ოზურგეთის მუნიციპალიტეტის სოფელ დვაბზუს მოსახლეობის ერთი ნაწილი "გურია ნიუსს" დაუკავშირდა და სოფელში გაზიფიცირებასთან დაკავშირებით ინფორმაციის მოძიებაში დახმარება გვთხოვა.
სოფელ დვაბზუში ეკლესიის უბანში მცხოვრებლები "გურია ნიუსთან" საუბრისას აცხადებენ, რომ გაზიფიცირება დამთვარებულია, მილები ჩადებული, თუმცა, მათი ინფორმაციით, აღნიშნული სამუშაოები არასწორად ჩატარდა.
კერძოდ, მოსახლეობა აცხადებს, რომ მილები მიწაში არასწორადაა ცადებული, რის გამოც თავიდან უნდა მოხდეს მილების ამოთხრა და ახალი სამუშაოების წარმება, რაც თავისთავად უბანში გზის ხელახლა გადათხრას გამოიწვევს.
"ისედაც გაფუჭებულია გზა საშინლად, ამ ზაფხულში მტვერში უნდა დავიხრჩოთ, დიდი ორმოები, ახლა კიდევ გადათხრა, საერთოდ გვექნება კი გაზი? იქნებ თქვენ გაგვაგებინოთ ზუსტი პასუხი, რა ხდება", _ გვითხრეს დვაბზუს მცხოვრებლებმა.
ინფორმაციას იმის შესახებ, რომ მილები მიწაში არასწორად არის ჩადებული, ადგილობრივი თვითმმართევლობის წარმომადგენლები არ ადასტურებენ.
ოზურგეთის მუნიციპალიტეტის გამგებლის წარმომადგენელი სოფელ დვაბზუში ვასილ ღლონტი "გურია ნიუსთან" ამბობს, ინფორმაცია, რომლის გარკვევაც მოსახლეობამ გვთხოვა, სიმართლეს არ შეესაბამება.
"რა უნდა ამ ხალხს ვერ ვხდები, პირიქით, მოხარული უნდა იყვნენ, რომ გაზი შემოჰყავთ, ვინ თქვა შეცდომით დაამონტაჟესო? ჭორი დაყარეს, ვიღაცეებმა გაავრცელეს, არ არის ეგ სიმართლე… არისკატეგორია ადამიანებისა, რომლებსაც აწყობთ, მასეთი ამბების გავრცელება, ყველაფერი კარგადაა, ნუ ნერვიულობენ", _ ამბობს გამგებლის წარმომადგენელი.
კომპანია, რომელმაც სოფელ დვაბზუში გაზიფიცირების სამუშაოები შეასრულა, შპს "გურიამშენია".
დირექტორის, გიორგი მენაბდეს განცხადებით, მათი ვალდებულება პირნათლად არის შესრულებული, დანარჩენი კი "სოკარ-ჯორჯია გაზი-გურიამ" უნდა დაასრულოს.
"ვინ თქვა ეგ, რომ მილები არასწორად არის ჩაწყობილი, არა კაცო.. ვინ მოიტანა.. ჩაბარებული აქვს უკვე "სოკარს", რაიმე საპრეტენზიო რომ იყოს, პირველ რიგში, "სოკარი" მოგვთხოვდა ჩვენს პასუხს ამაზე. მეტყოდნენ, გამოასწორეო, ამიტომ ჭორია ეს ინფორმაცია. მეც გავიგე ეს ინფორმაცია მოსახლეობიდან, ავედი რამდენჯერმე დვაბზუში და გადავამოწმე ადგილზე, თუმცა არ დადასტურდა, ჯერ იძახდნენ, "ბრაკია" მილები და გაზის გაშვება არ შეიძლებაო, რაც, რა თქმა უნდა, არ აღმოჩნდა სიმართლე, მერე მოგვიტანეს ამბავი, თურმე არასწორად არის დამონტაჟებულიო და თავიდან უნდა დამონტაჟდესო. გეტყვით, რომ ეს ინფორმაცია სიმართლეს არ შეესაბამება, გადაამოწმეთ "სოკარ ჯორჯია გაზი გურიასთან", რადგან სპეციალურმა კომისიამ ჩაიბარა სამუშაოები, ამას ძალიან ბევრი მაკონტროლებელი ორგანო ჰყავს", _ ამბობს შპს "გურია მშენის" დირექტორი გიორგი მენაბდე.
ჩვენს კითხვაზე თუ როდის უნდა მოხდეს გაზის გაშვება მილებში, მენაბდე გვპასუხობს, რომ ეს უკვე "სოკარის" საქმეა.
"სოკარ ჯორჯია გაზი გურიას" სამეგრელო – გურიის რეგიონალური დირექტორი ვახტანგ ბერიშვილი " გურია ნიუსთან" აცხადებს, რომ გაზიფიცირებასთან დაკავშირებული სამუშაოები პირნათლად არის შესრულებული.
"მთელი დვაბზუს გაზიფიცირება ჩაბარებული აქვს ზედამხედველობას, აბსოლუტურად ყველა სტანდარტისა და წესის დაცვით არის გაკეთებული. სრული პასუხისმგებლობით შემიძლია გითხრათ, რამდენიმე დღის წინ ჩავრთეთ ზუსტად ეკლესიის უბანი. ცენტრალურ მაგისტრალთან მიერთება იყო საჭირო.
გაზი თუ გაშვებული არ არის, ეს იმიტომ, რომ შესაძლებელია, დოკუმენტალური მხარე ბოლომდე მოგვარებული არ არის.
შესაბამისი მიღება -ჩაბარებისა და ექსპლუატაციაში გაშვების აქტები, ყველაფერი უნდა იყოს ბოლომდე გაკეთებული, რომ გაზი მაგისტრალში გავვუშვათ, თუმცა, მაქვს ინფორმაცია, რომ გაზი მთელ დვაბზუში უკვე გაშვებულია", _ გვითხრა ბერიშვილმა.
