წაიკითხეთ სათაური და ვერაფერს მიხვდით? ახლავე აგიხსნით _ საიდუმლოს არავისთვის წარმოადგენს, რომ საქართველოში ჯერ კიდევ ბიუროკრატიის ხანა ყვავის. ყველაზე უფრო მოწინავე ბიუროკრატები კი სასამართლო ხელისუფლებაში სხედან. სანამ ერთ მარტივ კითხვაზე პასუხს გაგცემენ, იმდენი დრო გადის, რომ საკითხს აქტუალობა ეკარგება. ეს ამბავი გვერდით გადავდოთ და ისევ “პინგ-პონგს” დავუბრუნდეთ.
საქმე კვლავ ტელეკომპანია “გურიას” გარშემო განვითარებულ მოვლენებს ეხება. ჩვენს მკითხველს ახსოვს, რომ ამ საქმესთან დაკავშირებით არა ერთ დარღვევას ჰქონდა ადგილი. მთლიანი საქმის მიმოხილვას არ დავიწყებთ, მაგრამ მოვლენების მსგავსებას გვერდს ვერ ავუვლით.
ხათუნა სიორიძის ადვოკატს თედო კობახიძეს უარი განუცხადეს უზენაეს სასამართლოში საქმის გაცნობაზე, მხოლოდ და მხოლოდ იმ მიზეზით, რომ საქმე ქუთაისის სააპელაციო სასამართლოში იყო გადაგზავნილი. ბოლოს კი, როგორც აღმოჩნდა, საქმე გადაგზავნილი კი არა, განხილულიც არ ყოფილა.
მიმდინარე წლის 25 დეკემბერს, ხათუნა სიორიძის ადვოკატს, უზენაესი სასამართლოს თავმჯდომარის მოადგილის ვასილ როინიშვილის თანაშემწის ხათუნა ჯინორიას მიერ ეუწყა, რომ საქმე ქუთაისის სააპელაციო სასამართლოში იყო გადაგზავნილი და მისი 19 დეკემბრის განცხადება, რომლითაც თედო კობახიძე ითხოვდა საქმის სრული დოკუმენტაციის 5 ეგზემპლარად გადაღება/გადაქსეროქსებას და შესაბამისად დედანთან ასლების სისწორის დამოწმებას, ვერ შესრულდებოდა.
26 დეკემბერს, ადვოკატმა თედო კობახიძემ ქუთაისის სააპელაციო სასამართლოს მიმართა იგივე შინაარსის განცხადებით, რომელიც, დაახლოებით 10 საათზე, რწმუნებულებასთან ერთად, გადაიგზავნა ფაქსის საშუალებით, ნომერზე 8-431-25-23-02.
იმავე დღეს, ადვოკატს სააპელაციო სასამართლოდან აცნობეს, რომ მის მოთხოვნას ვერ დააკმაყოფილებდნენ, რადგანაც საქმე უკვე ოზურგეთის რაიონულ სასამართლოში იყო გაგზავნილი.
27 დეკემბერს, ადვოკატი იგივე მოთხოვნით კვლავ აგზავნის განცხადებას ოზურგეთის რაიონულ სასამართლოში. თუმცა, ოზურგეთის რაიონული სასამართლოდან, სატელეფონო ზარის მეშვეობით, ბატონ კობახიძეს აცნობეს, რომ საქმე არ მიუღიათ!!!
28 დეკემბერს, ადვოკატი დაუკავშირდა რაიონულ სასამართლოს და კვლავ იკითხა, ხომ არ მიუღიათ აღნიშნული საქმე, რაზედაც უპასუხეს, რომ “ზემოთ გაარკვევდნენ”. შემდეგ ადვოკატს მისცეს კანცელარიის უფროსის, ნინო სიხარულიძის მობილურის ნომერი. კობახიძე უკავშირდება სიხარულიძეს და არკვევს რომ, “თურმე, საქმე 27 დეკემბრის გვიან საღამოს მიიღეს” და მის განცხადებას წერილობით უპასუხებდნენ.
ამ ფრიად “სასიამოვნო” პროცედურების შემდეგ, 29 დეკემბერს, ქალბატონ სიორიძეს მაინც არ გააცნეს და არც გადაუღეს საქმე, რის შემდეგაც მან კვლავ მიმართა განცხადებით ოზურგეთის რაიონული სასამართლოს თავმჯდომარეს, ლევან ნუცუბიძეს.
განცხადებაში გამოთქმულია ეჭვი, რომ საქართველოს უზენაესი სასამართლოს მოსამართლეთა, თუ აპარატის თანამშრომელთა მხრიდან ხდებოდა და მოხდა საქმის გაყალბება.”ამჟამად თქვენი თუ ქუთაისის სააპელაციო სასამართლოს თანამშრომელთა ქმედებები მიმყარებს და მაძლევს საფუძველს ვივარაუდო, რომ როგორც მართლმსაჯულების სასახლის კედლებში, ასევე აღნიშნულ სააპელაციო, თუ რაიონულ სასამართლოში გრძელდება სიყალბე, როგორც ხელმძღვანელობის, ასევე აპარატის თანამშრომელთა მხრიდან”, _ წერს ხათუნა სიორიძე.
30 დეკემბერს, ადვოკატი კობახიძე, მის მიერ გაკეთებულ განცხადებაში, ადამიანის უფლებათა ევროპული კონვენციის მე-6 მუხლის, საქართველოს კონსტიტუციის 42-ე მუხლის პირველი პუნქტისა და საქართველოს სამოქალაქო საპროცესო კოდექსის 83-ე მუხლის საფუძველზე, მოითხოვს ხათუნა სიორიძეს დაუყოვნებლივ გააცნონ და გადაუღონ მის მიერ მოთხოვნილი სამოქალაქო საქმე.
ერთი შეხედვით, სავსებით ლოგიკური და კანონიერი მოთხოვნა _ გადაეცეს ადვოკატს საქმის მასალების სამტომეული, იმავე თანმიმდევრობით, რა რიგითობითაც საქმის მასალებია შეკერილი და გადანომრილი, ქართულ სასამართლოში უტოპიურ ოცნებას დაემსგავსა.
რა ხდება? რისი ბრალია ეს? გაუმართავი ადმინისტრაციული ჯაჭვის რომელიღაც რგოლია ჩაჟანგებული, თუ სასამართლო ხელისუფლება კარგად ფლობს “პინგ-პონგის” ხელოვნებას?!
შეგახსენებთ, რომ “გურია ნიუსი” ყოველთვის ცდილობს მის მიერ გამოქვეყნებულ მასალებში ინფორმაცია ორმხრივი იყოს, მაგრამ ამჯერად მსგავს მცდელობას ადგილი არ ჰქონია, რადგანაც არა ერთხელ განგვიცხადეს უზენაეს სასამართლოში არაერთხელ გაგვიცხადეს, “ჩვენი პოზიცია განცხადებაში გამოვხატეთ და ჩვენს ელექტრონულ კედელზე გამოვკიდეთო”.
“პინგ პონგის” ორი პარტია “უზენაესი სასამართლო _ ქუთაისის სააპელაციო სასამართლო” და “ქუთაისის სააპელაციო სასამართლო _ ოზურგეთის რაიონული სასამართლო”, განვლილი ეტაპია. დაველოდოთ თამაშის მომდევნო პარტიებსა და სასამართლოს მიერ ჩაწოდებულ “ტოპკებს”.
