მარტვილის მუნიციპალიტეტის სოფელ ბანძის პოლიციის შენობაზე თავდასხმასა და ორი სამართალდამცავის ცემაში ბრალდებულების სასამართლო პროცესი 19 მაისს გაიმართება. განაჩენი კი, სავარაუდოდ, 9 ივნისს უნდა გამოცხადდეს.
ცნობისთვის, საქმე 2014 წლის 16 ოქტომბერს მარტვილის რაიონის სოფელ ბანძის პოლიციის შენობიდან დაკავებული მამაკაცის, თემურ გაბუნიას გაქცევას ეხება.
ოფიციალური ინფორმაციით, დაკავებულმა შენობიდან გაქცევა ნათესავების დახმარებით შეძლო, რომლებიც განყოფილებაში მივიდნენ, პოლიციის თანამშრომლებს თავს დაესხნენ და მათ როგორც სიტყვიერი, ასევე ფიზიკური შეურაცხყოფა მიაყენეს.
თუმცა, აღნიშნულში ბრალდებული პირები აბსოლუტურად სხვა ვითარებას აღწერენ. როგორც "გურია ნიუსთან" ერთ-ერთი მათგანი, მაია კეკელია ჰყვება, პოლიციის შენობაში, ამბის გასაგებად მისულებს ნასვამი და გაღიზიანებული სამართალდამცავები დახვდნენ, რომლებმაც მათ სიტყვიერი შეურაცხყოფა მიაყენეს.
ამ საკითხთან დაკავშირებით "გურია ნიუსი" ვრცლად უკვე წერდა სტატიაში – როგორ გაიქცა დაკავებული – ნასვამი პოლიციელების წინდაუხედაობით თუ ნათესავების "ამბოხით".
რაც შეეხება წინასასამართლო სხდომას, რომელზეც პოლიციელები და ბრალდებულების ნაწილი დაიკითხნენ, გუშინ, ზუგდიდის სასამართლოში გაიმართა. დანარჩენების დაკითხვა 19 მაისს გაგრძელდება.
"სასამართლო პროცესები ზოგადად ნორმალურად მიმდინარეობს, თუ არ ჩავთვლით იმ გარემოებებს, რომ პოლიციელების მხრიდან რამოდენიმე მოწმის დაკითხვისას უკმარისობის განცდა მქონდა. მოწმეების დასაკითხად თავიდან 5-5 წუთი იყო გამოყოფილი, თუმცა მთავარი ფიგურების დაკითხვისას, როგორიცაა გამომძიებელი გრიგოლ თოფურია, ძალიან მოკლედდაიკითხა. არადა, სწორედ გამომძიებელმა თოფურიამ მისცა საქმეს არასწორი მსვლელობა და სასამართლომდე ისე მიიყვანა რომ არ დავუკითხივარ. ვფიქრობ, არასრულად დაიკითხა ბანძისპოლიციის ყოფილი უფროსი გოჩა არაბიძეც. მან პროცესზე განაცხადა, რომ თემურ გაბუნიას(ბანძის პოლიციის შენობიდან გაქცეული პირი) დაკავების მომენტში ის არ იმყოფებოდა სამუშაო ადგილზე, გვიან გამოცხადდა და არ ერკვევა დეტალებში; არ იცის როდის მოვიდნენ ექსპერტები და ა.შ. აცხადებს: ჩემს კაბინეტში ვიჯექი და გარეთ არ გამოვდიოდიო. ნებისმიერ კითხვაზე პასუხობდა, რომ არ ახსოვს, არ დაუნახავს და არ იცის დეტალების შესახებ", _ აღნიშნა "გურია ნიუსთან" საუბრისას ბრალდებულმა მაია კეკელიამ.
მისივე თქმით, სასამართლო პროცესზე მოწმე პოლიციელები იდენტურ ჩვენებებს აძლევდნენ, რის გამოც ეჭვი აქვს, რომ ეს ჩვენებები პროკურატურასთან წინასწარ იყო შეთანხმებული.
"გაზუთხულად ერთიდაიმავეს ყვებოდნენ. 5 ძირითადი მოწმე ჰყავთ და ხუთივემ ერთნაირიტექსტით მოყვა რა მოხდა ბანძის პოლიციის შენობაში. თუმცა, კითხვებზე, თუ რატომ არ დამადეს ხელბორკილები და დამაკავეს, თუ პოლიციელებს ვცემდი, ალექსანდრე გაგუამ უპასუხა, რომ – ესენი ჩვენი ახლობლები არიან და ქალბატონს ხელბორკილს როგორ დავადებდიო. ვფიქრობ, არასერიოზული განაცხადია პოლიციელის მხრიდან", _ აცხადებს კეკელია.
მისივე თქმით, პროცესზე დაიკითხა მარტვილი პოლიციის მთავარი ექიმი, რომელმაც განაცხადა, რომ ალექსანდრე გაგუას ფაქტიურად არაფერი ეტყობოდა, ძალიან პატარა ნაკაწრი ჰქონდა, რომელიც რამდენიმე საათის ან დღის მიყენებულიც კი შეიძლება ყოფილიყო, მაგრამ როგორც ექიმმა აღნიშნა, გაგუამ დაიჟინა, სამედიცინო დახმარება გამიწიეთ და იძულებული გავხდი იოდის ხსნარი წამესვა ნაკაწრზეო.
"ჩემი პირველი მოთხოვნა სწორედ ეს იყო, რომ პოლიციელებს ჩატარებოდათ ექსპერტიზა, თუმცა, ეს მათ არ ჩატარებიათ. რაც შეეხება მათ ჩვენებებს, ისინი ამბობენ, რომ თითქოს გაგუასა და წულაიას აღენიშნებოდათ ნაკაწრები, რომელიც ბლაგვი საგნით იყო მიყენებული. ძალიან ადვილი დასადგენი იქნებოდა ეპითელიუმის ქსოვილებით, ნამდვილად მქონდა ამ ადამიანთან შეხება თუ არა", _ აცხადებს კეკელია.
"_პროკურატურის მხრიდანაც უამრავი უზუსტობებია, ჩემი საჩივარი, რომელიც შევიტანე პოლიციაში, სადაც პოლიციელების მხრიდან სიტყვიერ და ფიზიკურ შეურაცხყოფაზე ვწერდი, არც განუხილავთ. შესაბამისად, რეაგირებაც არ მოჰყოლია.
ისინი ვალდებულები იყვნენ საქმე სხვა ნომრით აღეძრათ, თუმცა ასე არ მომხდარა. წერილი გამომიგზავნეს, სადაც აღნიშნული იყო, რომ თქვენს მიერ გაცხადებული პრეტენზიები არ დასტურდებაო. გადაწყვეტილება ისე მიიღეს, რომ მე არავის დავუკითხივარ, მხოლოდ ისპოლიციელები დაკითხეს, რომლებსაც ბრალს ვდებდი. საქმე სისტემურ პრობლემასთან გვაქვს", _ აცხადებს კეკელია და დასძენს, რომ მას 44 წერილი აქვს პროკურატურაში გაგზავნილი აქედან არცერთ წერილზე რეაგირება არ მომხდარა.
როგორც კეკელია აღნიშნავს, საქმის შესახებ ინფორმირებულია შინაგან საქმეთა მინისტრის მოადგილე არჩილ თალაკვაძე და შსს-ს გენერალური ინსპექციის უფროსის მოადგილე ვარლამ ხათრიძე, რომელსაც პირადად შეხვდა.
"ამ საქმესთან დაკავშირებითყველა დეტალი იცის ვარლამ ხათრიძემ. გადავეცი ჩემი ფარული ჩანაწერებიც, თუმცა, მან მითხრა, რომ სასამართლო პროცესების დასრულებამდე, საქმე მისი სფეროდანაა გასული", _ აღნიშნავს კეკელია და დასძენს, რომ თუ სასამართლო მის საწინააღმდეგო გადაწყვეტილებას მიიღებს, ის ამას სტრასბურგში გაასაჩივრებს.
