ლანჩხუთის მუნიციპალიტეტის ჩოჩხათის ადმინისტრაციული ერთეულში, რომელიც რამდენიმე მაღალმთიან სოფელს აერთიანებს, მოსახლეობის ერთ-ერთ მთავარ პრობლემად კვლავაც უგზოობა რჩება. აღნიშნული პრობლემა ჩოჩხათლებს კარგა ხანია აწუხებთ, გასულ წელს საპროტესტო აქციაც მოაწყვეს გზის შეკეთების მოთხოვნით, რასაც შედეგად მხოლოდ გზის სარეაბილიტაციო სამუშაოების დაწყებისთვის პროექტის შედგენა მოჰყვა და ამის შემდეგ, როგორც თავად სოფლის მოსახლეობა ამბობს, საქმე წინ ოდნავადაც არ წაწეულა.
ჩოჩხათის მკვიდრი ომარ ხუციშვილი რედაქციაში გვეწვია და იმ პრობლემებზე გვესაუბრა, რომელიც სოფლისთვის ყველაზე აქტუალურია და გზაზე სარეაბილიტაციო სამუშაოების დაწყების მოთხოვნით საპროტესტო აქციის გამართვა დაანონსა.
"სოფელში მოსახლეობის განსაკუთრებული ინტერესი ახლა ის არის, თუ როდის დაიწყება სუფსა-ჩოჩხათი-გულიანის გზაზე სარეაბილიტაციო სამუშაოები.
ასეთი კითხვით თითქმის ყოველკვირას მივმართავთ მუნიციპალიტეტის ხელმძღვანელობას, „მალე“-არის მათი პასუხი.
ამ ერთი შეხედვით დამამშვიდებელმა და იმედის მომცემმა სიტყვამ ჩოჩხათლებისთვის კარგახანია დაკარგა მნიშვნელობა, რადგან ასეთი პასუხი 2015 წლის იანვრიდან დღემდე გვესმის, მაგრამ ჯერ არაფერი დაწყებულა. ამასობაში გზა სულ უფრო გაფუჭდა და გაპარტახდა. ვისაც აქ არ გაუვლია, მინდა მათ ვუთხრა, რომ იგი ახლა ისეთ მდგომარეობაშია, ნატოს ჯარების თანამედროვე ტექნიკასაც კი გაუჭირდება გადაადგილება.
ევროკავშირში გვინდა შესვლაო, რომ გაიძახიან, გვაინტერესებს ასეთ გზებით აპირებენ იქ შესვლას, თუ ჩოჩხათლებს ევროკავშირის მიღმა გვტოვებენ.
მოსახლეობას უახლოეს დღეებში გადაწყვეტილი გვაქვს კვლავ შევიკრიბოთ გზის საკითხზე. შეკრებაზე ალბათ, მოვა და შეგვხვდება მუნიციპალიტეტის გამგებელი, ახალი გუბერნატორი, საკრებულოს ხელმძღვანელები და ცალკეული დეპუტატები. ასევე ვეპატიჟებით მასობრივი ინფორმაციის წარმომადგენლებს, თუ რა თქმა უნდა, ამ გზით ჩვენამდე მოარწევენ.
ჩვენი ერთადერთი მოთხოვნა შკრებაზე ის იქნება, რომ გვიპასუხონ აპირებენ საერთოდ გზაზე სამუშაოების დაწყებას და თუ აპირებენ როდის?
იმ შემთხვევაში, თუ პასუხი არ იქნება მისაღები, არაა გამორიცხული მივმართოთ პროტესტის უფრო რადიკალურ ფორმას", – ამბობს ომარ ხუციშვილი.
აღნიშნულთან საკითხთან დაკავშირებით მუნიციპალიტეტის გამგეობის არქიტექტურისა და ინფრასტრუქტურის სამსახურის უფროსს, ლევან ჩხაიძეს დავუკავშირდით.
"ყველაფერი უცებ არ ხდება, გარკვეული პროცედურებია გასავლელი. პროექტი უკვე გაკეთებულია, საკითხი უახლოეს მომავალში მთავრობის სხდომაზე უნდა გავიდეს დასამტკიცებლად. ყველაფერი ისე გაკეთდება, როგორც საჭიროა", -განაცხადა ლევან ჩხაიძემ.
