გასული წლის საცნაურ-უცნაურ ამბავთაგან, სხვისი არ ვიცი და მე მაინც ის თითებდაკარწახებული მთვლელები მახსენდება, რომელთა “გონებაგამჭრიახობამ” ტოლი არ დაუდო საშაქრეში ჩამწყვდეული ბუზების მთვლელ რუს პოდპორუჩიკსა და ჭერს მიშტერებულ ლუარსაბ თათქარიძეს, რომელსაც, თანამედროვე მთვლელებივით, ბუზების თვლაში სათვალავი ისე აერია, რომ კნეინა დარეჯანმა სულზე მიუსწრო.
რომელ ერთზე გიამბო, ჩემო მკითხველო?
დღემდე, საქართველოში, თუ სულელურ თვლაზე მიდგებოდა საქმე, ჩემზე უკეთ მოგეხსენებათ, უმალ ის უბედური ლუარსაბ თათქარიძე ახსენდებოდა ყველას, რომლის სახელიც, ილიასეული სარკაზმის შემდეგ, ქართველ კაცს შვილისთვის არ დაურქმევია!
საწყალი ლუარსაბი! ძალიან ადრე დაიბადა, თორემ ახლა ჭერზე მცოცავი ამერიკული პეპლის ნაშიერებს ხომ უკეთ დათვლიდა? მატლი ხომ ბუზივით არსად გაფრინდებოდა, პირშიც ჩაუვარდებოდა და თვლაში გულგადალეულ კახელ თავადს დავთარიც აღარ აერეოდა, ახლა ორმოცი ბუზია, გაფრენილან, თორემ ორმოცდაათი იყოო, რომ იძახდა.
ზუსტად რას ისახავს მიზნად თანამედროვე მთვლელების ლოგიკა თუ რებუსი, ვერ ამოვხსენი და ბევრიც რომ ვეცადო, იდიომატური თვალსაზრისით, თავზე იმდენი კაკლის მტვრევა მომიწევს, ამ კაკლების დასათვლელად ხსენებული მთვლელების ძალისხმევაც არ მეყოფა. უბრალოდ, იმას კი მივხვდი, რომ ამ მთვლელების ლოგიკა გაჯერებულია ამერიკული სიმინდის 700 მარცვლით, ლაზიკაში ჩასასახლებელი ნახევარი მილიონი მცხოვრებით, ბიძინა ივანიშვილის 3 000-სიტყვიანი განცხადებით და კიდევ ვინ მოთვლის, რამდენი არგუმენტით, რის გამოც, საკუთარ თავს ხან ხმამაღლა ვეკითხები: ნეტა, რა მიმდინარეობაა ეს, ჩვენს ტელემთვლელებს რომ არითმეტიკული პროგრესიით მიაქანებს წინ?
_ დეკადენტურიო, _ სიტყვა “ჩამომაწოდა” ღობეზე ჭინჭარივით გადმომდგარმა ილიკო ჩიგოგიძემ და ხითხითს უმატა:
_ თუ ამერიკული სიმინდის ერთ ტაროზე 700 მარცვალია, თან ყოველდღე ტელევიზიით აღტაცებით სათქმელი, ამ მხრივ კი გავმხდარვართ მილიარდერი ქვეყანა, ბიძიკო! ბიძინა ივანიშვილისა ჯერ სამი სიტყვა არ გამეგონა და სამი ათასი თქვაო, _ ჩამყვირა ყურში “იმედმა” _ სიღნაღში “ჩაფშუკული” საჰაერო ბურთივით დაიჩუტება თქვენი “ქართული ოცნებაო”. ლაზიკა აუცილებლად აშენდებაო, თავკომბალად იქცა თბილისი, მოსაბეზრებელია ეს ამფიბია და ახლა პირდაპირ წყალში უნდა აშენდეს დიადი ახალი ქალაქიო! უჰ, რამდენი რამ ჩამოთვალეს, კინაღამ მეც ლუარსაბივით ამერია “კარკულატორი” თავში, მარააა… გურულის ტვინი მაინც სხვანაირი გამჭრიახია და მეც მოვიფიქრე! ასეთი ლაზიკა რომ აშენდება ჩვენში, ვენეცია რა მოსატანი იქნება მერე? ფაქიზოს გავყიდი, გიდელსაც გავყიდი და… გონდოლას ვიყიდი! მერე ვნახოთ, პალიასტომზე, ივანე და ნიკოიე, სკუტერობაზე მეოცნებე ტივით უფრო “გეიგულავებენ” თუ მე, ჩემი ზურგგიდელა გონდოლათი!
_ ისე, კაცმა რომ თქვას, _ წამოეშველა ილიკოს ილარიონ შევარდნაძე, _ ეგენი ისე ფარცაგად ითვლიენ ამ სიმინდის კეკლებს, ვეჭვობ, ივანიშვილის სიტყვებიც სწორად ჰქონდეთ დათვლილი, ამიტომ, რახან ყველაფერი ამერიკულია მოდაში, ამერიკულ კანონმდებლობას მოვიშველიებ და უცნაურ მთვლელებს 100 წელზე ნაკლებს არ მივუსჯი (მათ გასაგონადაც ვამბობ, ვინც ამიერიდან ჩვენში ჩამოსახლებულ ჩინელებს თუ ბურებს დაითვლის)!
ილიკომ საღი თვალიც დახუჭა და სმენად იქცა.
_ მიესაჯოთ უცნაურ მთვლელებს თვლის უფლების აღკვეთა 2012 წლით. ან იმდენი ხნით მაინც, ვიდრე ილიასეული რუსის ოფიცრისა და ლუარსაბის დონეზე არ შეძლებენ საშაქრეში ჩამწყვდეული თუ ჭერზე მიმსხდარი ბუზების დათვლას. მერე კი, ღმერთია მოწყალე! წინ დრაკონის წელი გვეგებება და ხელისუფლებამ თუ რაიმე დრაკონულ-დემოკრატიული კანონი ამ მოტივითაც არ მოიფიქრა ჩემი და ილიკოს წინააღმდეგ, გურულ იუმორისტულ კონსტიტუციაში რაიმე ახალს კვლავ შემოგთავაზებთ! _ დაასრულა ილარიონ შევარდნაძემ, ყაბალახი სწრაფად მოიგდო მხრებზე და გზაც ისე სწრაფად განაგრძო, თვალი ზურგსღა მოვკარი.
