EBRD-ის რიგით 24-ე ყოველწლიური შეხვედრის შედეგები განიხილეს კოალიცია “ქართული ოცნების” პოლიტსაბჭოს სხდომაზე, რომელიც პრემიერ-მინისტრის ხელმძღვანელობით გაიმართა. ირაკლი ღარიბაშვილმა კიდევ ერთხელ გაუსვა ხაზი კავკასიაში პირველად, საქართველოში ჩატარებული ღონისძიების მნიშვნელობას და მას წარმატებული უწოდა.
სხდომაზე კოალიციის ლიდერებმა საორგანიზაციო საკითხებზე იმსჯელეს და მიმდინარე პროცესები შეაჯამეს. საუბარი შეეხო თბილისის განვითარების თემებს. თბილისის მერმა და საკრებულოს თავმჯდომარემ პოლიტსაბჭოს წევრებს მიაწოდეს ინფორმაცია დედაქალაქში მიმდინარე პროექტების შესახებ.
შეხვედრაზე ყურადღება გამახვილდა ევროპის ახალგაზრდული ოლიმპიური ფესტივალის, “თბილისი 2015″-ისთვის მზადების პროცესზე. საუბარი ასევე შეეხო 2017 წელს საქართველოში ჩასატარებელ მსოფლიო ჩემპიონატს რაგბიში ახალგაზრდებს შორის. პრემიერ-მინისტრმა მსოფლიო რაგბის აღმასრულებელი კომიტეტის საბჭოს გადაწყვეტილება საქართველოსთვის ნდობის გამოცხადებად შეაფასა.
პოლიტსაბჭოს დღევანდელ სხდომას საჯარო სამსახურის ბიუროს უფროსი ეკატერინე ქარდავა დაესწრო, რომელმაც კოალიციის ლიდერებს მიაწოდა ინფორმაცია საჯარო სამსახურის რეფორმის კონცეფციის იმპლემენტაციის შესახებ.
აღინიშნა, რომ ბიუროს მიერ, OECD-ის ექსპერტების ჩართულობით, მიმდინარეობს მუშაობა საჯარო სამსახურის შესახებ ახალი კანონის პროექტზე, რომელიც უახლოეს თვეებში წარედგინება საზოგადოებას დისკუსიისთვის, ხოლო სექტემბრის ბოლოს მას საქართველოს მთავრობა განიხილავს. კანონპროექტი მოიცავს შემდეგ საკითხებს: საჯარო მოხელეთა სახელფასო სისტემის მოწესრიგება, პროფესიული საჯარო მოხელეების რანგირება, მოხელეთა შეფასების სამართლიანი სისტემის შექმნა, საჯარო სამსახურში მიღების წესი, პროფესიულ საჯარო მოხელეთა კარიერის მართვა, მათი უფლებები და მოვალეობები, დისციპლინური წარმოების წესი…
ასევე, შემუშავების პროცესშია საჯარო მოხელეთა ეთიკისა და ქცევის ზოგადი წესები, რომელსაც წლის ბოლოს საქართველოს მთავრობა დაამტკიცებს.
