დღეს, ოზურგეთის მუნიციპალიტეტის საკრებულოს რიგგარეშე სხდომა გაიმართა, რომელიც დეპუტატებს შორის დაპირისპირებასა და ხმაურის ფონზე წარიმართა.
საკრებულოს ხდომას გურიის გუბერნატორი გია სალუქვაძე დაესწრო.
"დიდი ხანია მაქვს სურვილი, შევხვედროდი საკრებულოს წევრებს, ჩვენ ყველას გვაერთიანებს გურიის სიყვარული, მზად ვარ ვიდგე თქვენს გვერდით და განვიხილო ყველა ის საკითხი, რომელიც ჩემს უფლებამოსილებაშია, მადლობას გეტყვით რასაც აკეთებთ, მაქსიმალურად შევეცადოთ ოზურგეთის, გურიის აღორძინებაში ჩვენი წვლილი შევიტანოთ, თქვენ ყველას გისურვებთ წარმატებებს და წინსვლას" რამდენიმე დღეში მე წარვსდგები საზოგადოების წინაშე იმ განსახორციელებელი მეგა პროექტებით, რომელიც დაისახა და უნდა განხორციელდეს უახლოესს პერიოდში. გუშინ ვიყავი გამგებელთან მერაბ ჭანუყვაძესთან ერთად და დავათვალიერე პროექტები, მინდა გითხრა რომ კმაყოფილი ვარ რაც კეთდება, თუმცა კიდევ ძალიან ბევრი რამეა გასაკეთებელი" _ განაცხადა გურიის გუბერნატორმა, საკრებულოს სხდომაზე.
გუბერნატორის სიტყვით გამოსვლის შემდეგ საკრებულოს დეპუტატმა "ნაციონალური მოძრაობიდან" დავით მჟავანაძემ სიტყვა ითხოვა და გუბერნატორს მიმართა:
"ბატონო გუბერნატორო, მაინტერესებს, სამი წელია რაც " ქართული ოცნება " ხელისუფლებაშია და მე როგორც მაქვს ინფორმაცია არ არსებობს გურიის განვითარების გეგმა, გაქვთ თუ არა თქვენ ხედვა და როგორ წარმოგიდგენიათ გურიის განვითარების სტრატეგიული გეგმები, თუ წამოხვედით ისე, რომ ეს არ წარგიდგენიათ? თუ თქვენ დაინიშნეთ იმ ფილმების ჩვენების გამო, რაც აჩვენეთ ბავშვებს და საზოგადოებას? " _განაცხადა მჟავანაძემ.
გუბერნატორმა პასუხი უმალ მიაგება და ასევე კითხვით მიმართა:
"სწორედ ამაზე გესაუბრეთ ახლა, რომ უახლოესს პერიოდში წარვადგენ განსახორციელებელი და მიზნად დასახული პროექტების სიას, ხედვებს და გეგმებს, რაც შეეხება თქვენს კითხვას ფილმთან დაკავშირებით, ფილმი ეხება იმ რეალობას, რომელიც იყო იმ პერიოდში. გეკითხებით, არის თუ არა ის ფილმი იმ რეალობაზე დაყრდნობილი? ასახავს თუ არა ის ფილმი იმ რეალობას რაც იყო წინა წლებში? თუ შევთანხმდებით, რომ ეს იყო რეალობა, მაშინ ამ ფილმს აქვს იმის უფლება რომ საზოგადოებამ ნახოს", _ განაცხადა გია სალუქვაძემ.
გუბერნატორის მიერ აღნიშნულ განცხადებებს დეპუტატებისა და საკრებულოს დარბაზში მსხდომი საჯარო მოხელეების მხრიდან ტაში მოჰყვა.
ამის შემდეგ დავით მჟავანაძესა და საკრებულოს სხვა დეპუტატებს შორის დაპირისპირება და სიტყვიერი შეურაცხყოფა რამდენიმე წუთი გაგრძელდა.
"ეს იყო მისაღები არასწრულწლოვნებისთვის? მესმის თქვენი გაღიზიანება", _ აღნიშნა დავით მჟავანაძემ.
"ჩვენ ვიყავით ფილმის ჩვენების ორგანიზატორები, თუმცა ამის ჩვენების კონტროლი საზოგადოებისთვის ჩვენ არ შეგვეძლო, იქ იყო თქვენი მეგობრების, თავისუფალი ზონის მიერ მოყვანილი ბავშვები, განათლების სამინისტრომ მოკვლევა ჩაატარა და არსად არ დასტურდება მსგავსი რამ, ჩვენი არასამთავრობო არ ფიგურირებს იმ ბავშვების მოყვანით ამით მე ვამთავრებ თქვენთან პოლემიკას", _ განაცხადა გუბერნატორმა.
საკრებულოს სხდომაზე ლელა ნაცვალაძესა და დავით მჟავანაძის შორის სიტყვიერი შეურაცხყოფაც მოხდა.
ნაცვალაძემ " ნაციონალებს" დემაგოგები და "საწყლები" უწოდა, რაზეც დავით მჟავანაძემ ნაცვალაძეს "აქეთ-იქეთ პარტიაში მოხტუნავე" უწოდა
"გურია ნიუსი" ამ საკითხზე ვრცელ სიუჟეტს რამდენიმე წუთში შემოგთავაზებთ.
