ბოლო დღეებში ლანჩხუთის მუნიციპალიტეტის რამდენიმე სოფელში მსხვილფეხა რქოსანი პირუტყვის ცოფის შემთხვევები დაფიქსირდა. კერძოდ, საუბარია სოფელ მაჩხვარეთის კუთვნილ ფერმის ტერიტორიასა და ნიგოითის ადმინისტრაციულ ერთეულში შემავალ სოფლებზე.
როგორც სურსათის ეროვნული სააგენტოს გურიის რეგიონალური სამმართველოს მთავარმა სპეციალისტმა ხათუნა რუსიძემ გაგვიცხადა, პირველი შემთხვევა მაჩხვარეთის ფერმაზე დაფიქსირდა, სადაც სამ რქოსან პირუტყვს აღენიშნებოდა ცოფის სიმპტომები, ხოლო ორი შემთხვევა გამოვლინდა სოფელ ჩოლობარგში და ერთიც სოფელ ნიგოითში.
"ლაბორატორიულად ეს შემთხვევები დადასტურებულია, ამ ეტაპზე ორი პირუტყვი განადგურებულია, სამი კი დაკვირვების ქვეშ იმყოფება. ფერმის ტერიტორიაზე უკვე გამოცხადებულია შეზღუდვა, სადაც მთელი რიგი პროფილაქტიკური ღონისძიებები ტარდება. მათ შორის იკრძალება საქონლის გაყიდვა ან ყიდვა, ასევე ხორციელდება ამ ზონაში არსებული ყველა საქონლის იძულებითი ვაქცინაცია.
რაც შეეხება ნიგოითსა და ჩოლობარგს, აქ უახლოეს მომავალში გატარდება იგივე ღონისძიებები“, -განაცხადა ხათუნა რუსიძემ.
ამ ფაქტებმა მოსახლეობაში გარკვეული პანიკის ნიშნები შექმნა, რასაც გადაჭარბებულად მიიჩნევს მუნიციპალიტეტის ჯანდაცვის ცენტრის ექიმი-ეპიდემიოლოგი ნატო მენაღარიშვილი.
"საერთოდ, ცოფი გადადის მხოლოდ დაკბენით, დაკაწვრითა და დადორბვლით. მოსახლეობა რატომღაც შეშინებულია და მინდა მათ საყურადღებოდ ვთქვა, რომ სანამ პირუტყვს დაავადების კლინიკური ნიშნები გამოუვლინდება, არ არის საშიში მისი რძისა და ყველის გამოყენება.
აქვე უნდა განვაცხადო, რომ თუ ვინმე შეატყობს რომ პირუტყვს აღენიშნება უმადობა და სხვა რაიმე სახის სიმპტომი, ვურჩევთ, რომ აუცილებლად მიმართონ ვეტერინარულ სამსახურს და თვითნებურად არ დაიწყონ მკურნალობა.
საერთოდ, ასეთ შემთხვევაში პირუტყვთან შეხებისას მაქსიმალურად უნდა დაიცვან სანიტარული ნორმები და გამოიყენონ სპეციალური ხელთათმანი“, _ ამბობს ნატო მენაღარიშვილი.
რაც შეეხება ვაქცინაციას, ის 23 მაისიდან დაიწყება, თუმცა, როგორც ხათუნა რუსიძე აცხადებს, ვაქცინა აცრიდან 21 დღის შემდეგ იწყებს მოქმედებას და თუ ამ დროის მონაკვეთის გასვლამდე ან აცრამდე მოხდა პიუტყვის დაკბენა, მაშინ ბუნებრივია ვაქცინა ვერ იმოქმედებს და მისი დაავადების ალბათობაც დიდია.
საგულისხმოა ის ფაქტი, რომ ჯერ კიდევ 24 აპრილს ნიგოითის ტერიტორიაზე მგელმა ადამიანი დაკბინა, რომელმაც დოულად მიმართა სამედიცინო ცენტრს და ცაუტარდა შესაბამისი პროფილაქტიკური ღონისძიებები.
სპეციალისტები ვარაუდობენ, რომ ამ შემთხვევასა და ზემოთ მოყვანილ ფაქტებს შორის გარკვეული კავშირი არსებობს.
