სოფელ ერგნეთში მცხოვრები კონფლიქტით დაზარალებული ოჯახების სასოფლო-სამეურნეო სავარგულების წყალუზრუნველსაყოფად, სოფლის მეურნეობის სამინისტრო, შპს "საქართველოს მელიორაცია" და შვეიცარიის განვითარებისა და თანამშრომლობის სააგენტო ერთობლივი ძალებით, სატუმბი სადგურის რეაბილიტაციას ახორციელებს.
სოფლის მეურნეობის სამინისტროს ინფორმაციით, რეაბილიტაციის ფარგლებში, შეიცვალა ტუმბო აგრეგატი, დაემატა სადაწნეო მილსადენის ერთი ხაზი, დამონტაჟდა მძლავრი ტრანსფორმატორი.
მათივე ინფორმაციით, სოფელ ერგნეთის 150 ჰექტარი სასოფლო-სამეურნეო მიწის ფართობი გასარწყავდება. აღნიშნული ფართობით 200 კომლი, დაახლოებით 600-700 მოსახლე ისარგებლებს. სატუმბი სადგურის სარეაბილიტაციო სამუშოები, რომლის ღირებულებაა 260 ათასი ლარი, ივნისის ბოლოს დასრულდება.
სარეაბილიტაციო ღონისძებების მიმდინარეობა მოინახულეს დღეს "საქართველოს მელიორაციის" გენერალურმა დირექტორმა, ლევან დვალმა, დანიის ლტოლვილთა საბჭოს წარმომადგენელმა, გაი ჰუვიმ და შვეიცარიის განვითარებისა და თანამშრომლობის სააგენტოს წარმომადგენლებმა.
აღნიშნული ობიექტის რეაბილიტაცია შპს "საქართველოს მელიორაციასა" და ლტოლვილთა დანიის საბჭოს შორის გაფორმებული მემორანდუმის საფუძველზე ხორციელდება. შვეიცარიის განვითარებისა და თანამშრომლობის სააგენტოს (SDC) ფინანსური მხარდაჭერით ლტოლვილთა დანიის საბჭო ახორციელებს პროექტს – "ერგნეთში დაბრუნებულთა საცხოვრებლებისა და შემოსავლის წყაროების აღდგენა", რომელიც მიზნაც ისახავს სოფელ ერგნეთში კონფლიქტით დაზარალებული ოჯახების საცხოვრებელი და სოციალური-ეკონომიკური მდგომარეობის გაუმჯობესებას.
პროექტის ფარგლებში, კონფლიქტით დაზარალებული მოსახლეობისათვის აღდგება საცხოვრებელი სახლები და საარსებო წყაროდ საჭირო ინფრასტრუქტურა. მოსახლეობის მიერ შეირჩა სათემო ინფრასტრუქტურა-სოფლის საირიგაციო სისტემა. მემორანდუმის საფუძველზე, SDC-სა და საქართველოს მთავრობის ფინანსური რესურსების ერთობლივი კონსოლიდაციით შპს "საქართველოს მელიორაცია" აღნიშნული ინფრასტრუქტურის სარეაბილიტაციო სამუშაოებს ატარებს.
