“განსაკუთრებული ყურადღება უნდა მიექცეს საპროცესო გარიგების პროცედურას, რომელიც სისხლის სამართლის საქმეებში ძალზე ფართოდ გამოიყენება საქართველოში. რამდენიმე ფაქტორის ერთობლიობას, კერძოდ, პატიმრობის ძალზე მაღალ მაჩვენებელს, მკაცრი სასჯელების პოლიტიკასა და მართლმსაჯულების აღსრულების მიმართ მოსახლეობის დაბალ ნდობას, ნამდვილად შეუძლია ზეგავლენა მოახდინოს ბრალდებულზე და მან, უდანაშაულობის შემთხვევაშიც კი, ბრალი აღიაროს, რაც მართლმსაჯულების სამართლიანობის პრინციპის დარღვევას გამოიწვევს… ბოლო რამდენიმე წლის განმავლობაში, სისხლის სამართლის სფეროში აღინიშნებოდა გამამართლებელი განაჩენების განსაკუთრებით დაბალი მაჩვენებელი. ოფიციალური მონაცემებით 2010 წლისთვის გამამართლებელი განაჩენების საშუალო მაჩვენებელი პირველი ინსტანციის სასამართლოებში იყო 0.2%, ხოლო პირველი ინსტანციის თბილისის საქალაქო სასამართლოში გამამართლებელი განაჩენების მაჩვენებელი კიდევ უფრო დაბალი _ 0.04% იყო”, _ ეს სიტყვები ევროპის საბჭოს ადამიანის უფლებების კომისარს თომას ჰამარბერგს ეკუთვნის. კომისართან შეხვედრებისას, საქართველოს ხელისუფლების წარმომადგენლებმა აღნიშნეს, რომ გამამართლებელი განაჩენების დაბალი მაჩვენებელი იმით აიხსნება, რომ პროკურორები სასამართლოს კარგად დასაბუთებულ და კარგად მომზადებულ საქმეებს წარუდგენდნენ.
კომისარი სთხოვს ხელისუფლებას, “ფრთხილად მოეკიდოს იმ გაზრდილ უფლებამოსილებას, რომელსაც პროკურატურა საპროცესო შეთანხმებაზე მოლაპარაკებების პროცესში ახორციელებს.”
სამთვიანი დაძაბული მოლაპარაკებების შემდეგ, ოზურგეთის ყოფილ გამგებელს გიორგი ტაკიძესა და პროკურატურას შორის საპროცესო გარიგება შედგა.
22 დეკემბერს გამართულ სასამართლო სხდომაზე ტაკიძემ ბრალი სრულად აღიარა და 2011 წლის მიწურულს, საპროცესო გარიგებების გრძელ ნუსხას კიდევ ერთი საქმე შეემატა.
ბოლო პროცესი ერთადერთი გამონაკლისი იყო, რომელზეც გიორგი ტაკიძემ განცხადება გააკეთა. მანამდე იგი დუმილის უფლებას ინარჩუნებდა. მას შემდეგ, რაც მოსამართლემ ლელა ნოზაძემ ჰკითხა, რა გარემოებაში დათანხმდა ის საპროცესო გარიგებას, ხომ არ იყო მასზე რაიმე სახის ზეწოლა ან შანტაჟი, ტაკიძემ უპასუხა: “შუამდგომლობას ვეთანხმები და ვაცხადებ, რომ ნებაყოფლობით დავთანხმდი საპროცესო გარიგებას, ჩემს მიმართ რაიმე ზეწოლას, იძულებას ან შანტაჟს ადგილი არ ჰქონია.”
ოზურგეთის მუნიციპალიტეტის გამგებელი გიორგი ტაკიძე, საქართველოს მთავარი პროკურატურის ანტიკორუფციული დეპარტამენტის თანამშრომლებმა საკუთარ სახლში, 4 აგვისტოს, დილის საათებში აიყვანეს. ოფიციალური ინფორმაციით, მას დიდი ოდენობით ქრთამის აღება და 180 000 ლარის მითვისებაში თანამონაწილეობა ედება ბრალად. ქრთამის მიღების სანაცვლო, როგორც ამას დასუფთავების სამსახურის ყოფილი ხელმძღვანელი, მერაბ კურდღელაშვილი აღიარებით ჩვენებაში ამბობს, 1 100 000 ლარის მომსახურების შესყიდვაზე ხელშეკრულების გაფორმების ლობირება იყო. ამ ყველაფრის გათვალისწინებით, გიორგი ტაკიძეს ბრალი 338-ე მუხლით წაუყენეს.
22 დეკემბერს გამართულ სხდომაზე კი მან აღიარა დიდი ოდენობით ქრთამის აღება.
მიუხედავად ამ აღიარებითი ჩვენებისა, პროკურატურა მის მიმართ არც ისე ლოიალური აღმოჩნდა _ ყოფილ გამგებელს სასჯელის ზომად 2 წელი და 6 თვე შეეფარდა, საპროცესო შეთანხმების თანხად კი 25 000 ლარი განესაზღვრა
რაც შეეხება დასუფთავების სამსახურის ყოფილ ხელმძღვანელს, მერაბ კურდღელაშვილს, ის გაცილებით პრიორიტეტულ მდგომარეობაში აღმოჩნდა _ 1 წელი პირობითი და 5 000 ლარი საპროცესოს სანაცვლოდ.
როგორც ჩანს, ამ გადაწყვეტილების შესახებ წინასწარ იცოდნენ ტაკიძის ოჯახის წევრებმა, რადგან დაძაბულობა პროცესის დაწყებამდეც შეიმჩნეოდა. სხდომის დაწყებამდე გიორგი ტაკიძის დედა რამდენჯერმე გახდა ცუდად. არანაკლებ მძიმე მდგომარეობაში იმყოფებოდა ტაკიძის მეუღლეც.
მერაბ კურდღელაშვილის გამოჩენისთანავე სიტუაცია კიდევ უფრო დაიძაბა და ტაკიძის ახლობლებისკენ ზურგით მდგომ კურდღელაშვილს არაერთი რეპლიკის მოსმენა მოუხდა:
“მე მოძღვარს შევპირდი, რომ შეგინდობდი და ჩემგან შენდობილი გაქვს ეგ ცოდვა, იცოდე. შეგინდე და გაპატიე ჩემი შვილის ამ დღეში ჩაგდება. შენ როგორ დადიხარ მაგხელა ცოდვით, თორემ, ჩემს შვილს რა უჭირს, იქედანაც კაცად გამოვა…” _ ტაკიძის დედის ამ სიტყვების გაგონებამ კურდღელაშვილი ისე ძალიან გაანერვიულა, რომ ადვოკატს სთხოვა, სასწრაფოდ გაერიდებინა იქაურობისთვის.
უკვე დარბაზში შესულ ტაკიძის ოჯახის წევრებსაც არაერთი გაფრთხილება მისცა მოსამართლემ იმასთან დაკავშირებით, რომ თავშეუკავებლობის ან ზედმეტი ემოციურობის შემთხვევაში, იქაურობას დაატოვებინებდნენ.
კურდღელაშვილისთვის დაკისრებული მცირედი თანხა და სასჯელი რომ მის პროკურატურასთან აქტიურ თანამშრომლობას უკავშირდებოდა, ეს ყველასთვის ნათელი იყო. მაგრამ მოსამართლისთვისაც კი გაუგებარი აღმოჩნდა პროკურორის გადაწყვეტილება კურდღელაშვილთან დაკავშირებით, როდესაც აღმოაჩინა, რომ პროკურორი მისთვის საქმიანობის უფლების ჩამორთმევასაც კი არ აპირებდა.
“ბატონო პროკურორო, 182-ე მუხლი, რომელიც კურდღელაშვილს აქვს ბრალად წაყენებული, ამავე დროს ითვალისწინებს საქმიანობის უფლების ჩამორთმევას და არ ჩამოართმევთ საქმიანობის უფლებას?” _ გაოცებული სახით ჰკითხა მოსამართლემ პროკურორს. პროკურორმა, თავისი პასუხი მხოლოდ თავის გადაქნევით ანიშნა, არაო.
მიუხედავად უდიდესი გაოცებისა, მოსამართლე აღარ ჩაძიებია პროკურორს და სხდომა დახურულად გამოაცხადა.
პირველი, ვინც სხდომიდან სწრაფი ნაბიჯებით გამოვიდა და ფაქტობრივად, სირბილით ჩაირბინა კიბეები, სწორედ კურდღელაშვილი იყო. იმდენად ჩქარობდა ტაკიძის ახლობლებისგან გაცლას, რომ საბუთზე ხელის მოწერაც კი დაავიწყდა. სწორედ მაშინ შეხვდა ის ტაკიძის დედას პირისპირ, როდესაც ადვოკატმა სასამართლოს ეზოდან უკან მოაბრუნა.
“არც კი შეგრცხვეს, არ შეგაწუხოს ნამუსმა და კაცობამ, ისე ჩამიარე გვერდით! ჩემზე დაწერეს, თითქოს მე გცემე, ნეტავ მართლა მეცემე! როგორ აპირებ ცხოვრებას ამხელა ცოდვით?” _ ასეთი სიტყვებით მიმართა ტაკიძის დედამ კურდღელაშვილს.
გიორგი ტაკიძის ოჯახისთვის საკმაოდ მოულოდნელი აღმოჩნდა ის გადაწყვეტილება, რაც ამდენხნიანი მოლაპარაკებების შემდეგ მიიღო პროკურატურამ. ისინი ერთწლიან სასჯელს ელოდებოდნენ და ვარაუდობდნენ, რომ ბრალის მთლიანად აღიარების შემდეგ, პროკურატურა ამ პირობას აუცილებლად გაითვალისწინებდა.
ამ შედეგით არც ისე კმაყოფილი ჩანდა გიორგი ტაკიძის ადვოკატი მირდატ ქამადაძეც. ის წინა სხდომებზე “გურია ნიუსთან” საუბრისას აცხადებდა, რომ პროცესი ამდენი ხანი იმიტომ იწელებოდა, პროკურატურასთან საუკეთესო პირობებზე რომ შეჯერებულიყვნენ.
_ ბატონო მირდატ, კმაყოფილი ხარ დღევანდელი პროცესით _ საპროცესო გარიგების იმ პირობით, რაზეც ხელი მოაწერეთ?
_ უკმაყოფილო არ ვარ, მაგრამ შეიძლებოდა უფრო უკეთესი პირობებიც გვქონოდა. თუმცა, მოსალოდნელ სასჯელთან შედარებით, ეს საუკეთესო გამოსავალია.
_ უკეთეს პირობებს რაც შეეხება, კურდღელაშვილს ჰქონდა თქვენზე ბევრად უკეთესი და რატომ აღმოჩნდით ასეთ არათანაბარ პოზიციაში?
_ ჯერ ერთი, იმიტომ, რომ კურდღელაშვილს სხვა მუხლი ჰქონდა, ჩვენ _ სხვა და მეორეც, მშვენივრად იცით, რომ კურდღელაშვილმა ითანამშრომლა პროკურატურასთან საკმაოდ მაღალი ხარისხით და ტაკიძის წინააღმდეგ ჩვენებაც მან მისცა.
_ როგორც კურდღელაშვილის ადვოკატმა გაგვიცხადა წინა პროცესზე, მისი დაცვის ქვეშ მყოფს ციხეში მოასმენინეს აუდიოჩანაწერი, რის შემდეგაც არანაირ უარყოფას აზრი აღარ ჰქონდა. ტაკიძემაც ამ ჩანაწერის მოსმენის შემდეგ ხომ არ გადაწყვიტა ყველაფრის აღიარება? იქნებ ახლა მაინც გვითხრათ, რა ჩანაწერზეა საუბარი.
_ სამწუხაროდ, ვერანაირი ჩანაწერის შესახებ ვერაფერს გეტყვით, რადგან მისი გამოკვლევა არ მომხდარა. საქმე საპროცესო გარიგებით დასრულდა და რადგან არსებით განხილვაზე არ გადავსულვართ, არც მტკიცებულებების სასამართლო მოკვლევა მომხდარა.
_ რით ახსნით იმ ფაქტს, რომ პროკურორმა კურდღელაშვილისთვის საქმიანობის უფლების ჩამორთმევაც კი არ მოითხოვა? სსკ-ს 182-ე მუხლი პირდაპირ ითვალისწინებს ამას.
_ გასაგებია, რომ კანონი ითვალისწინებს, მაგრამ რადგან აქ საქმე გვქონდა მორიგებასთან, ეს პროკურორის გადასაწყვეტი იყო უკვე და როგორც ჩანს, მასე გადაწყვიტა.
სისხლის სამართლის საქმეთა განხილვის სტატისტიკური მონაცემების მიხედვით, 2010 წელს 16 641 საქმიდან 13 345 საპროცესო გარიგებით არის დასრულებული. გამამართლებელი განაჩენი კი, მხოლოდ 7 პირზეა დამდგარი. არც ეს წელია გამონაკლისი და ამ წლის ზუსტ სტატისტიკას მხოლოდ იმიტომ არ ვასახელებთ, რომ წლის ბოლომდე ის აუცილებლად შეივსება ახალ-ახალი საპროცესო გარიგებებით.
