ჩოხატაურის მუნიციპალიტეტის გამგებელი ირაკლი კუჭავა ე. წ. "ბაღების სკანდალის" თემას წერილობით ეხმაურება:
"შპს "შემოქმედმშენის" მიერ საბავშვო ბაღებში ჩატარებული სარეაბილიტაციო სამუშაოებთან დაკავშირებით კიდევ ერთხელ გვინდა მკითხველს შევახსენოთ: როდესაც გაჩნდა ეჭვი სამუშაოების ხარისხსა და მოცულობაზე, ჩვენს მიერ მოწვეული იქნა სამხარაულის სახელობის ექსპერტიზის ეროვნული ბიუროს წარმომადგენლები. "გურია ნიუსში" გამოქვეყნებული სტატიით ასევე დაინტერესდა ფინანსთა სამინისტროს საგამოძიებო დეპარტამენტის აჭარა-გურიის სამმართველო და დაიწყო გამოძიება. გამოძიებასთან თანამშრომლობდა გამგეობის ინსპექტირების ჯგუფი.
გამოძიების შედეგად, მიმდინარე წლის 17 აპრილს, მუნიციპალიტეტის გამგეობა დაზარალებულად იქნა ცნობილი. გამოვლინდა კონკრეტული დარღვევები, კერძოდ, სოფელ სამებაში საბავშვო ბაღისთვის განკუთვნილ შენობაში იატაკი არ იყო მოხვეწილი. სოფელ იანეულის საბავშვო ბაღში კანალიზაციას აკლდა მარტივი ტიპის სალექარი. შენობების სახურავების საწვიმარი ღარების სიგრძე არ შეესაბამებოდა საპროექტო მონაცემებს. სულ ხუთივე ობიექტზე, რომლის სატენდერო გამარჯვებული ფასი შეადგენდა 181 112 ლარს ექსპერტიზამ 5100 ლარის ღირებულების შეუსრულებელი სამუშაოების მოცულობა დათვალა.
რაც შეეხება, დაზარალებულად ცნობის დადგენილების მიხედვით აღნიშნულ, დამატებით, 12 398 ლარს, გამოძიების თანახმად, ეს არის გადასახადების დამალვის შედეგად მიყენებული ზარალი, რომელთანაც გამგეობის ინსპექტირების ჯგუფს შეხება ვერ ექნებოდა, ისევე როგორც გამოცდილების დამადასტურებელ ყალბ დოკუმენტებთან.
კიდევ ერთხელ ვადასტურებთ, რომ ინსპექტირების ჯგუფის შემადგენლობა გადახალისდება. ამ პროცესის გაჭიანურება გამოიწვია ერთი დაუმთავრებელი ობიექტის არსებობამ, რომლის ჩაბარებისთანავე ახალი კომისია "სუფთა ფურცლიდან" დაიწყებს საქმიანობას.
დაბეჯითებით გთხოვთ, გამოაქვეყნოთ ფოტო, რომელზედაც ზუსტად ის ადგილი არის აღბეჭდილი, სადაც სტატიაში გამოყენებული ფოტოა გადაღებული, იმის გათვალისწინებით, რომ ჩვენ დამატებით მოვახდინეთ სუბსიდირება და იანეულის საბავშვო ბაღში მდგომარეობა რადიკალურად შევცვალეთ. წელს სამებისა და ამაღლების საბავშვო ბაღებსაც დავასრულებთ და სიამოვნებით მოგიწვევთ გახსნაზე" _ მოგვწერა კუჭავამ და ფოტოც გამოგვიგზავნა.
სტატიის ავტორისგან: მკითხველს შევახსენებთ, რომ სამუშაოებზე რეაგირება მას შემდეგ მოხდა, რაც "გურია ნიუსმა" ჟურნალისტური მოკვლევა ჩაატარა და საზოგადოებას საბავშვო ბაღების "რეაბილიტაციის" ფაქტები მიაწოდა. მანამდე, რატომღაც გამგებლის მიერ ხსენებული ეჭვი არც ინსპექტირების ჯგუფს გასჩენია და არც საკრებულოს იმ წევრებს, რომლებმაც ე. წ. "რეაბილიტირებული ბაღები მოინახულეს და კარგი დასკვნა დადეს.
გამგებელი კიდევ ერთხელ გვპირდება, რომ ინსპექტირების ჯგუფის გადახალისდება, თუმცა, ამ ჯგუფის გადახალისება, რომლის ხელმძღვანელის თქმით, "ჩოხატაურში საქმის სხვანაირად კეთება არ იციან", ირაკლი კუჭავას, მისივე ინტერვიუს თანახმად, ჩვენი ჟურნალისტური გამოძიების გამოქვეყნებამდე ჰქონდა გადაწყვეტილი.
რაც შეეხება გამგებლის მიერ მოწოდებულ ფოტოს, მასზე გამოსახული საპირფარეშო მას შემდეგ გარემონტდა, რაც "გურია ნიუსში" შესაბამისი სტატია გამოქვეყნდა.
ნატო გოგელია
გამგებლის მიერ მოწოდებულ ფოტოზე გამოსახული საპირფარეშო მას შემდეგ გარემონტდა,
რაც "გურია ნიუსში" შესაბამისი სტატია გამოქვეყნდა
