ოზურგეთის მუნიციპალიტეტის საკრებულოს ყოფილ თავმჯდომარეს ავთანდილ სურგულაძესა და შ.პ.ს " ტერმინალს" შორის ხელშეკრულება 2014 წლის 11 ივნისს გაფორმდა.
ხელშეკრულების თანახმად, ქალაქ ოზურგეთში, სამთო ქიმიის ქ. #8 -ში მდებარე #6 საბავშვო ბაღის კაპიტალური რემონტი უნდა ჩატარებულიყო. ხელშეკრულების საერთო ღირებულება 159 530 ლარს შეადგენს.
შესყიდვის ობიექტის მიწოდების საბოლოო ვადა ხელშეკრულების გაფორმებიდან 120 კალენდარული დღე იყო, თუმცა ქალაქ ოზურგეთში #6 საბავშვო ბაღის შენობა, დაგვიანებით, 2015 წლის 5 მაისს გაიხსნა.
აღნიშნულ ხელშეკრულების ფარგლებში ჩატარებულ სამუშაოებში მიღება-ჩაბარების აქტი 2015 წლის 11 მარტს შედგა, რომელსაც ხელს აწერს ვიცე მერი ალეკო ბურჭულაძე და მონიტორინგისა და კონტროლის ჯგუფი, რომელიც შვიდი წევრისგან (ალეკო ბურჭულაძე, ვიცე -მერი, მერაბ წივწივაძე, თემურ მურვანიძე, თემურ გიორგაძე, კობა ხაბალაშვილი, მამია მახარაძე, ირაკლი ანდღულაძე), შედგება: "ჩვენ ქვემოთ ხელის მომწერნი, ერთის მხრივ ქ. ოზურგეთის მუნიციპალიტეტის ვიცე-მერი ალეკო ბურჭულაძე და მეორეს მხრივ შპს "ტერმინალის" დირექტორის შაქრო კვაშალავას მინდობილი პირი ლომინო შენგელია, ვადგენთ მიღება- ჩაბარების აქტს, მასზედ, რომ ოზურგეთის მუნიციპალიტეტის საკრებულოს 2014 წლის 13 ივნისის # 66 განკარგულებით გადმოცემული ვალდებულებით, 11.06.2014 წ. # 250 ხელშეკრულების შესაბამისად და 11. 03.2015 წ. # 250 -2 ინსპექტირების აქტის საფუძველზე შპს " ტერმინალმა" შეასრულა, ხოლო ქ. ოზურგეთის მუნიციპალიტეტის მერიამ მიიღო ხელშეკრულებით გათვალისწინებული სამუშაო".
აღნიშნულმა კომპანიამ ხელშეკრულებით განსაზღვრული ვადები დაარღვია, რაც აღნიშნულია მიღება -ჩაბარების აქტშიც.
ოზურგეთის მუნიციპალიტეტის საკრებულოსა და შპს " ტერმინალს" შორის დადებული 22.10.2014 წლის შეთანხმებით განსაზღვრული ვადების დარღვევის გამო, რაც დასტურდება ქ. ოზურგეთის მუნიციპალიტეტის მერიის ინსპექტირების ჯგუფს 15.12. 2014 წ. დასკვნით, შეუსრულებელი ვალდებულებების ღირებულების პირგასამტეხლო შეადგენს 312, 73 ლარს.
# 6 საბავშვო ბაღის მენეჯერი მაია ლომჯარია "გურია ნიუსთან" ამბობს, რომ მთელი შენობის რეაბილიტაცია კაპიტალურად არის ჩატარებული. რაც შეეხება იმას, თუ რატომ მოხდა დაგვიანებით ბაღის გახსნა, მენეჯერი გვპასუხობს, რომ იყო რაღაც ხარვეზი, რაც სრულადაა უკვე აღმოფხვრილი: "შენობაში იყო რაღაც ხარვეზები, თუმცა ყველაფერი აღმოიფხვრა და აბსოლუტურად ყველანაირი ხარვეზის გარეშე მოხდა შენობის ჩაბარება, ინვენტარის გადმოცემა, გვაქვს ამის დამადასტურებელი ყველა დოკუმენტი, მიღება- ჩაბარების აქტი . ბაღში კაპიტალური რემონტია ჩატარებული".
#6 საბავშვო ბაღის შენობის გახსნის დაგვიანების მიზეზს ქალაქ ოზურგეთის მერიაში ასე ხსნიან: "#6 საბავშვო ბაღის სარეაბილიტაციო სამუშაოებთან დაკავშირებით შპს‘ ’ტერმინალთან" ხელშეკრულება 2014 წლის 11 ივნისს გაფორმდა. ფირმას, ხელშეკრულების თანახმად, აღნიშნული სამუშაო ამავე წლის 11 ნოემბერს უნდა დაესრულებინა. თუმცა ხსენებულ შპს-ს ხანძრის გამო სამეურნეო ეზო, მათ შორის ტექნიკა დაეწვა. N6 საბავშვო ბაღში დარჩენილი გახლდათ ეზოს კეთილმოწყობისა და ფასადის სარემონტო სამუშაოები და პარალელურად, უამინდობის გამო ‘’ტერმინალმა" ხელშეკრულების გაგრძელება ითხოვა. თუმცა გაგრძელებული ვადის მიუხედავად, მან დროში ჩატევა ვერ მოახერხა. შესაბამისად, ხელშეკრულების თანახმად, ყოველ ვადაგადაცილებულ დღეზე ფირმა სამუშაოს ღირებულების 0,1%-ით დაჯარიმდა, რამაც საერთო ჯამში 313 ლარი შეადგინა. სარეაბილიტაციო სამუშაოები შესრულდა ისე, როგორც ამას პროექტი ითვალისწინებდა. საბოლოოდ, N6 საბავშვო ბაღის მიღება-ჩაბარების აქტი 2015 წლის 11 მარტს გაფორმდა."
მერიაში ასევე აკონკრეტებენ ინფორმაციას ავეჯის შეძენასთან დაკავშირებული ტენდერის შესახებ: "საბავშვო ბაღის სრულად აღჭურვისთვის საჭირო იყო ავეჯი. ავეჯის შეძენასთან დაკავშირებული ტენდერი რამდენიმეჯერ ჩავარდა, რამაც შეაფერხა ბაღის გახსნა. საბოლოდ, N6 საბავშვო ბაღი 5 მაისს გაიხსნა."
