ქალაქ ოზურგეთის მუნიციპალიტეტის საკრებულოში დეპუტატებს შორის დაპირისპირება გრძელდება. დღეს საკრებულოს ბიუროს სხდომა 3 საათის ნაცვლად, ნახევარი საათის დაგვიანებით დაიწყო. ბიუროს სხდომას ქალაქ ოზურგეთს მერი ბეგლარ სიორიძეც ესწრებოდა. ბიუროს სხდომაზე დღის წესრიგით გათვალისწინებული ხუთი საკითხი გაიტანეს, რომელიც უპირობოდ დაამტკიცეს დეპუტატებმა. ბიუროს სხდომის დასრულების შემდეგ საკრებულოს თავმჯდომარე გელა კობალაძემ დეპუტატებს განცხადება გააცნო, სადაც აღნიშნული იყო საკრებულოს სამანდატო, საპროცედურო, იურიდიულ საკითხთა და ეთიკის კომისიის თავმჯდომარის გოჩა ძიმისტარაშვილის თანამდებობიდან გადაყენების საკითხი.
დაუჭერენ თუ არა დეპუტატები ეთიკის კომისიის თავმჯდომარის გადაყენებას მხარს ? აღნიშნული კითხვით მივმართეთ რამდენიმე დეპუტატს.
დეპუტატი ლევან მგელაძე “გურია ნისუთან“ აღნიშნავს, რომ ძიმისტარაშვილის გადაყენებას მხარს არ დაუჭერს.
"მხარს ნამდვილად არ დავუჭერ მაგ საკითხს, ძიმისტარაშვილი თავის მოვალეობას ასრულებდა დამაკმაყოფილებლად, რაც შეეხება მორიგ ინტრიგებს, ამაში ნამდვილად არ ჩავერთვები და მხარს მის გადაყენებას ნამდვილად არ დავუჭერ. მასეთი ბრალდებები, უმრავლესობისგან ბევრი გაგვიგონია და არც ისეთი ბრალდებები არ ყოფილა, რაც მიუღებელი ყოფილიყოს, თუ ამბობდა ის სიმართლეს ამბობდა."
ნათია შარაშენიძე მიიჩნევს, რომ ძიმისტარაშვილის არაეთიკური ქმედებები ნამდვილად არ შეუნიშნავს.
"ის რაც პატრიოტთა ალიანსმა გაუკეთა ქართულ ოცნებას ძმა ძმას არ გაუკეთებს, დღეს კი გოჩა ძიმისტარიშვილი გაწირეს და თანამდებობიდან სურთ გადააყენონ, ეს ნათელი მაგალითია და ასე ვთქვათ მესიჯია ყველასთვის მათ შორის ქართული ოცნების მომხრეებისთვის, მაშინ როცა დასჭირდებათ ძღვნად მირთმეულ თანამდებობას ყველას წაართმევენ. ჩემთვის ძიმისტარიშვილის კომისიის თავმჯდომარედ დანიშვნა არავის უკითხავს და თავის დროზე ხმა არ მიმიცია მისთვის, დარწმუნებული ვარ არც ახლა მკითხავენ და ისე გადააყენებენ, მე პირადად მხარს არ დავუჭერ მის გადაყენებას რადგან ვერ ვხედავ ძიმისტარიშვილის არაეთიკურ ქმედებებს და თუ ქართულ ოცნებას აღარ მოსწონს ოდესღაც მისი მხარდამჭერი ძიმისტარიშვილი, ეს მათი გემოვნების საკითხია. ვატყობ ისე მიდის საქმე ცოტა ხანში თითოეული მათგანი ლეიბორისტების დასაცავი გახდება."
თამარ ნადირიძის თქმით ეს არის ანგარიშსწორება.
"არ დავუჭერ მხარს, ეს არის ანგარიშსწორების ფორმა, ეს არის მცდელობა კიდევ ერთხელ დააშინონ ურჩი დეპუტატები".
გოჩა მგელაძე: "ეს არის კონფიდენციალური ინფორმაცია, ჩემი უფლებაა, გამოვიყენებ ბოლომდე და ორშაბათს დავინახავთ რა მოხდება, არ ვეთანხმები, განცხადებაში მოყვანილ არგუმენტებს, მე არ დამინახავს და ისე რა ხდებოდა ნამდვილად არ ვიცი, შიდა პოლიტიკური გარჩევები თავისთან გაარჩიონ."
ლავრენტი ბიგვავა: “ვფიქრობ, ჯერჯერობით გადაწყვეტილება მიღებული არ მაქვს, უნდა გავეცნო განცხადებას, რადგან იქ მოყვანილი ზოგიერთი ფაქტი ჩემთვის არ იყო ცნობილი, ამიტომ შემდეგ მივიღებ გადაწყვეტილებას, ჯერჯერობით არ ვარ ჩამოყალიბებული."
ირინა საჯაია: "ჯერჯერობით საქმის კურსში არ ვარ, ამიტომ მინდა ცოტა გავერკვე და მერე მივიღებ გადაწყვეტილებას.
თემურ სალუქვაძე: “უნდა გავეცნო არგუმენტებს, რა აქვთ საფუძველი , შემდეგ გამოვიტან შესაბამის დასკვნებს და მივიღებ გადაწყვეტილებას."
