(გურია ნიუსი, ლანჩხუთი) _ ლანჩხუთის გამგეობის პრესსამსახურის ინფორმაციით, ლანჩხუთს, სოფლის მეურნეობის მინისტრი ზაზა გოროზია და მინისტრის მოადგილე გიორგი აბულაძე ეწვივნენ, ისინი ლანჩხუთში გურიის სამივე მუნიციპალიტეტის ადგილობრივ ხელმძღვანელობასა და სოფლების რწმუნებულებს შეხვდნენ. შეხვედრას რწმუნებულ-გუბერნატორი ვალერი ჩიტაიშვილი და მოადგილე ლელა თავართქილაძე ესწრებოდნენ.
მინისტრის თქმით, სახელმწიფომ მიიღო გადაწყვეტილება სასოფლო-სამეურნეო სამუშაოებთან დაკავშირებით მოსახლეობისათვის მცირედით გაეწია დახმარება, რისთვისაც თითოეულ ოჯახს 30-ლარიან ვაუჩერს დაურიგებს.
ზაზა გოროზიამ დამსწრეთ ვაუჩერის დარიგების პროცესი გააცნო და შეკითხვებს უპასუხა:
_ თითოეულ მოსახლემდე ვაუჩერი სოფლის რწმუნებულმა უნდა მიიტანოს, ოჯახის რომელიმე წევრს ჩააბაროს, მიღება-ჩაბარების აქტში მისი პირადი ნომერი, სახელი და გვარი დააფიქსიროს. მიღება-ჩაბარების აქტზე დეტალურად უნდა იყოს ნაჩვენები, ვინ მიიღო ვაუჩერი, თუ ვერ დატოვეს სადმე, რატომ ვერ დატოვეს.
გლეხს შეუძლია ვაუჩერი მისცეს ტრაქტორისტს, ან შეიძინოს 30 ლარის ღირებულების სასუქი. იმ შემთხვევაში, თუ ოჯახი არ სარგებლობს მიწით, ის ვაუჩერს “ლიბერთი ბანკში” 2012 წლის პირველი ივნისიდან 31 დეკემბრამდე გაანაღდებს.
თუკი მაინც მოხდა ისე, რომ ვინმე გამორჩა, რწმუნებულმა უნდა შეადგინოს დამატებითი სია და სასწრაფოდ მიაწოდოს სოფლის მეურნეობის სამინისტროს, რათა ოჯახი დროულად დაკმაყოფილდეს სახელმწიფოს დახმარებით, _ თქვა გოროზიამ.
მინისტრის თქმით, აუცილებელია სოფლად მოქმედი სასოფლო-სამეურნეო ტექნიკის (ტრაქტორების) აღწერა, რადგან ვაუჩერის განაღდება მოხდება მხოლოდ იმ მექანიზატორების მიერ, რომლებიც ინდმეწარმეებად არიან დარეგისტრირებულნი: _ ამისათვის ისინი არანაირ გადასახადს არ გადაიხდიან. თუმცა, დაურეგისტრირებელი მექანიზატორები ამ პროგრამაში ვერ ჩაერთვებიან და ვერ გაანაღდებენ ვაუჩერს. “ლიბერთი ბანკს” ექნება დარეგისტრირებული ტრაქტორისტების სია, _ დასძინა გოროზიამ.
