"ერთიანი ნაციონალური მოძრაობის" ინფორმაციით, EPP-ს რიგის დეკლარაცია საქართველოს სუვერენიტეტს მხარს უჭერს, თუმცა დემოკრატიის უკან დახევაზე საუბრობს.
გუშინ საღამოს, წამყვანი პანევროპული პოლიტიკური გაერთიანების, ევროპის სახალხო პარტიის რიგის შეხვედრაზე, აღმოსავლეთ პარტნიორობის რიგის სამიტისადმი მიძღვნილი დეკლარაცია მიიღეს, სადაც საქართველოსა და ჩვენი ქვეყნისთვის დიდი მნიშვნელობის მქონე საკითხებზე რამდენიმე პრინციპული პოზიციაა დაფიქსირებული.
კერძოდ, "ნაციონალური მოძრაობის" ინფორმაციით, რუსეთის მოქმედება უკრაინაში შეფასებულია როგორც ერთმნიშვნელოვანი აგრესია. ამავე დროს, საქართველოსა და უკრაინის ტერიტორიების, მათ შორის ყირიმის ოკუპაციის საკითხები განხილულია როგორც ერთი პრობლემის ნაწილები. დაგმობილია რუსეთის მიერ ევროკავშირის შუამდგომლობით მიღწეული ცეცხლის შეწყვეტის შესახებ ხელშეკრულების არშესრულება და მათთან ე.წ. ხელშეკრულებების გაფორმება "რაც ამ რეგიონების დე ფაქტო ანექსიის ტოლფასია, წარმოადგენს საერთაშორისო სამართლის უხეშ დარღვევას და ძირს უთხრის მშვიდობას ევროპაში."
"EPP-ს ლიდერების, რომელთა შორის ცივილიზებული სამყაროს მნიშვნელოვანი ლიდერების, მათ შორის გერმანიის კანცლერის მიერ რუსეთის მიერ საქართველოსა და უკრაინის მიმართ აგრესიის ერთ კონტექსტში განხილვა, ჩვენი ქვეყნისთვის ძალიან მნიშვნელოვანია, რადგან მხოლოდ ამ გზითაა შესაძლებელი დეოკუპაციის საკითხის საერთაშორისო დღის წესრიგში აქტუალობის შენარჩუნება,"_ აღნიშნა პარლამენტის წევრმა გიორგი კანდელაკმა დღეს გამართულ პრესკონფერენციაზე.
"ნაციონალური მოძრაობის" ინფორმაციით, დეკლარაციაში ასევე გამოთქმულია შეშფოთება საქართველოში მიმდინარე დემოკრატიის უკანდახევის გამო – "გამოვხატავთ შეშფოთებას პოლიტიკურ ოპონენტთა სამართლებრივი დევნით, შერჩევითი მართლმსაჯულებით და ძალადობრივი ინციდენტებით ოპოზიციის წინააღმდეგ საქართველოში. მოვუწოდებთ საქართველოს მთავრობას, ძალისხმევა მიმართოს სასამართლო პროცესების მონიტორინგის შესახებ OSCE/ODIHR-ის 2014 წლის მოხსენებაში მითითებული პრობლემების გადასაწყვეტად და ასოცირების შესახებ შეთანხმების დღის წესრიგის რეალიზაციაზე".
დეკლარაციაზე ხელმომწერი ლიდერები ასევე აფიქსირებენ საქართველოსთვის უვიზო რეჟიმის მინიჭების საკითხის მხარდაჭერას – "მას შემდეგ, რაც ევროკავშირის საბოლოო შემფასებელი მოხსენება გამოქვეყნდება."
"სავარაუდოდ და სამწუხაროდ, საქართველო ვერც მკაფიო პერსპექტივას ევროკავშირში გაწევრიანებას და ვერც უვიზო მიმოსვლას ვერ მიიღებს. აქტიური ლობირების კამპანიის ნაცვლად, მთავრობამ მთელი ენერგია ოპონენტების დევნის გასამართლებლად დახარჯა. საერთაშორისო ფაქტორებთან ერთად, ეს პირდაპირი შედეგია მთავრობის უნიათო, არაკომპეტენტური პოლიტიკის, ეკონომიკური კრახისა და კრიმინალის, მათ შორის საქართველოში ორგანიზებული დანაშაულის გაძლიერების. ცხადია, ნეგატიურ ფონს ხელი შეუწყო ოპონენტების დევნამაც. ჩვენ, როგორც ქვეყანამ უნდა გავაგრძელოთ მუშაობა ჩვენი ევროპული მომავლისთვის – ამას ალტერნატივა არ აქვს. ჩვენ როგორც ოპოზიცია ვაგრძელებთ მუშაობას და EPP დეკლარაცია შეიცავს ყველა კომპონენტს, რაც კი საქართველოს სჭირდება. მომავალ თვეებშიც, ამ მიმართულებით, ყველა ღონეს ვიხმართ, მაგრამ ევროპული მომავლის აშენება შეუძლებელია ქვეყნის შიგნით ვითარების შეცვლის გარეშე," _ დასძინა კანდელაკმა.
ევროპის სახალხო პარტია (European People’s Party – EPP) მემარჯვენე ცენტრისტული ყველაზე დიდი პანევროპული პოლიტიკური გაერთიანებაა, რომელშიც მრავალი ევროპული ქვეყნის წამყვანი პარტიები და ლიდერები ერთიანდებიან.
