დღეს ოზურგეთის მუნიციპალიტეტის საკრებულოს ბიუროს სხდომა შედგა, სადაც დღის წესრიგით გათვალისწინებული ხუთი საკითხის შესახებ მოისმინეს. ხანმოკლე კამათის შემდეგ, ბიუროს წევრები შეჯერდნენ თითოეული საკითხის ირგვლივ და ხმა მისცეს საკრებულოს მომავალ სხდომაზე განსახილველად.
რაც შეეხება დეპუტატების, ნანული ორაგველიძის, ნინო ტაბატაძის და ნინო გოგუაძის მიერ წარდგენილ განცხადებას საკრებულოში, რომლებიც მრავალჯერ შეურაცხყოფის გამო, დეპუტატ გოჩა ძიმისტარაშვილის ეთიკის კომისიის თავმჯდომარეობიდან გადაყენებას ითხოვდნენ, საკრებულოს თავმჯდომარე გელაკობალაძემ საკუთარი აზრის გამოთქმა სთხოვა ბიუროს წევრებს. გოჩა ძიმისტარაშვილმა ნანული ორაგველიძეს მიმართა:
"თქვენ ხართ პოლიტიკური გვამი, ასაკში ხართ… სულის გადასარჩენად უნდა ილოცოთ… გაიყიდეთ…"
ორაგველიძემ უპასუხა, რომ ამის გამო სასამართლოში უჩივლებდა.
სხდომის დასრულების შემდეგ ჩვენ რამდენიმე კითხვით მივმართეთ გოჩა ძიმისტარაშვილს.
_ბატონო გოჩა, თქვენ იყავით თანაპარტიელები, დღეს პოლიტიკურ გვამს, ასაკოვანს და გაყიდულს უწოდებთ ორაგველიძეს. რა გაძლევთ ასეთი შეფასების საფუძველს?
_ ისიც და მეც "პატრიოტთა ალიანსის" წევრები ვიყავით. მან, ფაქტიურად, სამთავრობო პროექტებს დაუჭირა მხარი. ეს მიმაჩნია ცუდ თამაშად და ამიტომ დავშალე ფრაქცია. ერთ დღეში მან ახალი ფრაქცია შექმნა, სადაც ყოფილი ნაციონალებიცაა. ამაზე ვსაუბრობ. ამიტომ ვამბობ, რომ გაიყიდა.
_ თქვენ იცით, რომ ის არის წარმატებული მეცნიერი, უხელფასოდ მუშაობდა თითქმის სამი წლის მანძილზე, როცა ანასეულის ცნობილი ინსტიტუტიდან არაერთი სახელოვანი მეცნიერი დაითხოვეს. ასეთი პიროვნებისგან რამდენად ლოგიკურად მიგაჩნიათ მსგავსი ქმედება?
_ კი და ჩემი ინიციატივა იყო „პატრიოტთა ალიანსში“ მისი შემოყვანა. ახლა მე ნამდვილად არ ვიცი, გაიყიდა თუ არა, მაგრამ ასე არ ჩანს? აბა, სხვა რა უნდა იფიქრო?
_ოზურგეთის საკრებულოს მუშაობის დაწყების პირველ დღეებში თქვენც ასევე გიწოდათ ერთი ოპოზიციური პარტიის წარმომადგენელმა: „თქვენ დღეს ყველას უღალატეთ“. ანუ „ადრე მოღალატე“ თქვენ იყავით. ასეთი ურთიერთმიმართვებით თქვენს ამომრჩევლებს ხომ არ ტკენთ გულს ?
_ თქვენ, ალბათ, ნათია შარაშენიძის ნათქვამს მახსენებთ. ის ოპოზიციური პარტიაა და ოპოზიციონერმა მითხრა. ხდება ასე. თუმცა, ამ შემთხვევაში რაც მოხდა, სხვა რა უნდა ვიფიქრო?
ჩვენ ასევე კომენტარი ვთხოვეთ ტექნიკის მეცნიერებათა დოქტორს, ოზურგეთის საკრებულოს ფრაქცია „ოზურგეთი ჩემი ქალაქია“ თავმჯდომარეს, ნანული ორაგველიძეს, რომელმაც ასეთი პასუხი გაგვცა:
"ამ ადამიანზე ბევრს არაფერს ვიტყვი. უამრავი შეურაცხყოფა მომაყენა, აგერ, ყველამ ნახეთ. ფრაქცია თვითონ დაშალა. ღალატად ჩამითვალა ის, რომ ძალიან კარგ საქმეს, ოზურგეთის ბაზრის მშენებლობას მივეცი ხმა. განსხვავებული აზრი არ შეიძლება ღალატად და გაყიდვად ჩაითვალოს. მემუქრებოდა კიდეც, სხვა ფრაქციაში ვერ შეხვალო, მაშინ გახვალ „პატრიოტთა ალიანსიდანო“. სწორედ ამიტომ მე ყოველივე ეს ვკითხე ზემოთ, ჩვენს ხელმძღვანელობას. მითხრეს, რომ სრული უფლება მქონდა, შემექმნა ასეთი ფრაქცია. თან „პატრიოტთა ალიანსის“ წევრად დავრჩენილიყავი. მითხრეს ისიც, რომ ჩვენს ფრაქციაში ყველა პარტიის წევრს შეუძლია გაერთიანდეს და კოლეგიალურად, ადამიანურად ჩვენი ქალაქის სიყვარულით ვაკეთოთ ძალიან კარგი საქმეები, რის წამოწყებასაც მე დღეს ვხედავ. ესაა ჩემი აზრი და ამ აზრზე დავრჩები საკრებულოშიც და ზოგადად, ცხოვრებაშიც", _ გვითხრა ნანული ორაგველიძემ.
