"გურიას ტურიზმის განვითარების მხრივ მართლაც შთამბეჭდავი პოტენციალი აქვს" _ ამის შესახებ საქართველოს პრემიერ მინისტრმა ოზურგეთში, ბიზნესმენებთან შეხვედფრისას განაცხადა.
მისივე თქმით შავიზღვისპირეთში მდებარე კურორტები _ ურეკი, შეკვეთილი და გრიგოლეთი, ხოლო მაღალმთიან ალპურ ზონაში _ ბახმარო და გომისმთა მართლაც უნიკალური რესურსია და აქ შესაძლებელია როგორც ზაფხულის, ისე ზამთრის ტურიზმის განვითარება.
_ თქვენ იცით ურეკის უმდიდრესი ბუნებრივი რესურსის – სამკურნალო თვისებების მქონე მაგნიტური ქვიშის შესახებ და კარგად მოგეხსენებათ, თუ რამხელა პერსპექტივა აქვს ამ კურორტს.
მე მინდა ორიოდე სიტყვით გითხრათ გომისმთაზე, რადგან ამ კურორტის უნიკალური რესურსი დღესაც აუთვისებელია. იგი მდებარეობს ზღვის დონიდან 2 250 მეტრზე. აქ შეზავებულია ზღვისა და მთის ჰაერი, არის მინერალური წყლები. მისი განუმეორებელი ბუნება და ჭინჭაოს ტბა დაუვიწყარ შთაბეჭდილებას ტოვებს.
გომისმთა უხვთოვლიანია და სამთო-სათხილამურო სპორტის განვითარებისთვის იდეალური რელიეფი აქვს. ჩვენი მიზანი ინვესტორების დაინტერესებაა. მნიშვნელოვანია ინვესტიციების მოზიდვა გომისმთის ზამთრის კურორტად ჩამოყალიბების მიზნით.
იმისათვის, რომ ეს ადგილები ტურისტებისთვის მიმზიდველი გავხადოთ, უნდა შეიქმნას შესაბამისი გარემო და მოეწყოს ინფრასტრუქტურა. წელს პირველად განხორციელდა გზის ნაწილობრივი რეაბილიტაცია.
იმედია, ეს კურორტი, ურეკთან ერთად, იქნება ყველაზე საინტერესო ადგილი ადგილობრივი და უცხოელი ტურისტებისთვის, _ განაცხადა პრემიერმა და დასძინა, რომ ბახმაროსთან დაკავშირებით პროექტი უკვე მზადაა და მალე გასაჯაროვდება:
_ ზოგადად, გურიის ბუნებრივ-გეოგრაფიული პირობები, შავიზღვისპირეთისა და მაღალმთიანი საკურორტო ზონები, კულტურულ-ისტორიული ძეგლები, მინერალური წყლები და სხვა ბუნებრივი რესურსები ქმნის ძალიან კარგ პირობებს იმისათვის, რომ რეგიონში განვითარდეს სამკურნალო, კულტურული, ექსტრემალური თუ ეკოტურიზმი.
ტურიზმის კუთხით გურიის პოტენციალის მაქსიმალურად ათვისება მნიშვნელოვანია არა მხოლოდ გურიისთვის, არამედ მთლიანად, ჩვენი ქვეყნისათვის. ზოგადად, ამ რეგიონის შავ ზღვასთან სიახლოვე ქმნის ძალიან კარგ საფუძველს მისი სატრანსპორტო-ლოგისტიკური განვითარებისთვის, _ განაცხადა ირაკლი ღარიბაშვილმა.
