"მიგვაჩნია, რომ ნავსადგურის ხელმძღვანელობის მიერ ჩადენილი ქმედება არის იმ მზაკვრული გეგმის ნაწილი, რომელიც, საერთო ჯამში, მიზნად ისახავს წმიდა ნიკოლოზის ეკლესიის დანგრევას," _ ნათქვამია ფოთისა და ხობის ეპარქიის სამდივნოს განცხადებაში, რომელიც 19 იანვარს გავრცელდა და რომლის მიხედვითაც, 18 იანვარს წმიდა ნიკოლოზის ტაძრის მოძღვარს, ეკლესიის მრევლს და მიტროპოლიტის სამდივნოს თანამშრომლებს ტაძრისკენ მიმავალ გზაზე, ავტოტრანსპორტით გადაადგილება აუკრძალეს.
"დახვდათ ახლად დამონტაჟებული ე.წ. შლაგბაუმი და დაცვის თანამშრომელი, რომელმაც მანქანების გადაადგილება შეაჩერა და მოძღვარს გამოუცხადეს, რომ ჯერ-ჯერობით მხოლოდ ფეხით შეიძლება ტაძრისკენ გადაადგილება, მაგრამ ორი თვის შემდეგ, სპეციალური საშვის გარეშე არავინ არ იქნება დაშვებული ტაძარში და არც ტაძართან არსებულ საეკლესიო დანიშნულების შენობაში, სადაც განთავსებულია მიტროპოლიტის სამდივნო და ეპარქიის განვითარების ფონდი", _ ნათქვამია ფოთისა და ხობის ეპარქიის სამდივნოს მიერ გავრცელებულ განცხადებაში.
წმიდა ნიკოლოზის სახელობის ტაძრის სხვა ადგილას გადატანის თაობაზე საუბარი, ჯერ კიდევ მაშინ დაიწყო, რაც ფოთის საზღვაო ნავსადგურის მესაკუთრე კომპანია არაბული "რაკია" გახდა. თემა, უკანასკნელი წლების განმავლობაში დროდადრო აქტიურდებოდა. აღნიშნულის თაობაზე, ფოთის და ხობის მიტროპოლიტის, მეუფე გრიგოლის 2010 წლის საშობაო ეპისტოლეშიც მოხვდა. ფოთის ნავსადგურში არსებული წმიდა ნიკოლოზის ეკლესიის გადატანის თაობაზე საუბარი კი, ფაქტობრივად, გულისხმობს ტაძრის დანგრევას იმ საბაბით, რომ იგი ხელს უშლის ნავსადგურის განვითარებას.
როგორც ეპარქიის სამდივნო განმარტავს, ყველაფრის მიუხედავად, "ხანგრძლივი პერიოდის განმავლობაში, ღვთის წყალობით ხერხდებოდა ტაძრის დანგრევის უგუნური სურვილებისა და მცდელობების თავიდან აცილება".
2011 წლის 16 თებერვლის, N98-46-21 წერილით კორპორაცია "ფოთის საზღვაო ნავსადგურმა" მიმართა საქართველოს ეკონომიკისა და მდგრადი განვითარების სამინისტროს, რომელშიც დასმული იყო ნავსადგურის საკუთრებაში არსებული ქონების: წმ. ნიკოლოზის ეკლესიის, საეკლესიო დანიშნულების შენობისა და მათზე დამაგრებული მიწის ნაკვეთების სახელმწიფოსთვის გადაცემის საკითხი, შემდგომში საქართველოს სამოციქულო ეკლესიისთვის გადაცემის მიზნით.
როგორც ფოთისა და ხობის ეპარქიაში განმარტავენ, ეკონომიკისა და მდგრადი განვითარების სამინისტრომ, ზემოაღნიშნული წერილის საფუძველზე, 2011 წლის 30 მარტს, აღნიშნული ქონება დაარეგისტრირა საჯარო რეესტრში სახელმწიფო საკუთრებად.
"მოლაპარაკებისას მიღწეული შეთანხმება პირნათლად შეასრულა არაბმა ინვესტორმა, რომლის მართვაშიც იმყოფებოდა იმ დროისათვის ფოთის ნავსადგური და ჩავთვალეთ, რომ ახლა კი ბოლო მოეღებოდა ტაძრის დანგრევის მცდელობას (ნებისმიერი საბაბით): თუმცა, როგორც აღმოჩნდა, ეს ასე არ ყოფილა: ეკლესია, საეკლესიო დანიშნულების შენობა და მათზე დამაგრებული მიწის ნაკვეთები კი დარეგისტრირდა სახელმწიფოს საკუთრებად, მაგრამ სამწუხაროდ, საქართველოს ეკლესიაზე მისი გადაცემა ჯერაც არ მომხდარა. ამან, როგორც ჩანს, ნავსადგურის უკვე ახალ მფლობელებს (,,მაერსკი") კვლავ აღუძრა წმ. ნიკოლოზის ეკლესიის დანგრევის სურვილი, რის შესახებაც დაუფარავად საუბრობენ და დაჯერებულად აცხადებენ, რომ ამ საკითხზე სრულიად საქართველოს კათოლიკოს-პატრიარქთან ,,შეთანხმდებიან". როგორც ვითარებას ეტყობა, ნავსადგურის ამჟამინდელ მფლობელებს გეგმაც გააჩნიათ და მოქმედებასაც შეუდგნენ,” _ ნათქვამია ეპარქიის სამდივნოს წერილობით განცხადებაში.
ფოთის მერის, ვახტანგ ლემონჯავას განმარტებით, ტაძრამდე მისასვლელი ტერიტორიის, ნავსადგურისთვის გადაცემა, არაკორექტული იყო.
"წმინდა ნიკოლოზის ტაძრის დანგრევაზე საუბარი არ არის, საუბარია ტერიტორიის ჩაკეტვაზე, რომელიც არასწორი ნაბიჯია ნავსადგურის ადმინისტრაციის მხრიდან. იქ არის ტაძარი, სადაც დადის მრევლი; გარდა ამისა, მდებარეობს საზოგადოებრივი ჯანდაცვის სამსახური და ბანკი. ეს იყო ქალაქის მოედანი, რომლის ნავსადგურისთვის გადაცემა არაკორექტული იყო," _ აცხადებს მერი.
ფოთისა და ხობის ეპარქიის სამდივნოს სპეციალური განცხადების მიხედვით კი, ნავსადგურის გეგმაში, ეკლესიის დანგრევა ისახება მიზნად.
"მიგვაჩნია, რომ ნავსადგურის მიერ ტაძრისკენ მიმავალი გზის ჩაკეტვა არის უკანონო ქმედება. ასევე მიგვაჩნია, რომ ნავსადგურის ხელმძღვანელობის მიერ ჩადენილი ქმედება არის იმ მზაკვრული გეგმის ნაწილი, რომელიც, საერთო ჯამში, მიზნად ისახავს წმიდა ნიკოლოზის ეკლესიის დანგრევას," _ განმარტებულია სამდივნოს განცხადებაში.
განსხვავებულ კომენტარს აკეთებს ამასთან დაკავშირებით, ვახტანგ ლემონჯავა, რომელიც თვლის, რომ ეკლესია, ნებისმიერ შემთხვევაში უნდა დარჩეს.
"საპატრიარქომ უნდა მიმართოს წერილობით ეკონომიკის სამინისტროს. ტერიტორიის ეკლესიისთვის გადაცემა სახელმწიფოსა და ეკლესიას შორის არსებული ხელშეკრულებით უნდა მოხდეს," _ აცხადებს ფოთის მერი.
"მივმართავთ საქართველოს ხელისუფლებას, რათა ფოთის წმიდა ნიკოლოზის ეკლესიის საქართველოს საპატრიარქოზე გადაცემის საკითხი ბოლომდე იქნას მიყვანილი, რითაც წერტილი დაესმება ტაძრის დანგრევის მცდელობებს, ხოლო შესაბამისმა სახელმწიფო ორგანოებმა განუმარტონ ფოთის ნავსადგურის მფლობელებს მათი უფლებების საზღვრები და აღკვეთონ ტაძრისა და მართლმადიდებელი მრევლის მიმართ გახორციელებული უკანონო ქმედება," _ აცხადებენ ფოთისა და ხობის ეპარქიის სამდივნოში.
20 იანვარს, მას შემდეგ, რაც ტაძრის ირგვლივ შექმნილ სიტუაციაზე, საზოგადოებამ ბუნებრივი შეშფოთება გამოთქვა, ფოთის ნავსადგურმა, ადგილობრივ ხელმძღვანელობასთან პირობა დადო, რომ წმინდა ნიკოლოზის ტაძრამდე მისასვლელ გზაზე შეზღუდვები მოიხსნება. ამის შესახებ "გურია ნიუსს", ნავსადგურის ხელმძღვანელობასთან გამართული შეხვედრის შემდეგ, ფოთის მაჟორიტარმა დეპუტატმა, თემურ წურწუმიამ განუცხადა. შეხვედრა ფოთის მერთან, ვახტანგ ლემონჯავასთან გაიმართა.
"ნავსადგურს ხელმძღვანელმა, ჯოზეფ ქროულიმ გარკვეულწილად აღიარა, რომ შეცდომა იყო დაშვებული და გადაწყვეტილება ნაჩქარევად მიიღეს. მან პირობა დადო, რომ მოშლის დაბრკოლებებს, რომელიც დღეს არის, შეხვდება ფოთისა და ხობის მიტროპოლიტ გრიგოლს. შემდგომში კი, თუ ნავსადგური ამ ტერიტორიასთან დაკავშირებით რამეს გადაწყვეტს, აუცილებლად შეუთანხმებს ქალაქის ხელმღძღვანელობას, ეკლესიის ნაწილში კი _ მეუფე გროგოლს", _ აღნიშნა წურწუმიამ.
მისივე თქმით, ფოთის პორტის ახალი ხელმძღვანელობა იმ ტერიტორიას, რომელიც არაბულმა "რაკიამ" სახელმწიფოს დაუბრუნა, აღიარებს სახელმწიფოს კუთვნილად.
"ჯოზეფ ქროული ამბობს, რომ მოხდა აჩქარება და მისი დავალება არასწორად შესრულდა", _ განაცხადა ფოთის მაჟორიტარმა დეპუტატმა.
წმიდა ნიკოლოზის ტაძრის მოძღვარი, მამა თევდორე ჩვენთან საუბრისას ადასტურებს, რომ სასულიერო პირებსა და მრევლს, ავტოტრანსპორტით გადაადგილებაში, 18 იანვარს პრობლემები მართლაც შეექმნათ: "რამოდენიმე დღის წინ, მრევლს თავისუფლად შეეძლო მისულიყო ეკლესიაში, ისე, რომ არანაირი ბარიერების გადალახვა არ უწევდა. მოხდა ისე, რომ შეუთანხმებლად ეკლესიასთან, ტაძრიდან რამოდენიმე მეტრის მოშორებით გააკეთეს შლაგბაუმი, ანუ, გადაკეტეს. დროთა განმავლობაში, არის ასეთი ინფორმაცია, რომ მრევლს მოუწევს, იქ საშვით შესვლა, რაც ყოვლად მიუღებელია ქართულ სახელმწიფოში. მე არ ვიცი როგორ და რანაირად ხდება საზღვარგარეთ, მაგრამ ჩვენ სახელმწიფოში საშვით ლოცვაზე სიარული, ეს არის მიუღებელი. ტაძარს სხვა მისასვლელი გზა არ აქვს, ან საშვით უნდა მივიდეს მრევლი, ან უნდა გადაფრინდეს; ახლა, მრევლი ფრენას ვერ დაიწყებს," _ ამბობს მამა თევდორე.
კორპორაცია "ფოთის საზღვაო ნავსადგურში", აღნიშნულთან დაკავშირებით, ჯერჯერობით, კომენტარი არ გაკეთებულა, როგორ განვითარდება მოვლენები, ამ საკითხთან დაკავშირებით, წინასწარი ანალიზის გაკეთება, რთულია.
