დაბის ახლად დანიშნული რწმუნებულის, ტარიელ ანთაძის თქმით, იქ 712 კომლი და 1900 ამომრჩეველი ცხოვრობს. ნასაკირალში, თითქმის ყველა არჩევნებში მმართველი პარტია 80 პროცენტით იმარჯვებს. თუმცა, როგორც დაბის მცხოვრებლები ამბობენ, ხელისუფლებას ისინი მხოლოდ წინასაარჩევნოდ ახსენდება, დაპირებებიდან კი არაფერი სრულდება, უმთავრესი პრობლემა კი უგზოობაა. ტარიელ ანთაძის თქმით, დაბის მოსახლეობის შემოსავლის წყარო ადრე გაზაფხულზე და გვიან შემოდგომამდე თურქეთში დასაქმებაა.
_ გაჭირვებულად ვცხოვრობთ, არავინ ყურადღებას არ გვაქცევს. ნახეთ როგორი გზები გვაქვს, წყალი სამ დღეში ერთხელ მოდის, ისიც ახლა, თორემ ადრე სულ არ იყო _ უწყლოდ ვიხრჩობოდით. საიდან ვეზიდებოდით წყალს, ვინ იცის. ცენტრში ყველაფერი დაშლილია. აღარც კლუბი გვაქვს _ დაანგრიეს. სიცოცხლე ჩამკვდარია _ ნახეთ ამ ბინებში ხალხი როგორ ცხოვრობს. ამბის მკითხველი არ გვყავს, რა გიჭირს, რა გილხინს. ახლა იძახიან, ვითომ გზები უნდა გაკეთდესო. როდის გააკეთებენ, ჩვენ რომ სული ამოგვხდება? გამგებელს ვუთხარით _ შეშა გვინდა, დაგვეხმარეო და ასე გვიპასუხა: შეშა მე არ მაქვს ეზოშიო, _ გვითხრა დაბა ნასაკირალის ცენტრში წყლის რიგში მომლოდინე მოსახლეობამ.
_ თუ დაბაში გზა არ იქნება, რაც არ უნდა, გააკეთო აქ, არაფერს მნიშვნელობა არ აქვს. გზაა ჩვენი უპირველესი პრობლემა. ახლა პრეზიდენტი დაგვპირდა, ყველა სოფელში გზა მოწესრიგდებაო და ვნახოთ, ყოველი არჩევნების წინ ასე გვპირდებიან, ჩაივლის არჩევნები და მორჩა. ერთადერთი, რაც გაკეთებული და აღსანიშნავია, სოფელში არაა ქურდობა და ყაჩაღობა. აქ ადრე ღამით გარეთ ვერ გახვიდოდი. ამ მხრივ, მოწესრიგებულია ყველაფერი, დანარჩენი კი უარესობისკენ მიდის. დანგრეულია უზარმაზარი ჩაის ფაბრიკა, სადაც ათასობით ტონა ჩაი მუშავდებოდა, დასაქმებული იყო ადგილობრივი მოსახლეობის უმეტესობა, _ შემოგვჩივლეს ნასაკირალის მცხოვრებლებმა.
ა. ბერიძე, გეოგრაფიის მასწავლებელი: _ გზა, გზა და კვლავ გზა _ ესაა დაბა ნასაკირალის უმთავრესი პრობლემა. ჩვენი სკოლის მოსწავლეები წარმატებებით გავიდნენ მეორე ადგილზე, მხოლოდ სამმა მოსწავლემ ვერ გადალახა ბარიერი, 13-მა კი წარმატებით ჩააბარა გამოცდები. აქ მოსახლეობას ძალიან უჭირს, სამუშაო არაფერი არაა, ჩაის საკრეფად დადიან თურქეთში _ როგორც კი გამოზაფხულდება, წავლენ და გვიან შემოდგომამდე იქ არიან. სოფელი თითქმის დაცლილია მაგ დროს, აქ მოხუცებისა და პატარა ბავშვების მეტს ვერ ნახავთ.
_ ძველ რწმუნებულს არაფერი არ ადარდებდა, ახლა ამ კაცის იმედი გვაქვს _ იქნებ, მან მაინც მოგვაქციოს ყურადღება. ის ნამდვილად ვიცით, რომ მოსახლეობის გასაჭირს ხელისუფლებამდე მიიტანს. ესაა ყველაზე დიდი დაბა, ძალიან ბევრი ამომრჩეველი ცხოვრობს. წინა არჩევნები 80 პროცენტით მოიგო ხელისუფლებამ. ნეტავ, გაჩვენათ, აქ რა ამბავია არჩევნებზე _ ხალხს “კარტოფილივით” ეზიდებიან მთიდან ბარში.
_ სააკაშვილმა ხომ არ იცის, ნასაკირალის მცხოვრებლებს რა უჭირთ? სოფლის რწმუნებულმა უნდა მიიტანოს შენი გასაჭირი ხელისუფლებამდე. აქ გაჭირვებულებმა თუ დაილაპარაკეს, ხმა ამოიღეს და ცოტა ხელისუფლებისთვის არასასიამოვნო თქვეს, მაშინვე ჩირქს მოგცხებენ და რაღაცას დაგაბრალებენ, _ ამბობენ ნასალირალელები.
ოზურგეთის მუნიციპალიტეტის დაბა ნასაკირალის ახლად დანიშნული რწმუნებული, ტარიელ ანთაძე “გურია ნიუსთან” იმ პრობლემებზე საუბრობს, რომელიც დაბა ნასაკირალში მცხოვრებლებს აწუხებთ:
_ წყლის პრობლემა თითქმის მოგვარებული გვაქვს. ასე რომ ეზიდებიან, მათი ბრალია, რადგან ცენტრში, ბინებამდე წყლის ახალი მაგისტრალია ჩადებული და ყველას შეუძლია, მიიყვანოს სახლებამდე. ალბათ, არ სურთ.
_ იქნებ, არ აქვთ საშუალება, თორემ წყლის სახლში შეყვანა ვის არ ენდომება?
_ კი, ბატონო, გასაგებია, საშუალება არ აქვთ ფინანსურად, მაგრამ ეს დიდ თანხასთან არ არის დაკავშირებული.
_ გყავთ ისეთი ოჯახები, რომლებსაც სოციალურად ძალიან უჭირთ და დახმარება არ აქვთ?
_ ჩვენს სოფელში, გასული წლის ოქტომბერში, 105 ოჯახი იღებდა სოციალურ დახმარებას. დღეისთვის, დაახლოებით, 15 ოჯახი თუ იქნება ისეთი, რომელიც სოციალურ დახმარებას იღებს.
_ რატომ, გამდიდრდენ ეს ოჯახები?
_ არ გამდიდრებულან. არ ვიცი, რა მიზეზით მოუხსნეს. არადა, მოსახლეობას ჰგონია, რომ ჩვენ დახმარება შეგვიძლია ამ კუთხით. სოციალურ აგენტებს ვხდებით, მაგრამ მათგან აზრი ვერ გამოგვაქვს, არადა, მოსახლეობა ჩვენ გვაბრალებს. ჩვენი სოფლის მცხოვრებლებისთვის ცუდი გვინდა? რაც უფრო მეტ ოჯახს ექნება დახმარება, ჩვენთვისაც უკეთესია _ მოსახლეობა რომ მადლიერი გვეყოლება, მაგას რა სჯობს?.
_ დაბაში გახორციელებულ პროექტებზე გვესაუბრეთ.
_ გასულ წელს მე მთავარი სპეციალისტი ვიყავი. სოფლის მხარდამჭერი პროგრამით, დაბაში გასახორციელებელი პროექტებისთვის გამოყოფილი იყო ოცდათექვსმეტი ათას ხუთასი ლარი. აქედან, ოცდარვა ათასი ლარი წყლის ცენტრალური მილის შეცვლაზე გამოიყო _ მილი ამორტიზირებული იყო და წყალი მოსახლეობას საერთოდ არ მიეწოდებოდა. შეიცვალა 546 მეტრი სიგრძის მილი. ამის შემდეგ ესპანური არასამთავრობო ორგანიზაცია დაგვეხმარა, რომლის დახმარებითაც მესხების დასახლებაში წყლის პრობლემა მოვაგვარეთ და მოსახლეობა ამ მხრივ სრულად დაკმაყოფილებულია. ზუსტად 700 მეტრი ცენტრალური მაგისტრალი შეგვიცვალეს და სრული პასუხისმგებლობით ვაცხადებ, რომ დაბა ნასაკირალში წყლის პრობლემა მოწესრიგებულია. ახლა ყველაფერი დამოკიდებულია მოსახლეობაზე, როგორ გადაიხდიან თანხას. წყალი ყოველ მესამე დღეს ირთვება, იქედან გამომდინარე, თუ რამდენს იხდის მოსახლეობა. არის ძალიან დიდი ძრავი, რომელიც 160 კილოვატიანია და საათში, დაახლოებით, 27 ლარს წვავს. აქედან გამომდინარე, ვერ ვრთავთ ყოველდღიურად წყალს. ერთი ოჯახი თვეში სამ ლარს იხდის.
_ რა არის დღეს თქვენი სოფლის უმთავრესი პრობლემა?
_ ახლა მწვავედ დგას შეშის საკითხი. მოსახლეობას მაგ მხრივ ძალიან უჭირს. ფიზიკურად დაბა ნასაკირალის ტერიტორიაზე არ არის ტყეკაფისთვის გამოყოფილი ტერიტორია. არ გვაქვს ბუნებრივი ტყე, გვაქვს მხოლოდ ქარსაფარი ზოლი, სადაც უამრავი ხეა დაზიანებული. არ გვაძლევენ იმის საშუალებას, რომ დაზიანებული ხეები მოვჭრათ და მოსახლეობამ გამოიყენოს გათბობისთვის მაინც. გვინდა გაჭირვებულ ოჯახებს დავეხმაროთ და ცოტა შევუმსუბუქოთ ზამთარი. აქ თითოეულ ოჯახს ზამთრის გათბობისთვის 800 და 900 ლარი ჭირდება. იძულებულია მოსახლეობა, რომ საკუთარ კარ-მიდამოში მოჭრას მსხმოიარე ხილი _ მსხალი, ვაშლი…
დაბა მცირემიწიანია და ძირითადად ციტრუსი აქვთ გაშენებული. შემოსავლის წყარო სწორედ ციტრუსი და თხილია. ციტრუსის გასაღებით წელს უკმაყოფილო არ ვარ. მოსახლეობა ადრე გაზაფხულზე გადის თურქეთში და გვიან შემოდგომამდე იქ მუშაობს. იმათთვის, ვისაც მუშაობა შეუძლია, თურქეთში დასაქმება შემოსავლის მთავარი წყაროა, მოხუცებულებისთვის კი _ პენსია. თუმცა, დაბა ნასაკირალში უმთავრეს და გადაუჭრელ პრობლემად მაინც გზა რჩება, _ გვითხრა ახლადდანიშნულმა რწმუნებულმა.
