ორი პოლიციელის ცემაში ბრალდებული ქალის სასამართლო განაჩენი 9 ივნისს გამოცხადდება. მანამდე კი, სასამართლომ ბოლო, შემაჯამებელი პროცესი რამდენიმე დღის წინ გამართა. თუმცა, პოლიციელების ცემაში ბრალდებული მაია კეკელია ამბობს, რომ განაჩენი ისე დგება, რომ ის გამომძიებელს ფაქტიურად დაკითხული არ ჰყავს. ასევე ბრალდების მხარემ არ ისურვა მოწმეების დაკითხვა.
შეგახსენებთ, რომ მაია კეკელიას საქმის შესახებ "გურია ნიუსი" არაერთხელ წერდა. საქმე ეხება 2014 წლის 16 ოქტომბერს, მარტვილის რაიონის სოფელ ბანძის პოლიციის შენობიდან დაკავებული მამაკაცის, თემურ გაბუნიას გაქცევას.
ოფიციალური ინფორმაციით, დაკავებულმა შენობიდან გაქცევა ნათესავების დახმარებით შეძლო, რომლებიც განყოფილებაში მივიდნენ, პოლიციის თანამშრომლებს თავს დაესხნენ და მათ როგორც სიტყვიერი, ასევე ფიზიკური შეურაცხყოფა მიაყენეს. თუმცა, პოლიციელებისგან რადიკალურად განსხვავებულ ვერსიაზე საუბრობენ საქმეში ბრალდებული პირები. მათი თქმით, პოლიციელებმა სიტყვიერი შეურაცხყოფა იქეთ მიაყენეს.
როგორც კეკელია "გურია ნიუსთან" საუბრისას ამბობს, ის დღემდე არ დაუკითხავს გამოძიებას, მიუხედავად იმისა, რომ დაკითხვის მოთხოვნით პროკურატურაში 40-მდე წერილი და საჩივარი აქვს გაგზავნილი.
"სამეგრელო ზემო სვანეთის პროკურორი არ შემხვდა, მიუხედავად იმისა რომ ამას კანონი ავალდებულებს. გარდა ამისა, ყველა საჩივარი იმას დააწერა, ვისაც ვუჩიოდი. გაოგნებული ვარ პროკურორის ფელიქს ჯალაღონიას არაპროფესიონალიზმით და საქმისადმი ზერელე დამოკიდებულებით. მან მოსამართლისაგან რამდენჯერმე დაიმსახურა შენიშვნა, მხოლოდ იმის გამო რომ არ ისმენს ბრალდებულისა თუ მოწმის ჩვენებებს და სასამართლო სხდომებზე თამაშობს ან მესიჯობს ტელეფონით. ამასთანავე, დასკვნით სიტყვაში ისაუბრა იმაზე თქვენი პრეტენზიები იზოლატორშივე რატომ არ განაცხადესო.თითქოს სასამართლომ მტკიცებულებად არ აღიარა ზუგდიდის წინასწარპატიმრობის იზოლატორის უფროსის საუბრის ფარული ჩანაწერი, სადაც ის ჰყვება, რომ კეკელიამ კი განაცხადა ჩემთან პრეტენზიები, მე ჩემი მხრივ პროკურორ მირანდა მუმლაძეს და გამომძიებელ გრიგოლ თოფურიას გადავეცი, მაგრამ მათ დააიგნორეს და წერილობით გაფორმების უფლებაც არ მომცესო. ადვოკატი ბაჩუკი ყურაშვილი ადასტურებს იმ ფაქტს, რომ მეორე დაკითხვაზე, რომელიც 9 თებერვალს განხორციელდა დავიკითხე მხოლოდ იმის გარშემო, თავის მოკვლას ხომ არ ვაპირებდი, ხოლო საქმის სხვა გარემოებების შესახებ, გამომძიებელმა განმიცხადა, რომ ის არ იყო ვალდებული დავეკითხე, რადგან სასამართლო დამკითხავდა. მაქვს გამომძიებლისთვის უამრავი განცხადება გაგზავნილი, სადაც ვატყობინებ ამა თუ იმ ინფორმაციას და ვითხოვ დამკითხოს", _ ამბობს მაია კეკელია.
მისივე თქმით, მან არაერთხელ, როგორც გამომძიებელ გრიგოლ თოფურიას, ასევე პროკურორ ბორის კვარაცხელიას წერილობით აცნობა, რომ რომ ბანძის პოლიციის თანამშრომელთა მხრიდან ადგილი ჰქონდა ძალიან მძიმე დანაშაულის ჩადენის ფაქტს. კერძოდ, კეკელია ამბობს, რომ დაკავებიდან სამ საათში პირველი ბრალი წარუდგინეს, რომელიც, მისივე თქმით, მარტვილის პოლიციის უფროსის ყოფილი მოადგილის, ამჟამად ბანძის პოლიციის უფროსის, კახა ძიძიგურის მოთხოვნით სამჯერ შეიცვალა. კეკელია აღნიშნავს, რომ ძიძიგური ინცინდენტის მომენტში ნასვამ მდგომარეობაში იმყოფებოდა. გარდა ამისა, ბრალდებული ამბობს, რომ არ დააკავშირეს ადვოკატს და შეუზღუდეს დაცვის უფლება, საფრთხე შეუქმნეს მის სიცოცხლეს, ადგილი ჰქონდა დამამცირებელ მოპყრობას.
"გარდა ამისა ბატონ ბორის ვაცნობე, რომ პოლიცია ზეწოლას ახდენდა მოწმეებზე, გადავეცი მას ფარული ჩანაწერები, სადაც მოწმეები ამ ფაქტზე საუბრობენ, ტაქსის მძღოლებს უკრძალავდნენ ადამიანები სასამართლომდე მოეყვანათ, შესაბამისად, გრიგოლ თოფურიას და ბორის კვარაცხელიას მოვალეობას წარმოადგენდა დაეწყოთ გამოძიება. მათ კი კანონი დაარღვიეს, ხელს აფარებენ დამნაშავე პოლიციელებს. ყველაზე ცუდ ვარიანტში იმაში მაინც უნდა დაინტერესებულიყვნენ, ცრუ დასმენას ხომ არ ჰქონდა ჩემი მხრიდან ადგილი. ასევე, უამრავ წერილში ვუთითებდი გამომძიებლის მიერ ჩემს დაშინებაზე, კერძოდ, მეუბნებოდა ისეთი სისტემაა საქართველოში პოლიციელების წინააღმდეგ ომს ვერ მოიგებო. გამომძიებელმა გააყალბა მონაცემები და შსს-ს გენერალურ ინსპექციას ხელი შეუშალა გამოძიების წარმოებაშიდა მას ამისტვის მხოლოდ მსუბუქი საყვედური გამოუცხადეს", _ ამბობს კეკელია.
ცნობისთვის, კეკელიას მიმართ წარდგენილი ბრალდება სასჯელის სახედ 4-დან 7 წლამდე თავისუფლების აღკვეთას ითვალისწინებს. ამ მძიმე ბრალდების დასადასტურებლად კი, კეკელიას თქმით, პროკურატურამ მოიტანა მხოლოდ იმ ადამიანების ჩვენებები, რომელთაც დანაშაულში თავად სდებს ბრალს.
"ეს ადამიანები პირდაპირ არიან დაინტერესებულები საქმის შედეგით. შესაბამისად, ყველანაირად ეცდებიან თავი გადაირჩინონ. პროკურატურა მზად არის გაგვწიროს შვიდი ადამიანი შვიდი წლით თავისუფლების აღკვეთისთვის ისე, რომ თვალი არ დაახამხამოს ამაზე", _ ამბობს კეკელია.
გარდა ამისა, პოლიციელების ცემაში ბრალდებული აღნიშნავს, რომ 2014 წლის 16 ოქტომბერს, ბანძის პოლიციის შენობაში მომხდარ ფაქტს ერთ-ერთი პოლიციელი კამერით იღებდა, ამიტომ პროკურორებისთვის აბსოლუტურად ცნობილია რაც მოხდა ბანძის პოლიციაში. მიზეზი, რის გამოც ვიდეო სასამართლოზე არ წარმოადგინეს, კეკელიას თქმით, გახლავთ ის, რომ ვიდეოს წარმოდგენის შემთხვევაში პროკურატურას გაუჭირდებოდა იმის მტკიცება, რომ ადგილი ჰქონდა თავდასხმას, ვინაიდან თუ თავდასხმა ხორციელდებოდა, მაშინ პოლიციელი ოპერატორობისთვის ვერ მოიცლიდა.
"როდესაც პოლიციელი ვიდეოს იღებდა, იმ მომენტში დამარტყა ალექსანდრე გაგუამ. ვიდეოზე ასევე გამოჩნდებოდა ის ფაქტი, თუ როგორ გაუღეს თემურ გაბუნიას საკნის კარები და გამოუშვეს ჩემს მოსასულიერებლად. მოგეხსენებათ, რომ დაკავებული ადამიანის გამოშვება საკნიდან თუნდაც კეთილშობილური მიზნებით, წარმოადგენს სისხლის სამართლის დანაშაულს", _ ამბობს კეკელია და დასძენს, რომ თუ ქართულმა სასამართლომ მის წინააღმდეგ წარდგენილი ბრალდება არ გააქარწყლა, საქმეს სტრასბურგის სასამართლოში გაგზავნის.
"არ ვიცი რამდენი ხანი დამჭირდება, თუმცა რა ფასადაც არ უნდა დამიჯდეს გპირდებით დავამტკიცებ, რომ არარსებული ბრალდებით ამდენი თვე უკანონო პატიმრობაში ჰყავთ ადამიანები", _ აღნიშნავს კეკელია "გურია ნიუსთან" საუბრისას.
"გურია ნიუსი" არაერთხელ ეცადა საქმის დეტალების შესახებ გამომძიებლებსა და პროკურორებს დაკავშირებოდა, თუმცა ისინი მუდმივად პრესსამსახურთან გვამისამართებენ. პრესსამსახურში კი ამბობენ, რომ სასამართლოს დასრულებამდე საქმის დეტალების შესახებ ვერ ისაუბრებენ.
ამავე თემაზე:
პოლიციელების ცემაში ბრალდებული ქალის ღია წერილი
როგორ გაიქცა დაკავებული – ნასვამი პოლიციელების წინდაუხედაობით თუ ნათესავების "ამბოხით"
