საქართველოს პრეზიდენტის დაბადების დღეს, “ერთიანი ნაციონალური მოძრაობის” ოზურგეთის რაიონული ორგანიზაციის ოფისში ბრიფინგი გაიმართა, რომლის თემა ოზურგეთში პრეზიდენტის ვიზიტი იყო.
ბრიფინგზე “ნაციონალური მოძრაობის” ადგილობრივი ორგანიზაციის ახალდანიშნულმა პრეს-სპიკერმა ლია კილაძემ ვრცლად ისაუბრა პრეზიდენტის ვიზიტის შესახებ. მთავარი კრიტიკა “თავისუფალი დემოკრატების” ერთ-ერთ ლიდერს, თემურ სალუქვაძეს ერგო. ლია კილაძე “თავისუფალი დემოკრატების” ბოლო ბრიფინგსაც გამოეხმაურა, რომელიც პრესაში ჯერაც არ იყო გაშუქებული. მისივე თქმით, მათ სოციალურ ქსელებში ნახეს სალუქვაძის განცხადება.
_ ბოლო პერიოდში გახშირდა პოლიტიკური პარტიების ლიდერების მიმართვები მოსახლეობისადმი, რომლებიც არაფერია, თუ არა პოლიტიკური ოპონენტების, ამ შემთხვევაში მმართველი პარტიისა და ხელისუფლების ძაგება. უარყოფითი ეპითეტების, სალანძღავი სიტყვების დონეზე მოწინააღმდეგესთან პოლემიკა, თუ მას არგუმენტები არ ახლავს, წამგებიანი მეთოდია. მით უფრო, როცა გაგაჩნია ამბიცია, ერუდირებულ აუდიტორიას მიმართო.
სამწუხაროდ, ჩვენ ოპოზიციას მიაჩნია, რომ რაც უფრო მეტად აგრესიული და არაკორექტული იქნება ხელისუფლების მიმართ, უფრო მეტად ენდობა მოსახლეობა. მიგვაჩნია, რომ ეს მცდარი მიდგომაა და ჩვენს საზოგადოებას შეურაცხყოფს.
ხელისუფლების ლანძღვის ახალი ტალღა ოპოზიციაში ბიძინა ივანიშვილის და მისი ფინანსების გამოჩენას უკავშირდება. ჩვენ გვესმის მათი გააქტიურების მიზეზებიც და სავარაუდო გათვლებიც _ ივანიშვილს ბევრი ფული აქვს, მაგრამ ფაქტია, ამ ფულით ბევრს ვერაფერს ყიდულობს. ფინანსები პოლიტიკაში მართლაც მნიშვნელოვანია, მაგრამ უფრო მნიშვნელოვანი სერიოზული და პოლიტიკურ ბატალიებში გამობრძმედილი ადამიანური რესურსის არსებობაა. თანაც, ოპოზიციაში კვალიფიციური ადამიანური რესურსის მოზიდვა მარტო “ყიდვით” შეუძლებელია, საამისოდ არც ყალბ პათეტიკაზე აგებული უარყოფითი ემოციური მუხტის რიტორიკაა საკმარისი.
მხედველობაში გვაქვს “თავისუფალი დემოკრატების” ლიდერის, ბატონი თემურ სალუქვაძის ბოლო პერიოდის განცხადებები, რომელიც თავს იწონებს ისეთი მარგალიტებით, როგორიცაა “უზნეო, უუნარო, უგუნური, სასოწარკვეთილი და ა.შ. ხელისუფლება”. თემურ სალუქვაძემ, იქნებ, გაიხსენოს და გვასწავლოს, თავად როგორ აგვარებდა ოზურგეთის პრობლემებს როცა, როგორც ამბობენ, ბნელი, იარაღიანი ძალების მიერ ხელდასმული გამგებელი გახლდათ? რას დაიკვეხნის თუნდაც ბიზნესში მისი საქმიანობის პერიოდიდან _ გავერანებულ და იავარქმნილ ჩაის ფაბრიკებს, თუ ძმაბიჭებზე გაჩუქებულ საწარმოებს? ამაზე დეტალურ საუბარს არც საკუთარ თავს ვაკადრებთ და არც სხვას, მაგრამ ბუნებრივია, შეგვიძლია, შევახსენოთ საზოგადოებას, რა წარსულის მქონე ადამიანებთან ექნება საქმე ბატონ ივანიშვილს, რომლის კარზე მისწრებას დღეს ერთმანეთს ეცილება გურიის ოპოზიციური სპექტრის დიდი უმრავლესობა. დაე, თავად საზოგადოებამ დაასკვნას, გამოვა თუ არა ასეთი ადამიანებისგან რაიმეზე ოცნება თუ ეს უფრო ბნელი წარსულისკენ მიბრუნება იქნება?
ნაციონალური მოძრაობა არ ჩართულა და არც მომავალში ჩაებმება არაეთიკურ “დებატებში”. თუმცა, ოპოზიციის მიმართ მსგავსი “არგუმენტაციის” გამოყენებისთვის, შესაძლოა, მას მეტი საფუძველი ჰქონდეს. ოპოზიციის დაქსაქსულ რიგებში რომ ყველაფერი რიგზე იყოს, იგი აქამდე მოვიდოდა ხელისუფლებაში და ათასგვარი კოალიციების შექმნისა თუ დაშლის გარეშე, თუნდაც, მინიმალურ რეიტინგს შეინარჩუნებდა და საზოგადოების მხარდაჭერას მოიპოვებდა. თუმცა, საქართველოს პრეზიდენტის ოზურგეთში ვიზიტზე ოპოზიციის გამოხმაურება და განწყობები გვაიძულებს, უკომენტაროდ არ დავტოვოთ მორიგი ეპისტოლარული “გამოხდომა”. ჩვენ ვაცხადებთ, რომ “თავისუფალი დემოკრატების” აღნიშნული განცხადება სხვა არაფერია, თუ არა ოზურგეთელთა შეურაცხყოფა კიდევ ერთი უსაგნო, არაკორექტული და არაეთიკური განცხადებით. ეს გახლავთ ურთიერთშორის სიძულვილის გაღვივების მცდელობა, ეს სარისკო თამაშია საზოგადოების ხარჯზე. ბატონ თემურს კარგად უნდა ახსოვდეს ასეთი პოლიტიკის მძიმე შედეგი.
რამდენად უნდა იყო რეალობას მოწყვეტილი ადამიანი თუ ადამიანთა ჯგუფი, რომ უმაღლესი დონის ახალი კლინიკის გახსნას აპროტესტებდე; რას და რამდენს უნდა გიხდიდნენ იმის სანაცვლოდ, რომ საკუთარი თანამოქალაქეები, ახლობლები, ნათესავები ერთი ადგილიდან მეორეზე “გადასარეკ ფარას” შეადარო და მერე სხვა დაამუნათო საზოგადოების შეურაცხყოფისათვის; როგორ არ უნდა გახარებდეს შენი მხარის, ქალაქის წარმატება, რომ მისი განვითარებისთვის შექმნილი გურიის საპრეზიდენტო ფონდი ნეგატიურად შეაფასო და ამ ყველაფერში საფრთხეები დაინახო?
აქ მხოლოდ ერთი საფრთხე შეიძლება, არსებობდეს და იგი სწორედაც რომ ჩვენი ოპოზიციის აუხდენელ ქართულ ოცნებას ემუქრება. ოზურგეთში პრეზიდენტის შესახვედრად ათასობით ადამიანის გამოსვლამ, მათგან წამოსულმა დადებითმა მუხტმა, როგორც ჩანს, შოკში ჩააგდო ჩვენი ოპონენტები. მათ რეალურად დაინახეს ერთი რამ _ ჩვენი საზოგადოება სწორად აფასებს ქვეყანაში მიმდინარე პროცესებს და მხარს უჭერს უკვე აღებულ კურსს. ამ ვითარებაში კი ოპოზიციას თავისი “ქართული ოცნება” როგორც პირდაპირი, ისე გადატანითი მნიშვნელობით, ხელში შემოადნა და მხოლოდ რიტორიკის და “დუეტების” შესრულებით შეძახილების ანაბარაღა დარჩა.
ქვეყანაში არსებობს პრობლემები. ხელისუფლება ამაზე თვითონ ლაპარაკობს და გვთავაზობს მათი მოგვარების გზებს. ამისთვის ეწყობა მოსახლეობასთან შეხვედრები, ფინანსდება პროგრამები. ყოველ წელიწადს იზრდება ბიუჯეტი და შესაბამისად, პრობლემათა დაძლევის საშუალებებიც.
რაც არ უნდა ჯიუტად არ გვინდოდეს ამის აღიარება, ფაქტები თავად ადასტურებენ, რომ არსებობს პროგრესი ქვეყნის ეკონომიკურ, სამართლებრივ სფეროში, საშინაო და საგარეო იმიჯი გაუმჯობესებულია.
ხელისუფლება დაშვებულ შეცდომებზე სწავლობს და ამას მოსახლეობაც ხედავს.
“ნაციონალური მოძრაობის” ოზურგეთის ოფისი ეთანხმება ოპონენტებს, რომ არსებობს პრობლემათა ნუსხა, მაგრამ ვერ დავეთანხმებით ვერავის, რომ ამ პრობლემებს მოაგვარებს ბრიფინგები ხელისუფლებისადმი ულტიმატუმებით და სალანძღავი სიტყვებით.
საქართველოს ბოლო პერიოდის, დამოუკიდებლობის 20-წლიანი უახლესი ისტორიის ყველაზე მძიმე მოვლენები სწორედ ემოციური პოლიტიკის შედეგია. ჩვენ გთავაზობთ ურთიერთპატივისცემის და არგუმენტების პოლიტიკას. მოსახლეობას ეყოფა სიბრძნეც და გამბედაობაც, რომ მიიღოს რაციონალური გადაწყვეტილებები, _ თქვა ლია კილაძემ.
