ფრაქცია "თავისუფალმა დემოკრატებმა" გუშინელ სხდომაზე საქართველოს პრეზიდენტის მიერ ნდობის მისაღებად წარმოდგენილი საქართველოს მთავრობის შემადგენლობისა და საქართველოს პრემიერ-მინისტრის მიერ წარმოდგენილი განახლებული სამთავრობო პროგრამის "ძლიერი, დემოკრატიული, ერთიანი საქართველოსთვის" საკითხების განხილვის ფარგლებში საქართველოს პრემიერ-მინისტრს ირაკლი ღარიბაშვილს მოუსმინეს.
შეხვედრა, ძირითადად, კითხვა-პასუხის რეჟიმში გაგრძელდა. ფრაქციის წევრების კითხვებს პრემიერ-მინისტრთან ერთად, ცალკეული სამინისტროების ხელმძღვანელებმაც უპასუხეს.
პარლამენტის წევრთა კითხვები სხვადასხვა საკითხებს უკავშირდებოდა, როგორიცაა მაგალითად, ლართან დაკავშირებული პრობლემები და ამ მიმართულებით მთავრობის გეგმები, პენსიების ინდექსაცია, გაზისა და ელექტროენერგიის ტარიფის შესაძლო გაზრდა, ინფრასტრუქტურისა და რეგიონული განვითარების სამინისტროში არსებული შესაძლო კორუფციული სქემები, თავდაცვის მინისტრის შეცვლის საკითხი, ვიზა ლიბერალიზაცია და სხვა.
როგორც ირაკლი ღარიბაშვილმა განაცხადა, ლართან დაკავშირებული პრობლემები საკმაოდ სერიოზულია, თუმცა მთავრობა ამ საკითხს არ გაურბის და არასდროს უთქვამს, რომ პრობლემას არ აღიარებს.
როგორც ირაკლი ღარიბაშვილმა განმარტა, მთავრობა თავის წილ პასუხისმგებლობას იღებს, თუმცა გარკვეული პასუხისმგებლობა ეროვნულ ბანკსაც აკისრია. პრობლემას კი ქვეყანა თავიდან ვერ აიცილებდა, ვინაიდან ეს, ძირითადად, საგარეო შოკებით იყო განპირობებული.
პრემიერ მინისტრის თქმით, ტენდენცია ისეთია, რომ მთავრობისა და ეროვნული ბანკის პროგნოზით, უახლოეს კვირაში ვიგრძნობთ ლარის გამყარებას.
რაც შეეხება საწვავზე ფასის გაზრდას, ირაკლი ღარიბაშვილის ინფორმაციით, შესაბამისი კომპანიები ლარის კურსის გაუფასურების მიზეზით ხსნიან და, შესაბამისად, საწვავის იმპორტიორი კომპანიებისგან "მეტი დასაბუთებაა" საჭირო, რითაც მთავრობის უახლოეს სხდომაზევე დაინტერესდება.
პენსიებთან დაკავშირებით განმარტება ფინანსთა მინისტრმა გააკეთა, რომელმაც აღნიშნა, რომ მართალია იგი წელს მხოლოდ 10 ლარით გაიზრდება, თუმცა ეს პროცესი მომავალ წელსაც გაგრძელდება.
პრემიერ-მინისტრმა კი, ამ საკითხზე საუბრისას აღნიშნა, რომ პენსია გათანაბრებულია საარსებო მინიმუმთან.
პრემიერ-მინისტრი ფრაქცია "თავისუფალ დემოკრატების" მხრიდან პარლამენტში მთავარი პროკურორის დაბარების საკითხსაც გამოეხმაურა და განაცხადა, რომ პროკურატურაში მნიშვნელოვანი რეფორმების განხორციელება იგეგმება, რომლის პირველი ეტაპი უკვე დასრულებულია.
_ რაც შეეხება თავდაცვის მინისტრის შეცვლას, ეს კოალიციასთან კონსულტაციის შემდეგ მოხდა და, თავისთავად, მინისტრების ცვლილებაში არაფერია საგანგაშო, _ აღნიშნა პრემიერ-მინისტრმა.
საქართველოს პრეზიდენტის მიერ ნდობის მისაღებად წარმოდგენილი საქართველოს მთავრობის შემადგენლობისა და საქართველოს პრემიერ-მინისტრის მიერ წარმოდგენილი განახლებული სამთავრობო პროგრამის "ძლიერი, დემოკრატიული, ერთიანი საქართველოსთვის" საკითხების განხილვას პარლამენტი რიგგარეშე სხდომაზე გეგმავს, რომელიც დღეს არის მოწვეული.
