ ხაბაძის ფინანსურმა ხარჯებმა, 2014 წელს, 40 ათას ლარს გადააჭარბა, აქედან სესხის დასაფარად მან 16 000-დოლარზე მეტი გადაიხადა.
ამის შესახებ ხაბაძის ქონებრივ დეკლარაციაშია აღნიშნული.
დეკლარაციის მიხედვით ირკვევა, რომ ხაბაძეს თავის სახელზე ორი ბინა აქვს. ბათუმში, ფარნავაზ მეფის ქუჩაზე 81,75 კვადრატული მეტრის ფართობის ბინა საბანკო სესხით 2012 წელს შეიძინა. გარდა ამისა, ხაბაძის საკუთრებაშია კიდევ ერთი ბინა ბათუმში, კობალაძის ქუჩაზე, რომლის ფართობიც 32,60 კვ.მ.-ია.
დეკლარაციის მიხედვით, აჭარის მთავრობის მეთაურს ავტომანქანა ან სხვა უძრავი ქონება არ აქვს.
რაც შეეხება მის შემოსავლებს, 2015 წლის დეკლარაციის მიხედვით, ხაბაძის ოჯახმა წინა წელს საერთო ჯამში 71 617 ლარის შემოსავალი მიიღო.
აქედან ხაბაძის შემოსავალი 68 230 ლარი, ხოლო მისი მეუღლის, თამუნა სირაბიძის შემოსავალი, რომელიც ბათუმის სამოქალაქო რეესტრის მთავარ სპეციალისტად მუშაობს, 13 387 ლარი იყო.
დეკლარაციის შევსების მომენტში, არჩილ ხაბაძის მიმდინარე ანგარიშზე ,,საქართველოს ბანკში" 2 424.88 დოლარი ირიცხებოდა; "ქართუ ბანკის" სახელფასო ანგარიშზე კი, 1547.35 ლარი.
რაც შეეხება ხაბაძის სესხებს, დეკლარაციის მიხედვით, აჭარის ავტონომიური რესპუბლიკის ხელმძღვანელს საერთო ჯამში 100 000 დოლარის იპოთეკური სესხი აქვს აღებული.
ორივე სესხი "საქართველოს ბანკშია" აღებული 70000.00 დოლარი, (ხელშეკრულების მოქმედების ვადა 29/07/2011, 29/07/2011 – 29/07/2021) და 30 000 დოლარის ოდენობით (ხელშეკრულების მოქმედების ვადა 21/02/2012, 21/02/2012 – 18/02/2022).
მხოლოდ ამ სესხების პროცენტის დასაფარად, ხაბაძემ წლის განმავლობაში 16 783 დოლარი გადაიხადა.
გარდა ამისა, ხაბაძეს 2014 წლის ბოლომდე, 11359-ლარიანი კიდევ ერთი სესხი, ოვერდრაფთი (ხელშეკრულების მოქმედების ვადა 24/01/2013, 24/01/2013 – 01/12/2014, სს ბანკი "ქართუ") ჰქონდა აღებული, რის დასაფარადაც მან 6354 ლარი გადაიხადა.
2015 წელს ხაბაძის ოჯახს კიდევ ერთი სოლიდური ხარჯი ჰქონდა, დეკლარაციის გასავლის გრაფაში დაფიქსირებულია, რომ მან სარემონტო სამუშაოებისთვის 5000 ლარი გადაიხადა.
