(გურია ნიუსი, ოზურგეთი) _ წინასაარჩევნოდ, საქართველოში ტრადიციად იქცა ათპუქტიანი გეგმები და ამ გეგმების გაპიარება. ახალი წლის დღეებში, სასჯელაღსრულების, პრობაციისა და იურიდიული დახმარების საკითხებში მინისტრმა, ხათუნა კალმახელიძემ ჟურნალისტებს პრიორიტეტული ათი საკითხი გააცნო. ერთ-ერთი პრიორიტეტი დასავლეთ საქართველოში, კერძოდ, ოზურგეთის მუნიციპალიტეტის, დაბა ლაითურში თავისუფლების აღკვეთის დაწესებულების მშენებლობის დაწყება დაასახელა, რომელიც დასავლეთ საქართველოს ციხეებს და აღმოსავლეთ საქართველოს ძველ ციხეებს ჩაანაცვლებს. ეს იმ მშენებლობაზეა საუბარი, რომელიც ჯერ კიდევ წინა არჩევნებზე იგეგმებოდა, მაგრამ, რატომღაც არ დასრულებულა.
დაბა ლაითურში ციხის მშენებლობა 2007 წელს საქართველოს სასჯელაღსრულების, პრობაციისა და იურიდიული დახმარების საკითხთა სამინისტრომ დაიწყო, 2009 წელს ამავე სამინისტროს მაშინდელმა მინისტრმა, დიმიტრი შაშკინმა, მშენებლობის პროცესი მოინახულა. მაშინ “გურია ნიუსი” წერდა: “ოზურგეთის რაიონის სოფელ ლაითურში, სასჯლაღსრულების დაწესებულების მშენებლობა 2007 წელს დაიწყო, თუმცა, საძირკვლის ჩასხმის შემდეგ რამდენიმე თვეში, დროებით შეჩერდა. ამ ეტაპზე დაგეგმილია საამშენებლო სამუშაოების გაგრძელება. როგორც მინისტრმა განაცხადა, მიმდინარეობს დონორებთან მუშაობა თანხების მოსაზიდად და მშენებლობის გასაგრძელებლად”.
მიუხედავად მინისტრის სურვილისა, მშენებლობა გაჩერდა. 2011 წლის 15 ივნისს “ნიუს ლაინმა” გაავრცელა ინფორმაცია, რომ ქ. ტირანაში (ალბანეთი) ევროპის საბჭოს განვითარების ბანკის (CEB) ადმინისტრაციულმა საბჭომ დააკმაყოფილა საქართველოს მთავრობის განაცხადი სოფელ ლაითურში (სამხრეთ-დასავლეთი საქართველო) ახალი ციხის მშენებლობისთვის 60 მლნ. ევროს ღირებულების სესხის მოთხოვნის შესახებ.
როგორც ხელისუფლება ამტკიცებს, “ახალი ციხე აშენდება ევროპული ციხის წესებისა (EPR) და ევროპის საბჭოს წამების წინააღმდეგ ბრძოლის კომიტეტის (CPT) სტანდარტების შესაბამისად. აღნიშნული ციხის მშენებლობა ხელს შეუწყობს გადატვირთული ციხეების პრობლემის მოგვარებას. ეს იქნება CEB-ის პირველი ოპერაცია საქართველოსთან ადმინისტრაციული და სასამართლო საჯარო მომსახურების ინფრასტრუქტურის სექტორში.
აღნიშნული პროექტი მიზნად ისახავს ციხის კომპლექსის მშენებლობას 2 000 პატიმრისთვის, რომელიც გააუმჯობესებს ქვეყნის საპატიმროების პოტენციალს რაოდენობრივი და ხარისხობრივი თვალსაზრისით და პირველად EPR-ის რეკომენდაციებს სრულყოფილად წარადგენს.
აღნიშნული დაწესებულებით ქვეყნის პატიმრების 9% პირდაპირ მიიღებს სარგებელს, მაშინ, როდესაც სხვებს შეუძლიათ, ირიბად ისარგებლონ სასჯელაღსრულების დაწესებულებების მშენებლობაში ახალი სტანდატრების დანერგვით, ასევე შესაბამისი კადრების მომზადების პრაქტიკისა და პატიმართა ახალი პროგრამების შემოღებით.
ლაითური არის სასოფლო დაბა უმუშევართა მაღალი მაჩვენებლით. სამუშაო ადგილების შექმნითა და ეკონომიკური აქტივობის გაზრდით ადგილობრივი მოსახლეობაც მიიღებს სარგებელს.
საქართველოს ხელისუფლება ამ პროექტს განიხილავს, როგორც 2010 წლის დასაწყისში მიღებული სამოქმედო გეგმით გაწერილი ფართო სარეფორმო სექტორის მნიშვნელოვან ნაწილს”.
“გურია ნიუსმა” ოფიციალური წერილით მიმართა ოზურგეთის მუნიციპალიტეტის გამგეობას, თუ როდის გაიცა მშენებლობის ნებართვა დაბა ლაითურში ციხის მშენებლობაზე. გამგეობის ოფიციალური პასუხი ასეთია: “საქართველოს მთავრობის 2009 წლის 24 მარტის “მშენებლობის ნებართვის გაცემის წესისა და სანებართვო პირობების შესახებ #57 დადგენილების I თავის I მუხლის 2 პუნქტის თანახმად _ “იმ შემთხვევაში, როდესაც მშენებლობას ახორციელებს “საქართველოს მთავრობის სტრუქტურის, უფლებამოსილებისა და საქმიანობის წესის შესახებ” საქართველოს კანონის გათვალისწინებული სამინისტრო ან მისი მმართველობის სფეროში შემავალი სახელმწიფო საქვეუწყებო დაწესებულება, “ლიცენზიებისა და ნებართვების შესახებ “საქართველოს კანონის პირველი მუხლის მე-2 პუნქტის შესაბამისად, მშენებლობის ნებართვა არ გაიცემა. აქედან გამომდინარე, ადგილობრივი ხელისუფლების მიერ აღნიშნულ ობიექტზე მშენებლობის ნებართვა არ გაცემულა”.
