საპარლამენტო უმცირესობის წევრმა სერგო რატიანმა განათლებისა და მეცნიერების სამინისტროს შიდა აუდიტის დასკვნა გაასაჯაროა, რომელიც 2014 წლის 14 მარტს, ფოთში სკოლის მოსწავლეების ფილმის "სააკაშვილის სისხლიანი რეჟიმის“ ჩვენებაზე მიყვანას ეხება.
დასკვნიდან ირკვევა, რომ სკოლის მასწავლებლებისა და მოსწავლეების ფილმზე მიყვანის პროცესს პირადად ხელმძღვანელობდნენ ქალაქ ფოთის მერი ირაკლი კაკულია და საკრებულოს თავმჯდომარე ალექსანდრე თოფურია, სწორედ მათ დაავალეს ქალაქის რესურს-ცენტრის უფროსს გოჩა ქორქიას მოსწავლეებისა და მასწავლებლების ფილმზე მიყვანის ორგანიზება.
პროცესში ასევე მონაწილეობდა განათლებისა და კულტურის სამსახურის უფროსი დავით შეროზია.
დასკვნაში წერია, რომ შიდა აუდიტის დეპარტამენტს მიზანშეწონილად მიჩანია, რომ ფოთის საგანმანათლებო რესურსცენტრის უფროსის გოჩა ქორქიას მიმართ დისციპლინარული პასუხისმგებლობის ზომა უნდა იქნეს გამოყენებული:
"საქართველოს კანონმდებლობის დარღვევისთვის საჯარო სამართლის იურიდიულ პირებს _ ქალაქ ფოთის ნომერ პირველ საჯარო სკოლას, ნიკო ნიკოლაძის სახელობის მეორე საჯარო სკოლას, ი.ჯავახიშვილის სახელობის ნომერ მესამე საჯარო სკოლას, # მეოთხე საჯარო სკოლას, # მეხუთე საჯარო სკოლას, # მეექვსე საჯარო სკოლას, # მეშვიდე, # მერვე, # მეთერთმეტე, # მეთორმეტე და # მეთხუთმეტე საჯარო სკოლებს მიეცეთ წერილობითი გაფრთხილება“ _ ვკითხულობთ დასკვნაში.
აღნიშნულ სკოლებს დაევალათ დარღვევაზე რეაგირება და გატარებული ღონისძიებების შესახებ ანგარიშის შიდა აუდიტის სამსახურში წარდგენა.
სერგო რატიანი ამბობს, რომ ამ პროცესში ცენტრალური ხელისუფლება იყო ჩართული:
_ თუ ჩვენ გვაქვს ოდნავი პრეტენზია მაინც, რომ წარმოვადგენთ თანამედროვე ცივილიზებული სახელმწიფოს, ქალაქ ფოთის ამჟამინდელი მერი და საკრებულოს თავმჯდომარე დაუყოვნებლივ უნდა გადადგნენ.
მე ვისურვებდი, ამის შესახებ განცხადება პარლამენტის ადამიანის უფლებათა კომიტეტის თავმჯდომარე ეკა ბესელიასგან მომესმინა, რომელსაც, როგორც ფოთის მაჟორიტარ დეპუტატს, განსაკუთრებული პასუხისმგებლობა ეკისრება.
საზოგადოებას ახსოვს, რომ სიძულვილისა და ძალადობის წახალისების კამპანიაში მოსწავლეების მონაწილეობა სამეგრელოს რამდენიმე ქალაქში იყო ორგანიზებული. შესაბამისად, ძნელი წარმოსადგენია, რომ ამ პროცესების მართვა და სინქრონიზება ცენტრალური ხელისუფლების, და კერძოდ, პრემიერ-მინისტრის გარეშე მომხდარიყო. ამ გარემოებას ადასტურებს ის ფაქტიც, რომ რამდენიმე დღის წინ პრემიერმა ღარიბაშვილმა გურიის გუბერნატორად სწორედ ამ კამპანიის ერთ-ერთი მთავარი ორგანიზატორი გია სალუქვაძე დანიშნა.
საქართველოს ცენტრალური ხელისუფლების მონაწილეობაზე მიუთითებს სხვა ფაქტიც: მიუხედავად იმისა, რომ განათლების და მეცნიერების სამინისტროს ჰქონდა ინფორმაცია, რომ იგეგმებოდა მოსწავლეების პროპაგანდისტულ ფილმზე მიყვანა, სამინისტრომ ვერ გაბედა პროცესში მონაწილეობისგან დაეცვა მასწავლებლები და მოსწავლეები, _ აღნიშნავს რატიანი.
შეგახსენებთ, რომ ფილმის _ "სააკაშვილის სისხლიანი რეჟიმის" ჩვენება ზუგდიდსა და ფოთში იმ არასამთავრობო ორგანიზაციამ მოაწყო, რომლის ხელმძღვანელი გია სალუქვაძე რამდენიმე დღის წინ გურიის გუბერნატორად დანიშნეს.
„გურია ნიუსი“ შეეცადა ამ თემაზე ფოთის მაჟორიტარი დეპუტატის ეკა ბესელია კომენტარიც მოეპოვებინა, თუმცა მასთან დაკავშირება ვერ მოხერხდა. პარლამენტის წევრის კომენტარს მიღებისთანავე შემოგთავაზებთ.
