დარგობრივი ეკონომიკისა და ეკონომიკური პოლიტიკის კომიტეტის დღევანდელ სხდომაზე, რომელსაც კომიტეტის თავმჯდომარე ზურაბ ტყემალაძე უძღვებოდა, "რეკლამის შესახებ" საქართველოს კანონში ცვლილების შეტანის თაობაზე" კანონპროექტი მეორე მოსმენით განიხილეს.
საკითხი მთავრობის საპარლამენტო მდივანმა შალვა თადუმაძემ წარადგინა, რომლის განცხადებითაც, კანონპროექტის ავტორებმა პირველი მოსმენისას გამოთქმული შენიშვნები გაითვალისწინეს და კანონპროექტში შესაბამისი ცვლილებებიც შეიტანეს.
წარმოდგენილი მთავრობის საკანონმდებლო ინიციატივის მიზანია 2015 წლის უეფა-ს სუპერთასის ჩატარებასთან დაკავშირებით, საქართველოს მთავრობის მიერ ფეხბურთის ასოციაციების კავშირის წინაშე ნაკისრი ვალდებულებების შესრულება.
კანონპროექტის თანახმად, „რეკლამის შესახებ“ საქართველოს კანონის გარდამავალ დებულებას ემატება ჩანაწერი, რომლის თანახმად, 2015 წლის სუპერთასის და მასთან დაკავშირებული ღონისძიებების ფარგლებში, უეფა-ს ნებართვის გარეშე იკრძალება ნებისმიერი რეკლამა ან სხვა ქმედება, რომელიც ხორციელდება არაუფლებამოსილი მესამე პირების მიერ, უეფა-ს რეპუტაციით სარგებლის მიღების მიზნით. ცვლილებების მიხედვით, იკრძალება აგრეთვე მატჩზე დასასწრები ბილეთების უეფა-ს ნებართვის გარეშე გაყიდვა ან ნებისმიერი სახის კომერციულ ღონისძიებაში გამოყენება.
გათვალისწინებული შენიშვნის მიხედვით, 2015 წლის სუპერთასის და მასთან დაკავშირებული ღონისძიებების გამართვისათვის საქართველოს მთავრობამ მის მიერ ნაკისრი ვალდებულებების უზრუნველყოფის მიზნით, კანონის მიღებიდან ერთი თვის ვადაში შესაბამის კანონქვემდებარე ნორმატიული აქტი უნდა მიიღოს.
კომიტეტის წევრებმა წარმოდგენილ კანონპროექტს და მის გატანას პარლამენტის პლენარულ სხდომაზე, ერთხმად დაუჭირეს მხარი.
