ოზურგეთის მუნიციპალიტეტის სოფელ ნაგომარში მცხოვრებლებმა "გურია ნიუსს" რამდენიმე დღის წინ, ოფიციალურად მიწერეს წერილი და დახმარება სთხოვეს:
"ამ წერილს ოზურგეთის მუნიციპალიტეტის სოფელ ნაგომრის მცხოვრებლების, მედგარი და ზაზა კოპლატაძეების თხოვნით გწერთ. ამ ორ პიროვნებას სიმინდის სათესლე მასალა ტრაქტორისტებმა დაულპო. რადგან ქვიანი ადგილია სიმინდი მარტო დახნულ მიწაში დაათესინეს, საღამოს მოვალთ და დავფაცხავთო. ეს იყო 28 აპრილს. ტრაქტორისტები სხვა სოფლებში გადავიდნენ სამუშაოდ…. ყანამ უკვე დაასრულა ამოსვლა. საქმის კურსშია ჩაყენებული სოფლის გამგეობა და მუნიციპალიტეტის საკრებულო. თუმცა, შედეგი არანაირი. ეს ტრაქტორი შევისყიდეთ, კერძო საკუთრებაა და სადაც გინდათ იქ გვიჩივლეთო…. მივმართეთ სოფლის მეურნეობის სამინისტროს მაგრამ შედეგი ისევ არანაირი. ბოლო გამოსავალი თქვენ დაგვრჩით, იქნებ დაეხმაროთ ტრაქტორისტები გაიძახიან, სადაც გინდა იქ მიჩივლეთ ტრაქტორი ჩემი შესყიდულია ძველი კოლმეურნეობიდანო, აქ არ იყო საუბარი რომ კუთვნილ თანხას ვერ მიიღებდნენ ან ვაუჩერს გამოიყენებდნენ. ახლა მე თქვენ გამოგიგზავნით სურათს სადაც ნახავთ, როგორ საცოდავადაა ბელტებში ამოსული ყანა. თქვენ თვითონ განსაჯეთ, გვალვის შემთხვევაში მოხერხდება თუ არა ამ ყანის შემდეგი დამუშავება, გათოხნა. ან საერთოდ ივარგებს კი ყანად? ოჯახს ხელახლა არც მიწის დამუშავების და არც სათესლე მასალის შეძენა არ შეუძლია. რა ქნას უმუშევარმა ხალხმა მშივრები დარჩნენ. გთხოვთ, თქვენებურად გამოიძიოთ ეს საქმე, იქნებ მერე მაინც მიხედოს ვისაც ევალება", _ აღნიშნული იყო წერილში.
"გურია ნიუსი" შეეცადა აღნიშნული ინფორმაცია გადაემოწმებინა. სოფელ ნაგომარში მცხოვრები ზაზა კოპლატაძე აცხადებს, რომ აღნიშნულის შესახებ საქმის ჩააყენა ადგილობრივი ხელისუფლება და გუბერნატორიც.
"ყანა ჩემს ეზოში შემოღობილშია, სიმინდი მაქვს დათესილი და არ დამიფარცხა ტრაქტორისტმა, არ ვიცი რის გამო გამიბრაზდა, მითხრა ასკანაში გამაგზავნეს სამუშაოდო, ვუთხარი საყვედური, ჯერ ნაგომარს მორჩი და მერე წადი სხვა სოფელში-მეთქი, ამის გამო გამითიშა ტელეფონი და გაბრაზდა. ფულზე ვითხოვდი დაფარცხვას, აბა, ტყუილად კი არ მინდოდა… სოფლის გამგებელმა გამოუშვა ჩემთან, მაგრამ მან არ გამიკეთა, ყველას რომ დავამთავრებ მერე დავხნავო. ახლა ვითხოვ ხელახლა დათესონ და გააკეთონ ისე, როგორც საჭიროა. მუნიციპალიტეტის გამგებელმა დაურეკა სოფლის გამგებელს და უთხრა, რომ ჩემთვის ყურადღება მიექციათ, მიღებაზე ვიყავი გუბერნატორთან, ის დამპირდა რომ აუცილებლად გაარკვევს თუმცა, ჯერ სამართალს ვერ მივაღწიე, სამინისტროშიც დავრეკე და ვუთხარი ამის შესახებ", _ ამბობს "გურია ნიუსთან" საუბრისას ზაზა კოპლატაძე.
ტრაქტორისტი რომან კობალავა ზაზა კოპლატაძის ბრალდებებს არ ეთანხმება და ამბობს, რომ მან თავისი უფლება-მოვალეობა პირნათლად შეასრულა:
"ვმუშაობ, "შპს მექანიზატორში". კოპლატაძეს ვაუჩერზე ჩემმა ტრაქტორმა დაუთესა ყანა, მიწა დაუხნა, გავიდა დრო, დაფარცხვა ხომ უნდოდა, იმ დროისთვის მე გამომიშვეს ასკანაში სამუშაოდ, თვითონ მირეკავს ჩემთან ჩამოდი, ეზო მაქვს დასაფარცხიო, ვუთხარი წამოსული ვარ ასკანაში და თუ მეტყვიან, რომ ჩადი ნაგომარში, წამოვალ-მეთქი. შენი 1000 მეტრი ყანის გულისთვის ვერ წამოვალ, ხალხს ჯერ დახნული არ აქვს მიწები, შენ დათესილი გაქვს-მეთქი. წავიდა და გამგეობაში განაცხადა ამის შესახებ, მე დამავალეს ოზურგეთის გამგეობიდან, რომ დაუფარცხეო, წავიდა ჩემი ტრაქტორი და ასე განუცხადა, ახლა არ მინდაო, მე როცა მომინდება და გეტყვი, მაშინ მოდი და დამიფარცხეო. ვალდებული ვიყავი ვაუჩერზე დავუხანი…ღამე არ მძინავს, წუხელ ერთი საათი ვიძინე იმდენს ვმუშაობ, ამოდით, ნახეთ, ასკანაში რას ვმუშაობ და თუ მყავს ვინმე უკმაყოფილო. თუ გამამტყუნებს ასი კაციდან ერთი მაინც გამამტყუნებს, დავიჩოქებ და ბოდიშს მოვიხდი!", _ ამბობს კობალავა.
ოზურგეთის მუნიციპალიტეტის გამგებლის წარმომადგენელი სოფელ ნაგომარში მიხეილ ცქიტიშვილი "გურია ნიუსთან" აღნიშნავს, რომ ზაზა კოპლატაძეს პირველივე ეტაპზე ყველაფერი გაუკეთეს ისე, როგორც სახელმწიფო პროგრამით იყო გათვალისწინებული.
"სახელმწიფო პროგრამით არის მარტო დახვნა გათვალისწინებული და ზაზა კოპლატაძის ყანაც მაშინ დაიხნა. ეს ადამაინი დაუხნელ ნიადაგზე აყრის კაკალს, ერთი კვირის შემდეგ ფარცხავს.. ტრაქტორისტებთან ურთიერთობა რომ დაეძაბა, მე მომმართა; ვუთხარი, როგორც კი ამინდი გამოვა, გავუშვებ აუცილებლად ტრაქტორს-მეთქი. რამდენიმე დღეში გავუშვი ფარცხით ტრაქტორი, მან დამირეკა მოვიდა ტრაქტორისტი, მაგრამ ნიადაგი სველია და რომ გამიფიჭოს რა ვქნაო. ვუთხარი, თუ გააფუჭებს, თავიდან გამოვუშვებ ტრაქტორს და ერთი ლარი არ დაგიჯდება შენ, ისე გაგიკეთებ-მეთქი, მაგრამ ტრაქტორისტი უკან გამოუშვა, ეზოში არ ჩაუსვა, მერე ჩამოვიდა მერე თუ მესამე დღეს, ავუხსენი კიდევ ერთხელ, რომ ზაზა მე ხომ გითხარი ყანას დაგიხნავ თავიდან, ახლა რა გამოსავალს ეძებ-მეთქი? გამოსავალი მეტი არ მაქვსო, გაზეთს მივმართავო. ჯერ ფარცხი ჩვენ არ გვეხებოდა საერთოდ, მაგრამ მაინც გავუშვი. პირნათელი ვარ მაგ ადამიანთან, პირველივე ეტაპზე იყო ჩასმული, ოთხ კაცში მოხვდა", _ აღნიშნა სოფლის წარმომადგენელმა.
