26 მაისს სამხედრო აღლუმი არ გაიმართება. ქვეყნის დამოუკიდებლობის დღე სხვადასხვა ღონისძიებებით აღინიშნება.
ყველა უწყებას საკუთარი პროგრამა აქვს. რუსთაველის გამზირზე გაიმართება სამხედრო ტექნიკის გამოფენა.
საქართველოს ყოფილი თავდაცვის მინისტრი, ირაკლი ალასანია ფიქრობს, რომ 26 მაისს საქართველოს დამოუკიდებლობის დღე უნდა შეიცავდეს სამხედრო კომპონენტს, თუმცა აცხადებს, რომ დიდი აღლუმის ჩატარება აუცილებელი არ არის.
"მთავარია, 26 მაისს სამხედრო კომპონენტი იყოს. არ არის აუცილებელი, ეს იყოს აღლუმი. სამხედრო კომპონენტი დამოუკიდებლობის დღეს უნდა ჰქონდეს", _ ამბობს ალასანია.
აღლუმის გამართვის საჭიროებას ვერ ხედავს საპარლამენტო უმრავლესობის წევრი ზაქარია ქუცნაშვილიც.
"ამ მდგომარეობაში დამატებითი ხარჯების გაღება ჯარისკაცების დათვალიერებაში შეიძლება უფრო მარტივად გადაწყდეს. შესძლებელია, არ დაზიანდეს თბილისის ქუჩები და არ გაიწეროს დამატებითი ხარჯები", _ აცხადებს ქუცნაშვილი.
თავდაცვის სამინისტროს ინფორმაციით, ხვალ, საკოორდინაციო შემოფრენას განახორციელებენ იროკეზის ტიპის შვეულმფრენები და ისინი თავისუფლების მოედნიდან მიხეილ მესხის სტადიონის გავლით გლდანის მიმართულებით გადაიფრენენ.
23 მაისს 06:00 საათზე გადაიკეტება თავისუფლების მოედანი და მისი მიმდებარე ტერიტორია. რეპეტიცია დაახლოებით 12:00 საათამდე გაგრძელდება.
25 მაისს გენერალური რეპეტიცია 11:00 საათიდან, სავარაუდოდ, 18:00 საათამდე იგეგმება. თავისუფლების მოედანსა და რუსთაველის გამზირზე ტრანსპორტის მოძრაობა 26 მაისს ღონისძიებების დასრულებამდე შეიზღუდება.
26 მაისს წვევამდელთა ფიცის დადების ცერემონიას პრეზიდენტი ჩაიბარებს. დღის მეორე ნახევარში კი, გიორგი მარგველაშვილი ქუთაისში მესამე ბრიგადას ეწვევა.
დამოუკიდებლობის დღე პარლამენტის წინ გალა-კონცერტით დასრულდება.
