რიგაში დღეს აღმოსავლეთ პარტნიორობის რიგით მეოთხე სამიტის პლენარული სესია გაიხსნა, რომელშიც ევროკავშირის 28 წევრი სახელმწიფოსა და აღმოსავლეთის პარტნიორობის მონაწილე ექვსი ქვეყნის, საქართველოს, უკრაინის, მოლდოვას, ბელორუსიის, სომხეთისა და აზერბაიჯანის წარმომადგენლები მონაწილეობენ.
ევრონესტის საპარლამენტო ასამბლეის თანა პრეზიდენტის რანგში სამიტზე იმყოფება პარლამენტის წევრი, ვიქტორ დოლიძე.
"მოგმართავთ როგორც ევროკავშირის ასპირანტი ქვეყანის მოქალაქე. "მე ვარ ქართველი, მაშასადამე, ვარ ევროპელი!" – ეს არის სიტყვა, რომელიც საქართველოს პრემიერ-მინისტრმა ზურაბ ჟვანიამ ევროსაბჭოს გენერალურ ასამბლეას, 1999 წელს მიმართა. მას შემდეგ, მოვლენები მკვეთრად შეიცვალა.
დღეს საქართველო არის უფრო დემოკრატიული, მეტად განვითარებული და ევროპული ღირებულებებზე დაფუძნებული.
ჩვენ გვჭირდება ვიზა ევროპაში, ხოლო ევროპას კი სჭირდება გაერთიანებული, უსაფრთხო და ძლიერი საქართველო ევროპული მომავლით“, – ამ სიტყვებით მიმართა პლენარულ სესიას ვიქტორ დოლიძემ.
მან სიტყვით გამოსვლისას აღმოსავლეთ პარტნიორობის მნიშვნელობაზე, ევრონესტის საპარლამენტო ასამბლეის მუშაობაზე, ასოცირებული ქვეყნების (საქართველო, მოლდოვა, უკრაინა) მისწრაფებებზე, მათ ევროპულ პერსპექტივაზე და საქართველოსა და უკრაინისთვის ევროკავშირის ქვეყნებთან თავისუფალი მიმოსვლის მინიჭების მნიშვნელობაზე ისაუბრა.
„2014 მნიშვნელოვანი წელი იყო აღმოსავლეთ პარტნიორობის ქვეყნებისთვის. ჩვენ მოხარულები ვართ, რომ საქართველომ და მოლდოვამ ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმება (DCFTA) უკვე გააფორმა, რომელსაც უკრაინა 2016 წლის იანვარში შეუერთდება.
ჩვენ გვჯერა, რომ აღმოსავლეთ პარტნიორობის ქვეყნები ისევე, როგორც ევროკავშირის წევრი ქვეყნები, სახელმწიფოს დამოუკიდებლობის, სუვერენიტეტის, ტერიტორიული მთლიანობისა და საზღვრების ურღვევობის პრინციპის მხარდამჭერები იქნებიან. ჩვენ ვგმობთ ყირიმის ანექსიას და ზოგადად, რუსეთის მიერ უკრაინაში განხორციელებულ აგრესიულ სამხედრო ქმედებებს“, – განაცხადა ვიქტორ დოლიძემ.
თავისი გამოსვლისას მან ქვეყანაში უკვე განხორციელებულ და მიმდინარე რეფორმებზე და ამ პროცესში საკანონმდებლო ორგანოს როლზეც გაამახვილა ყურადღება.
ვიქტორ დოლიძემ ევროკავშირის წევრი ქვეყნებისა და აღმოსავლეთ პარტნიორობის ქვეყნების მოქალაქეების უვიზო მიმოსვლის მნიშვნელობაზე ისაუბრა და აღნიშნა, რომ ეს ხელს შეუწყობს ევროპული ღირებულებების და აზრის გავრცელებასა და ამ ქვეყნების მოქალაქეთა კიდევ უფრო დაახლოებას.
აღმოსავლეთ პარტნიორობის რიგის სამიტის პლენარულ სესიაზე მონაწილეები ერთობლივ დეკლარაციას მიიღებენ რომელშიც, სხვა საკითხებთან ერთად, საქართველოს, მოლდოვისა და უკრაინის ვიზა ლიბერალიზაციის შესახებ იქნება საუბარი.
საქართველოს დელეგაციას პრემიერ-მინისტრი ირაკლი ღარიბაშვილი ხელმძღვანელობს. მასთან ერთად რიგაში იმყოფებიან საქართველოს საგარეო საქმეთა მინისტრი თამარ ბერუჩაშვილი და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე.
