(გურია ნიუსი, ლანჩხუთი) _ “შედიხარ თუ არა საავადმყოფოში, ვაჭრობას გიწყებენ _ პოლისი გაქვს? ფული გაქვს? ჯანმრთელი ბავშვი 5 წუთში მოგვიკლეს. ჟანგბადით გაგუდეს, ყავის დასალევად იყვნენ გასულები, რეანიმაციაში 2 ბავშვი ჰყავდათ და ესენი ყავას სვამდნენ, ალბათ, სერიალსაც უყურებდნენ და დაავიწყდათ აპარატზე შეერთებული პაციენტები… გვერდით იყო ის საწყალი 12 წლის ბიჭი, ისიც დაიღუპა მეორე დღეს. ჩვენი ბავშვი რომ დაგვეღუპა და ავტეხეთ კივილი, იმ საწყალმა ბავშვმა თავად მოიხსნა ჟანგბადი… ეს საავადმყოფო დასახურია!” _ ამბობენ გარდაცვლილი ბავშვის ოჯახის წევრები.
ლანჩხუთის მიხეილ ჩაჩავას სახელობის სამედიცინო ცენტრში ორი დღის მანძილზე 2 ბავშვი გარდაიცვალა. 6 თვის ჩვილის ახლობლები მედპერსონალს ადანაშაულებენ _ მათ საავადმყოფოს მინები დალეწეს. ვითარება იმდენად რთული იყო, პოლიციის ჩარევა გახდა საჭირო. ეს წელს პირველი შემთხვევა არ არის, როცა ცენტრს ადამიანის დაღუპვაში ადანაშაულებენ _ გია ორაგველიძის გარდაცვალებაში ოჯახმა ხელი მთავარ ქირურგს დაადო. ამის შემდეგ ექიმმა საავადმყოფო დატოვა. სხვათა შორის, საავადმყოფო მანამდე პროფესიონალმა ექიმებმა დატოვეს, მათ შორის პროფესორმა მალხაზ მირცხულავამ _ მიზეზი საავადმყოფოში შესული ახალი კომპანიის “ადიტტის” პოლიტიკა გახდა, რომელმაც მომსახურების ფასები გაზარდა, ხოლო მედპერსონალს მიზერულ ანაზღაურებაზე მუშაობა განუსაზღვრა.
“საავადმყოფოში მოყვანამდე მშობლებმა პატარა უბნის ექიმს აჩვენეს, რომელმაც მათ ურჩია, რომ ბავშვი საავადმყოფოში მიეყვანა. მეორე დღეს, 15 საათისთვის მოიყვანეს საავადმყოფოში, მისი მდგომარეობა საშუალო სიმძიმის გახლდათ. ბავშვის მკურნალი ექიმი ნონა მურვანიძე გახლდათ, ჩაუტარდა შესაბამისი პროცედურები. პატარას რაიმე საგანგაშო მდგომარეობა არ ჰქონია. დაახლოებით 9-ის წუთებისთვის პაციენტი, სამწუხაროდ, გარდაიცვალა. თუ რა გახდა გარდაცვალების მიზეზი, ამაზე ვერაფერს გეტყვით, რადგან ექსპერტიზის დასკვნას ველოდებით. სწორედ ამის შემდეგ შეგვეძლება საუბარი იმაზე, თუ რა გახდა პატარას გარდაცვალების მიზეზი,” _ გვითხრა წინა კომენტარისას სამედიცინო ცენტრის დირექტორმა თინათინ გოგუაძემ.
აი, რას ამბობენ გარდაცვლილი პატარას ბებია-ბაბუა _ ბიძინა და ნანა ქურიძეები: _ თურმე ამბობენ, უბნის ექიმმა გამოუშვა და ესენი 2 დღით გვიან მოვიდნენო. ესაა ტყუილი, რომელმა ექიმმა გამოგვიშვა საავადმყოფოში? ან გოგუაძე რომ აკეთებს კომენტარებს, სად იყო იქ გოგუაძე? ვინც იყო, რა გაგვიკეთეს? დაგვაქციეს და დაგვანგრიეს, გაზრდილი ბავშვი მოგვიკლეს… თავს იმართლებენ ახლა… ბავშვი აცრაზე მივიყვანეთ უბნის ექიმთან ქეთევან ლიპარტელიანთან, რომელმაც გამოუწერა ხველის წამლები და აცრა გადადო, დავაკვირდეთო. როცა გართულდა მდგომარეობა, დავურეკეთ და გვითხრა _ მე თბილისში ვარ, საავადმყოფოში მიიყვანეთ და დამირეკეთ, რა გითხრანო. მივიყვანეთ საავადმყოფოში. მკურნალი ექიმი იყო ნონა მურვანიძე, მან ჩაუტარა პროცედურები, ბავშვი მომჯობინდა. როცა ჟანგბადზე პირველად შეაერთეს და ექთანი გარეთ გამოვიდა, მურვანიძემ უთხრა _ ერთი წუთით ყურადღება არ მოადუნოო. საღამოს, როცა ექიმი სახლში წავიდა, ბავშვი ისევ შეაერთეს აპარატზე. ექთანი გავიდა, ვიღაცამ დაუძახა ყავაზე… ეტყობა სერიალსაც შეხედა, გაილაპარაკ-გამოილაპარაკა, ამ დროს რეანიმაციაში ჰყავდათ 2 მძიმე ავადმყოფი. 2-3 წუთმა გადაწყვიტა ბავშვის ბედი… მე რა ვიცოდი, რა ჭირდა ბავშვს, თურმე, ზედმეტი მოუვიდა ჟანგბადი და ფილტვები გაუხეთქეს. ასე მომიკლეს ბავშვი, ჯანმრთელი ბავშვი, ერთხელ რომ ავად არ გვყოლია…
_ დაღუპვის მიზეზი ექსპერტიზამ დაადგინა თუ ეს თქვენი ვარაუდია?
_ რად მინდა ექსპერტი? სხვას რას იტყვის ექსპერტი, იქ არ ვიყავით? ჩემი თვალით არ დავინახე, უყურადღებობით რომ მომიკლეს ბავშვი? გვერდით იყო ის საწყალი 12 წლის ბიჭი, ისიც დაიღუპა მეორე დღეს. ჩვენი ბავშვი რომ დაგვეღუპა და ავტეხეთ კივილი, იმ საწყალმა ბავშვმა თავად მოიხსნა ჟანგბადი… ეს საავადმყოფო დასახურია! შედიხარ თუ არა, მიდის ვაჭრობა _ ფული გაქვს? პოლისი გაქვს? ფულზე არ ვლაპარაკობდით, ყველაფერს გავყიდდით, მაგრამ მაგათმა ყავამ და უყურადღებობამ დამღუპა. ნონა მურვანიძეც დაღუპეს, მან ბავშვი გამოიყვანა მდგომარეობიდან, მაგრამ მისი მაინც უკმაყოფილო ვარ _ ქუთაისში გადავიყვან-მეთქი, ჩემივე ხარჯებით, მაგრამ არ სჭირდებაო. აი, თუ არ სჭირდებოდა! ნორმალური ექიმები გაუშვეს და ახლა მხოლოდ ფულის შოვნაზე არიან გადასულები. გია ორაგველიძის დაღუპვა ვისაც ბრალდებოდა, ის ექიმი აქედან ხომ გაუშვეს, ქუთაისში არ შემხვდა საავადმყოფოში?! ესაა სამართალი? ჩვენ აწი არაფერი გვშველის, მაგრამ სხვა რომ არ ჩავარდეს ასეთ დღეში, ამისთვის ვიბრძვი, ბოლომდე მივიყვანთ ამ საქმეს… “იავნანამ” სახლი უყიდაო, რომ ამბობენ, თავად რა გაგვიკეთეს 9-შვილიან ოჯახს? ამ 8 წელიწადში გამგეობა ერთხელ არ დაგვხმარებია… შევარდნაძის დროს ლანძღავენ და მაშინ იმდენ საკვებს გვაძლევდნენ, იქით ვურიგებდით სხვებს. ახლა არც სოციალურ და არც მრავალშვილიანის დახმარებას არ ვიღებ. სოციალური იცით, რატომ მომიხსნეს? თურქეთში დავდივარ თურმე სამუშაოდ! თურქეთი კი არა, სულ არ მეუხერხულება იმის თქმა, რომ ბათუმიც კი არ ვიცი, სად არის! 9 შვილის დედას თურქეთში წასასვლელად სცალია? ახლა იმისაც მეშინია, შვილებმა შურისძიების მიზნით რამე უბედურება არ ქნან, ისინიც სამწყემსავი გამიხდა. ჩემი ოჯახის უბედურებას არავის შევარჩენ! გამოძიება დაწყებულია და ბოლომდე მივყვებით!
_ ამჟამად რა ხდება გამოძიების კუთხით?
_ იკვლევენ, ექსპერტიზის პასუხს ელოდებიან. კიდევ ერთხელ ვამბობ, ჩემთვის წინასწარვე ნათელია ეს დასკვნა! მე ვიყავი იქ და მე ვიცი, რაც მოხდა. ჩვენება მე და ჩემმა მეუღლემ უკვე მივეცით, ასევე ბავშვის მშობლებმა. დღესაც დაბარებული ვართ. კატეგორიულად ვაცხადებ, ბოლომდე მივყვები ამ საქმეს. ექიმებით დაწყებული, სანიტრით დამთავრებული ყველა პასუხს აგებს; ვიცი, სანიტარს არ დაიჭერენ, მაგრამ ხალხმა გაიგოს _ ვისთან აქვთ საქმე, როცა საავადმყოფოში მოხვდებიან!
ლანჩხუთის გამგეობა წაყენებულ ბრალდებას, რომ მრავალშვილიან ოჯახს არ დახმარებია, უარყოფს. “გაცნობებთ, რომ ნანა ქურიძე 2007, 2008, 2009 და 2010 წლებში მუნიციპალიტეტის გამგეობის სოციალური დახმარების პროგრამით ყოველთვიურად იღებდა მრავალშვილიანების (ერთ ბავშვზე 25 ლარი) დახმარებას. რაც შეეხება სოციალური დახმარების მიღებას, აღნიშნული საკითხი სოციალური მომსახურებისა და სუბსიდირების სააგენტოს პრეროგატივაა,” _ აღნიშნულია საზოგადოებასთან ურთიერთობისა და ინფორმაციის სამსახურის მიერ გაკეთებულ კომენტარში.
ჩვენ ნანა ქურიძეს ისევ დავუკავშირდით და გამგეობის განცხადება გავაცანით, რაზეც გვიპასუხეს, რომ “მრავალშვილიანის დახმარებას ისინი გამგეობის დახმარებად არ თვლიან, რადგან ასე ყველა მრავალშვილიანს ეხმარებოდნენ”.
მიხეილ ჩაჩავას სამედიცინო ცენტრში ექსპერტიზის დასკვნამდე კომენტარის გაკეთებისგან თავს იკავებენ და მხოლოდ ეს გვითხრეს: “უპირველესად, ვწუხვართ ბავშვის დაღუპვის გამო. თუ რა გახდა უეცარი გარდაცვალების მიზეზი, ამას ექსპერტიზა დაადგენს. მანამდე კი შეგვიძლია განვაცხადოთ, რომ მედპერსონალის მხრიდან ყველაფერი იყო გაკეთებული. იმ დღეს იმდენი მძიმე ავადმყოფი შემოგვივიდა, რომ პერსონალს ყავის დასალევად ნამდვილად არ ეცალა! ამას პაციენტთა ახლობლებიც დაადასტურებენ. ვერც სერიალს უყურებდა ვინმე, რადგან ტელევიზორიც არ დგას. გვესმის ოჯახის მდგომარეობაც, მაგრამ უყურადღებო დამოკიდებულებაში ჩვენი დადანაშაულება არ არის სწორი…”
