როგორ აისახება ტრანსპორტის გაძვირება მოსახლეობის ბიუჯეტზე

სამარშრუტო ტაქსების მძღოლების მიერ მიღებულ გადაწყვეტილებასთან დაკავშირებით, რომ უახლოეს მომავალში, შესაძლოა, მგზავრობის საფასური გაძვირდეს, თბილისში მცხოვრებთა უმრავლესობას ინფორმაცია არ აქვს.

გავრცელებული ინფორმაციით, სამარშრუტო ტაქსების მძღოლებმა ეს გადაწყვეტილება გაზისა და თხევადი საწვავის გაძვირების გარდა, ტრანსპორტის ნაწილების სიძვირითაც ახსნეს.

თუმცა, დედაქალაქის წამყვან ავტოსადგურებში აცხადებენ, რომ ტარიფის გადახედვას არ გეგმავენ და საქალაქთაშორისო ტრანსპორტის მგზავრებს ტარიფი არ გაუძვირდებათ; მაგრამ შიდასაქალაქო მიკროავტობუსების მძღოლები ირწმუნებიან, რომ მგზავრობა რამდენიმე თვეში გაძვირდება.

"გურია ნიუსი" ეცადა გაერკვია, საზოგადოების დამოკიდებულება აღნიშნულთან დაკავშირებით და ქუჩაში შერჩევითი მეთოდით მოქალაქეები გამოკითხა.

ირაკლი, 55 წლის, უმუშევარი: "მცირე შემოსავალი მაქვს, ამიტომ  ძალიან დააზარალებს ჩემი ოჯახის ბიუჯეტს.  ძირითადად, ავტობუსით და მეტროთი დავდივარ იშვიათად ვჯდები "მარშუტკაში"  შემოსავლის ნაკლებობის გამო. მაგრამ მეტრო ჩემს სახლს არ უდგება და მერე ფეხით მიწევს დიდი მანძილის გავლა. ადრე ვმგზავრობდი ვიდრე გაძვირდებოდა, მაშინ 50 თეთრი ღირდა."

თიკო, 30 წლის, უმუშევარი:"არაფერი ვიცი, პირველად გავიგე რომ შეიძლება გაძვირდეს. თუ გაძვირდება ძალიან ცუდი იქნება. ეს არამარტო ჩემს, არამედ ყველას ბიუჯეტზე აისახება."

ლანა, 55 წლის, დასაქმებული: "პირველად მესმის, მაგრამ თუ გაზი და დენი  მოიმატებს, არც ეგ გამიკვირდება. ძალიან ცუდია და ჩემს ბიუჯეტზე ცუდად აისახება."

თამარი, 72 წლის, პენსიონერი: "არ ვსარგებლობ სამარშრუტო  ტაქსებით იმიტომ, რომ ძვირია. კიდევ უნდა გააძვირონ? პენსიონერი ვარ და ავტობუსით ვმგზავრობ, შეღავათი მაქვს. კიდევ თუ გააძვირეს არ იქნება კარგი. აღარავინ ჩაჯდება და ფეხით ივლიან".

მაკა, 35 წლის, დიასახლისი: " ჩემი ოჯახის ბიუჯეტს ძალიან დააზარალებს თუ გაძვირდა. არ არის სასურველი,  მაგრამ ყველაფერი ძვირდება და მაინც ხომ ვყიდულობთ? სადაც  80 თეთრს ვიხდი თუ დამჭირდა მეტსაც გადავიხდი."

ინეზა, 50 წლის, დიასახლისი: "არასასიამოვნო ფაქტია.  ახლაც მიმაჩნია, რომ ძვირია. არ არის ყველასთვის ხელმისაწვდომი და კიდევ  ფასის გაზრდა კატასტროფაა. ჩვენ ხომ არაფერი გვეშველა? ყველაფერი  ხალხის წინააღმდეგ  ხდება."

დიანა, 52 წლის: "მე არ დავდივარ ტრანსპორტით. ისე როგორც ვიცი ბენზინი გაძვირდა და ქუჩაში მანქანების ნაკლებობა იგრძნობა.  მაგრამ ძალიან ცუდი იქნება  მოსახლეობისთვის თუ  გააძვირებენ."

ეკა, 23 წლის, სტუდენტი: "არ მაქვს ინფორმაცია, თუმცა მგზავრობის გაძვირება ნაკლებად შემეხება. სტუდენტი ვარ და სტუდენტური ბარათით ვმგზავრობ. ისევ 20 თეთრი დარჩება  ჩემთვის."

ნინო ჭელიძე , "მე რეპორტიორის" რედაქტორი: "ტრანსპორტის გაძვირების შესახებ დადასტურებული ინფორმაცია არ მაქვს, თუმცა საზოგადოებაში პერიოდულად ისმის ამ თემაზე საუბარი. ტრანსპორტი თუ გაძვირდება ჯაჭვური რეაქციით გამოიწვევს გადაადგილების სხვა საშუალებების გაძვირებასაც, ასევე ფართო მოხმარების  პროდუქტზე ფასების მცირედ მატებას. სამწუხაროდ, ამ ფონზე ხელფასები, როგორც საჯარო, ასევე სახელმწიფო სტრუქტურებში  არ გაიზრდება."

ირინა, 33 წლის: ტრანსპორტის გაძვირებაზე არაფერი მსმენია . თუმცა, ზედმეტი 10 ან თუნდაც 15 თეთრით, რომ არის პროდუქტები გაძვირებული, საბოლოო ჯამში ყოველთვე ოჯახის ხარჯი საკმაოდ სოლიდურ თანხას  აღწევს და ამ ვითარებაში ტრანსპორტის გაძვირებაც მოსახლეობისთვის დიდი ფინანსური დარტყმა  იქნება ."

ლევანი,  42 წლის, უმუშევარი: "არ მსმენია ტრანსპორტის გაძვირებასთან დაკავშირებით არაფერი. როცა ქვეყანაში უმუშევრობაა და სტაბილური შემოსავალი თითქმის არავის ააქვს და  ადამიანებს ცხოვრება დღითიდღე უძნელდება და უძვირდება. სასურველი ნამდვილად არ არის კიდევ გაძვირდეს. რა თქმა უნდა,  ჩემი ოჯახის ბიუჯეტსაც ძალიან დააზარალებს."

არჩილი, 25 წლის: "ხელფასი  მაინც გამიზარდონ, ასე რომ აძვირებენ ყველაფერს. თუ გაძვირდება, რა თქმა უნდა, დარწმუნებული ვარ არა მარტო მე, ყველას გაგვაღატაკებს".

ლიზი, 23 წლის: "ხელფასს თუ მოგვიმატებენ არ  დავზარალდებით."

აღსანიშნავია რომ მოქალაქეების დიდმა ნაწილმა დასმულ კითხვაზე პასუხის გაცემას თავი აარიდა.