ნაკადული სოფელია ჩოხატაურის მუნიციპალიტეტში, კოხნარის თემში. მდებარეობს მდინარე ხევისწყლის ხეობაში, ზღვის დონიდან 280 მეტრზე.
ეს სოფელი გურიაში ერთ-ერთი მცირემიწიანი დასახლებაა. როგორც აქაურები ყვებიან, სწორედ ამ მიზეზით, კომუნისტებმა მათ საყანე ფართობები ლანჩხუთის მუნიციპალიტაეტის ტერიტორიაზე გამოუყვეს.
სოფელი, სადაც 65 ოჯახი ცხოვრობს, ტყითაა გარშემორტყმული.
აქაურები ამაყად გვიყვებიან, რომ სოფელში უნიკალური წყაროებია და სწორედ ამიტომაც ჰქვია მათ სოფელ ნაკადული.
სოფელს პატარა ცენტრი აქვს. წლების წინ ამ ცენტრში სკვერი იყო, რომელიც დღეს შეკეთებას საჭიროებს. სკვერის ცენტრში ქალის ქანდაკებაა _ "მწუხარე დედა ელოდება ფრონტზე წასულ შვილებს" _ ვკითხულობთ ქანდაკებაზე.
როგორც ირკვევა, ეს ქანდაკება სამამულო ომში 1941-45 წლებში დაღუპულ ძმებს _ სერგოს, დავითს და თანასოფლელ მებრძოლებს საშა (ალექსანდრე) გრიგოლის ძემ მიუძღვა _ სამწუხაროდ, აბრაზე გვარი არ იკითხება.
ახლა, სოფელში ყველამ იცის, რომ ფრონტზე წასულები არ დაბრუნდებიან, თუმცა ამბობენ, რომ ფრონტზე თავად ცხოვრობენ:
_ რად გვინდა ვინმეს დალოდება, ფრონტზე ვცხოვრობთ ისედაც. თქვენი თვალით ხედავთ, რა მდგომარეობაა სოფელში. სამსახური ჩვენ არ გვაქვს, მიწა ჩვენ არ გაგვაჩნია _ ერთი ტყე გვაქვს და იქაც არავინ გვიშვებს, _ გვეუბნებიან ნაკადულელები.
თინა ჩიგოგიძე 62 წლისაა. საცხოვრებელი სახლი სტიქიამ 2004 წელს დაუზიანა. დღეს სახელდახელოდ შეჭედილ ფიცრულში ცხოვრობს, რომელიც ნებისმიერ დროს შეიძლება დაინგრეს:
_ სახლი 2004 წელს სტიქიამ დაანგრია. მალე ჩემი მეუღლე გარდაიცვალა და ვერაფრის შემატება ვერ შევძელი. რითი უნდა მექნა _ სამსახური მე არ მქონდა და პენსია. ერთი შვილი მყავს, გოგონა, რომელსაც მისი ბევრი პრობლემა აქვს _ განსაკუთრებით, ჯანმრთელობის. ჩემი დამხმარე არავინაა. მხოლოდ ერთს ვთხოვ ხელისუფლებას _ ისე მომიხერხონ, რომ როცა მოვკვდები, ჩემს შვილს კუბოს დასადგმელი ადგილი ჰქონდეს, _ გვეუბნება ქალბატონი თინა, რომელსაც საუბარში ცრემლები უშლის ხელს.
მისივე თქმით, ერთადერთი შვილი ბათუმში, დაგირავებულ სახლში ჰყავს:
_ აქ ვერ მომყავს. როგორ შეიძლება ამ სახლში ჩვილი ბავშვები გყავდეს. 82 წლის დედა ამდენ ხანს აქ მყავდა, მაგრამ სხვაგან მოვუძებნე თავშესაფარი. ყოველ ღამე შიშით ვწვები. თქვენც ხედავთ, რომ პირველყოფილივით ვცხოვრობ. დახმარებას მპირდებიან, მაგრამ ამ დაპირებებში წლები გადის, _ ამბობს თინა ჩიგოგიძე.
ფატი ახალაძე "გურია ნიუსთან" საუბრისას ამბობს, რომ ნაკადულელებს ბევრი პრობლემა აქვთ:
_ არქონება ყველაზე დიდი პრობლემაა. საყანე ფართობი ჩვენ არ გვაქვს და სამსახური. ტყეში ვცხოვრობთ და ერთი ბოლი ვერ მოგვიტანია _ იმაზეც გვაჯარიმებენ. ბევრი დააჯარიმეს ამ სოფელში შეშის მოჭრის გამო _ რომელი გაბედავს ტყეში შესვლას?! არ ვიცით, რა უნდა ვქნათ, ხეზე ნაყოფი არაა, საქონელს ვერ ვზრდით _ ტყეში გაუშვებ და დღე მგელი ჭამს, ღამე თუ დარჩა გარეთ _ დათვი, _ ამბობს ახალაძე.
მზევინარ ახალაძე ხელისუფლებას დიდი ხანია სახლის გადასახურად მასალის გამოყოფას სთხოვს:
_ ავადმყოფი მეუღლე მყავს _ სულ წამლებზეა. ხელისუფლებას მხოლოდ ერთს ვთხოვ _ სახლი მაქვს დასახური და მომცენ შეღავათი, მასალა გამომიყონ, სახლი რომ გადავხურო. თუნუქი მაქვს და ხეობის არქონის გამო ვერ ვხურავ. წყალი ჩამომდის, _ გვიყვება მზევინარ ახალაძე, რომლის თქმით, ეს პრობლემა ნაკადულში ბევრს აწუხებს.
ამ სოფლის მაცხოვრებლების უმრავლესობა სოციალურად დაუცველია. უმეტეს შემთხვევაში, სწორედ სოციალური დახმრებაა მათი ერთადერთი შემოსავალი.
_ სახლში მოხუცი, საწოლს მიჯაჭვული მამამთილი მყავს. თებერვალში დავწერე განცხადება გამგებლის სახელზე ერთჯერადი დახმარების მიღების თხოვნით. გამგებლის წარმომადგენლის რეკომენდაციაც მქონდა, მაგრამ არაფერი ჩანს დღემდე. მართალია, სოციალურ დახმარებას ვიღებ, მაგრამ წამლებში არ გვყოფნის აღებული თანხა, _ ამბობს ჩვენთან საუბარში მაყვალა გორგოძე.
სოფელში გზების პრობლემებზეც ამახვილებენ ყურადღებას. ამბობენ, რომ მოხრეშვაზე დიდი თანხა იხარჯება, თუმცა უშედეგოდ, რადგან ხრეში წვიმას ერთბაშად მიაქვს.
გვიყვებიან იმასაც, რომ უკიდურესი გაჭირვების გამო, სოფელი ბევრმა ოჯახმა დატოვა.
კოხნარის თემში გამგებლის წარმომადგენელი გელა ვაჩეიშვილი "გურია ნიუსთან" ამბობს, რომ ნაკადულელების პრობლემების შესახებ ადგილობრივი ხელისუფლება საქმის კურსშია:
_ ხე-ტყესთან დაკავშირებით ბევრი პრობლემაა და ყველა ცდილობს ამის მოგვარებას. ალბათ, იცით, როგორია კანონი _ ყველგან არ შეიძლება ტყეკაფის გამოყოფა. სატყეო დეპარტამენტში დაგვპირდნენ, რომ რაღაც გამოსავალს მოძებნიან, _ გვითხრა ვაჩეიშვილმა.
ჩოხატაურის მუნიციპალიტეტის გამგეობის სოციალური სამსახურის უფროსის ნუკრი დუმბაძის თქმით, თინა ჩიგოგიძეს ივლისში 3 000 ლარით დაეხმარებიან. მისივე ინფორმაციით, 150-ლარიან ერთჯერად დახმარებას ივნისის თვეში მიიღებს მაყვალა გორგოძეც.
_ მზევინარ ახალაძეს მასალის გამოყოფის თაობაზე გამგეობისთვის არ მოუმართავს. თუკი მსგავსი განცხადებით შემოვა, გადავცემთ გუბერნიას, _ გვითხრა დუმბაძემ.
