"დემოკრატიული მოძრაობის" ერთ-ერთი ლიდერი გიგლა ბარამიძე, საპარლამენტო უმცირესობის წევრ ნუგზარ წიკლაურის იმ განცხადებას ეხმაურება, რომლის თანახმადაც, "ნაციონალური მოძრაობის" დროს, ქვეყანაში პოლიტპატიმრები არ იყვნენ.
ბარამიძის განცხადებით, წიკლაური რომ ასეთ საუბარს ბედავს, დღევანდელი ხელისუფლების ბრალია.
"ზოგადად, დამნაშავე რეჟიმის, "ნაციონალური მოძრაობის" რომელიღაც წევრისგან წამოროშილ სიტყვებზე კომენტარის გაკეთება სასაცილოა, მაგრამ ჩვენ საზოგადოებას კიდევ ერთხელ შევახსენებთ, რომ როდესაც სისხლიანი რეჟიმის წარმომადგენელი ბედავს ასეთ საუბარს, ეს მხოლოდ დღევანდელი უმოქმედო, არაფრისმაქნისი ხელისუფლების ბრალია. ამის ორი მიზეზია: ერთია, რომ მათ არ ძალუძთ სამართლიანობის აღდგენა, რასაც საქართველოს მოსახლეობა ითხოვს, მეორე – ისინი გარიგებულნი არიან "ნაციონალურ მოძრაობასთან", _ განაცხადა ბარამიძემ.
მისივე თქმით, სასაცილოა ასეთი საუბარი იმ ადამიანებზე, რომლებიც "ნაციონალური მოძრაობის" ჯურღმულებში სისხლს ანთხევდნენ.
"ვინ, თუ არა ისინი არიან პოლიტიკური პატიმრები – 200 ადამიანი და 25 პოლიტდევნილი, რომლებიც მთელმა მსოფლიომ აღიარა და რა აზრი აქვს "ნაციონალური მოძრაობა" და მათი ევროპელი ჩინოვნიკები რას იტყვიან. შევახსენებ მათ, რომ გარდა ამ 200 პოლიტპატიმრისა, რომელთაგან უმრავლესობა – 45 ადამიანი ჩვენი პარტიის წევრია, მათ შორის ყველაზე ახალგაზრდა პოლიტპატიმარი ბექა პეტრიაშვილი, რომელიც მთელმა ევროპამ აღიარა.
სისხლიანი რეჟიმი, რომელსაც გარდა ამისა, ჰყავდა 300 ათასი პრობაციონერი, 0,1% იყო გამამართლებელი განაჩენი სასამართლოში, დატერორებული იყო ბიზნესი, გამოცხადებული იყო ნულოვანი ტოლერანტობა და ევროპაში პირველები ვიყავით პატიმრების რაოდენობის მხრივ, თუ ამ პარტიას მიაჩნია რომ პოლიტიკურ დევნას მაშინ ადგილი არ ჰქონია, სასაცილოა. ეს არის ისევ და ისევ "ქართული ოცნების” და თავისი პატრონის, ბიძინა ივანიშვილის დამსახურება. მკვდარია დღევანდელი ხელისუფლება და ამ მკვდარს ჰყავს წარმმართველი ბიძინას სახით", _ განაცხადა გიგლა ბარამიძემ.
