საქართველოს უზენაესი სასამართლოს ყოფილმა თავმჯდომარემ, კონსტანტინე კუბლაშვილმა თანამდებობიდან წასვლამდე, ბოლო ორი თვის განმავლობაში 12 34-ლარის დანამატი მიიღო.
ამის შესახებ ინფორმაცია "გურია ნიუსს" საქართველოს უზენაესი სასამართლოდან გამოთხოვილი ინფორმაციის საპასუხოდ მიაწოდეს.
დოკუმენტაციის თანახმად, 2015 წლის იანვრიდან მარტის ჩათვლით, უზენაეს სასამართლოში 17 მოსამართლეზე ჯამში 184 864 ლარის დანამატი გაიცა.
აქედან, იანვარში – 44 310 ლარი, თებერვალში – 63 214 ლარი, მარტში – 77 340 ლარი.
რაც შეეხება მოსამართლეების მიერ მიღებულ დანამატებს, დოკუმენტის თანახმად ასე გამოიყურება:
კონსტანტინე კუბლაშვილმა იანვარში დანამატის სახით 2985 ლარი მიიღო, თებერვალში, თანამდებობის დატოვებამდე კი, – 9363 ლარი. (ცნობისთვის, კონსტანტინე კუბლაშვილმა თანამდებობა 2015 წლის 23 თებერვალს დატოვა)
იანვარში 2985 ლარიანი დანამატი მიიღეს უზენაესი სასამართლოს თავმჯდომარის მოადგილეებმა – ზაზა მეიშვილმა, მიხეილ ჩინჩალაძემ და ვასილ როინიშვილმა.
დანარჩენ 12 მოსამართლეზე კი, ერთნაირი ოდენობის, 2735-ლარიანი დანამატი გაიცა.
რაც შეეხება თებერვალს, უზენაესი სასამართლოდან, მოსამართლეებზე სხვადასხვა ოდენობის დანამატი გაიცა.
ყველაზე დიდი ოდენობით კი, დანამატები სამმა მოსამართლემ აიღო – კონსტანტინე კუბლაშვილმა – 9363 ლარი, ნათია წკეპლაძემ 8374 ლარი, ხოლო თეიმურაზ თოდრიამ 8449 ლარი.
დანარჩენი მოსამართლეების დანამატი სხვადასხვა ოდენობისაა და 3 ათას ლარს არ სცდება.
"გურია ნიუსისთვის" მოწოდებული დოკუმენტაციიდან ირკვევა, რომ ყველაზე დიდი ოდენობის დანამატი, უზენაესი სასამართლოდან 2015 წლის მარტში გაიცა – 77 340 ლარი.
დანამატების ყველაზე დიდი ოდენობა – 11544 ლარის ოდენობით სამმა მოსამართლემ მიიღო მაია ვაჩაძემ, ნუგზარ სხირტლაძემ და მაია ოშხარელმა.
რაც შეეხება დანარჩენი მოსამართლეების დანამატებს, ასე გამოიყურება:
უზენაესი სასამართლოს თავმჯდომარე ნინო გვენეტაძე – 1134 ლარი, თავმჯდომარის პირველი მოადგილე ზაზა მეიშვილი – 3057 ლარი, თავმჯდომარის მოადგილე მიხეილ ჩინჩალაძე 9 135 ლარი, თავმჯდომარის მოადგილე ვასილ როინიშვილი 2922 ლარი, უზენაესი სასამართლოს წევრი ლევან მურუსიძე – 8735 ლარი.
ხოლო დანარჩენმა 6-მა მოსამართლემ – პაატა სილაგაძემ, პაატა ქათამაძემ, გიორგი შავლიაშვილმა, ბესარიონ ალავიძემ, ზურაბ ძლიერიშვილმა და ნინო ბაქაქურმა ერთნაირი ოდენობის, 2953 ლარიანი დანამატი მიიღეს.
დოკუმენტაციის თანახმად ირკვევა, რომ მოსამართლეებს სამი თვის განმავლობაში, 2015 წლის იანვრიდან მარტის ჩათვლით, მინიმუმ 8 ათასი ლარის ხოლო მაქსიმუმ 17 ათასი ლარის დანამატი აქვთ მიღებული.
კერძოდ, უზენაესი სასამართლოს მოსამართლე მაია ვაჩაძემ 17233 ლარის დანამატი მიიღო, ნუგზარ სხირტლაძემ 17 139 ლარი, ამავე ოდენობის თანხა – 17 139 ლარი აქვს მიღებული მოსამართლე მაია ოშხარელსაც. 14 205 ლარი აიღო მოსამართლე ლევან მურუსიძემ, 11184 ლარი მიიღო თეიმურაზ თოდრიამ, 11 109 ლარი – ნათია წკეპლაძემ, 8642 ლარი უზენაესი სასამართლოს თავმჯდომარის მოადგილემ ვასილ როინიშვილმა, 8848 ლარი – ზაზა მეიშვილმა, 8138 ლარი – პაატა სილაგაძემ, 8548 ლარი – გიორგი შავლიაშვილმა, ამავე ოდენობის თანხები აქვთ აღებული პაატა ქათამაძესა და ბესარიონ ალავიძეს; 8642 ლარი აიღეს ნინო ბაქაქურმა და ზურაბ ძლიერიშვილმა.
ცნობისთვის, "საერთო სასამართლოების შესახებ" საქართველოს ორგანული კანონის 69-ე მუხლის თანახმად, მოსამართლის შრომის ანაზღაურება მხოლოდ თანამდებობრივი სარგოსა და დანამატისგან შედგება.
"გურია ნიუსი" უზენაესი სასამართლოდან, მოსამართლეებზე გაცემული დანამატების შესახებ ინფორმაციას ეტაპობრივად შემოგთავაზებთ.
ამავე თემაზე:
