პრეზიდენტი გიორგი მარგველაშვილი მიიჩნევს, რომ ავლაბრის რეზიდენციიდან ათონელის რეზიდენციაში გადასვლა როგორც ქვეყნის იმიჯის, ასევე პრეზიდენტის ინსტიტუტის იმიჯის შემლახველი იქნებოდა.
_ სულ იმედი მქონდა, რომ ეს მოგვარდებოდა, მაგრამ ბოლო მომენტში, როდესაც დავინახე რომ ეს მიზანიმიმართული პოლიტიკა, ეს იყო 22 თებერვალი, როდესაც ნათლად დავინახე რომ მთავრობამ უარი განაცხადა ჩემს გამოსვლაზე დასწრებაზე.
ეს იყო ჩემთვის სიგნალი, მე მივხვდი, რომ როდესაც დავბრუნდებოდი იქ, სადაც ვმუშაობდი, საპრეზიდენტო უფლებამოსილების განხორციელებას სერიოზული პრობლემა შეექმენებოდა და მე გადავდგი ნაბიჯი, საკმაოდ რთული, მაგრამ ეს გასაკეთებელი იყო და საჩვენებლი იყო, რომ პრეზიდენტს ასე ადგილს ვერ მიუჩენენ.
ამის მერე გადასვლაზე აღარ მიფიქრია. მე რომ ეს გამეკეთებინა, ჩვენ მივიღებდით რთულ ვითარებას. ეს არის საქართელოს იმიჯის დაცვა, პრეზიდენტის იმიჯის დაცვა და მოქალაქეების დაცვა. ჩემი უკან დახევა იქნებოდა საქართველოს სახელმწიფოებრიობის შერყევა, იმიტომ, რომ პრეზიდენტი, რომელიც ყურით დაჰყავთ ერთი ადგილიდან მეორეში, ვერ განახორციელებს იმ ვალდებულებებს, რაც გააჩნია.
ამ თემას აქვს წარსული და ეს არის ჩემი განცხადება, როდესაც მე ვამბობდი, რომ ამ რეზიდენციაში მინდოდა გახსნილიყო უნივერსიტეტი, მშინ ვსაუბრობდი, როგორც განათლების მინისტრი, თუმცა, პრეზიდენტად არჩევის შემდეგ ვითარება შეიცვალა.
შეიცვალა ბევრი თვალსაზრისით, შეიცვალა ის შეთანხმება, რომელიც იყო როგორ მოეწყობოდა დროებითი საცხოვრებელი ფართი, მაგრამ უფრო მნიშვნელოვნად შეიცვალა გარემო, რომელიც ჩემთვის ძალიან უცნაური იყო. ეს მდგომარეობდა იმაში, რომ მე დავინახე რომ ხორციელდებოდა მეთოდური მცდელობა პრეზიდენტის ინსტიტუტის დაკნინების და მისი გადაყვანის უკან პლანზე, _ განაცხადა მარგველაშვილმა "მაესტროს ცხრიანში" სტუმრობისას.
მისივე თქმით ნათქვამი სიტყვის უკან წაღება რთული იყო, მაგრამ სხვა გზა არ ჰქონდა:
_ მე გადავდგი ნაბიჯი, რომელიც რა თქმა უნდა, არ იყო სასიამოვნო, რადგან ერთხეულ უკვე რაღაც ნათქვამი მქონდა და რთული იყო, უკან ნაბიჯის წაღება, მაგრამ ეს გასაკეთებელი იყო და საჩვენებელი იყო, რომ პრეზიდენტს ასე ადგილს ვერ მიუჩენენ.
ამის შემდეგ, ოფიციალურად უარი ვთქვი სხვა რეზიდენციებზე. სხვათა შორის, არა მარტო ათონელზე, არამედ არაერთ რეზიდენციაზე, მათ შორის აჭარაში, ფაქტიურად ყველაზე, გარდა ამ რეზიდენციისა.
ამის მერე, გადასვლაზე აღარასოდეს მიფიქრია მარტივი მიზეზის გამო, რომ ყველამ ნათლად გაიგო, რომ პრეზიდენტს ამ ქვეყანაში მიუჩენენ ადგილს, ეტყვიან, რომ შენ დაჯექი აქ და როდესაც ამას დაუჯერებ, მერე გააკეთებ კიდეც იმას, რასაც გეტყვით. ბუნებრივია, მე ამაზე თანახმა არ ვიყავი, მე რომ ეს გამეკეთებინა, ვფიქრობ, რთულ ვითარებას მივიღებდით. არა მარტო მე, როგორც პოლიტიკური ფიგურა, არამედ ქვეყანა.
წარმოიდგინეთ, თქვენი თავი, როდესაც უცხოეთში მიდიხართ და გეუბნებიან, თქვენ საიდან ხართ? საქართველოდან, სადაც პრეზიდენტს ავტორიტეტულმა პიროვნებამ ადგილი მიუთითა და დასვა სადაც საჭირო იყო?!
ან რა დამოკიდებულება იქნება საერთაშორისო თანამეგობრობის მხრიდან საქართველოს პრეზიდენტთან?! თავი დავანებოთ საერთაშორისო კონტექსტს.
წარმოიდგინეთ, როდესაც თქვენს ქვეყანაში პრეზიდენტს მიუთითებენ ადგილს და ის იქ დაჯდება, თქვენ რომ მიგითითონ ხვალ ადგილი, რა დაგიცავთ თქვენ?!
როდესაც გეტყვიან, იცით, პრეზიდენტიც კარგად გვემორჩილება და სადაც ვეუბნებით, იქ ჯდება, მოდი, შენც შესაბამისად მოიქეცი.
ეს არის პრეზიდენტის იმიჯის დაცვა, ეს არის პრეზიდენტის ინსტიტუტის დაცვა, რომელსაც სამწუხაროდ, რატომღაც დაპირისპირება აქვს გამოცხადებული და ეს არის მოქალაქეების დაცვაც, _ განაცხადა გიორგი მარგველაშვილმა.
მარგველაშვილის თქმით, პრეზიდენტის ინსტიტუტს შესაძლებლობა უნდა მივცეთ, რომ თავისი წარმომადგენლობითი ვალდებულებები ადეკვატურად განახორციელოს:
_ მე ძალიან კარგად ვიცი, ვაჩვენებ, რომ მე არ ვარ აღმასრულებელი ხელისუფლების ხელმძღვანელი, მაგრამ ძალთა ბალანსი და ეს დემოკრატიული სისტემა იმაში მდგომარეობს, რომ ერთ ხელისუფლებას რომ აძლიერებ, პარალელურად, ადეკვატურად ხელისუფლების სხვა ნაწილებიც ძლიერდება. თუ პრეზიდენტი არ არის აღმასრულებელი, მას ბევრად უფრო აქტიური, წარმომადგენლობითი ფუნქცია მიენიჭება.
პრეზიდენტის ინსტიტუტს შესაძლებლობა უნდა მივცეთ, რომ თავისი წარმომადგენლობითი ვალდებულებები ადეკვატურად განახორციელოს და ამ თვალსაზრისით კი არ უნდა შევზღუდოთ, ვთქვათ, რადგან შენ მინისტრებს არ ნიშნავ, ამიტომ შედი ორ ოთახში და იქ ჩუმად დაჯექი, არამედ პირიქით, იმისთვის, რომ ქვეყანა განვითარდეს, ძალთა ბალანსის და დემოკრატიული სტაბილურობის თვალსაზრისით, უნდა მივცეთ შესაძლებლობა ეს განახორციელოს.
ძალიან ნათლად ჩანს ახლა, ჩემი შესაძლო უკან დახევის საშიშროება არ იქნებოდა უბრალოდ ჩემი დისკრედიტაცია, როგორც პოლიტიკური ფიგურის, ან როგორც ადამიანის, ეს იქნებოდა საქართველოს სახელმწიფოებრიობის შერყევა.
რადგან პრეზიდენტი, რომელიც ყურით დაჰყავთ ერთი ადგილიდან მეორე ადგილას, სამწუხაროდ, ვერ განახორციელებს იმ ვალდებულებებს, რომელიც გააჩნია. რა თქმა უნდა, ღია ვარ იმისთვის, რომ ვიყო გაკრიტიკებული, თუმცა, ნამდვილად ვერ გადავდგამ, ნაბიჯს, რომელიც შეურაცხყოფას მომაყენებს, როგორც პიროვნებას და ჩემს ვალდებულებებზე უარს მათქმევინებს და გადამადგმევინებს ნაბიჯს, რომელიც არამარტო ჩემზე, არამედ ყველაზე ნეგატიურად აისახება, _ განაცხადა მარგველაშვილმა.
