(გურია ნიუსი, ოზურგეთი) _ ბექა ჩხაიძე, “ალილოს” ერთ-ერთი წევრი: _ ჩვენ ერთი, გენიალური ოჯახი ჩამოვყალიბდით და ჩვენს ქვეყანას შევაყვარეთ თავი, განსაკუთრებით, ჩემს გურიას. ყველას მინდა, დიდი მადლობა გადაგიხადოთ მობრძანებისთვის.
ლაშა ღლონტი, “ალილოს” ერთ-ერთი წევრი: _ როგორც იქნა, მეღირსა ჩემს ოზურგეთში ჩამოსვლა. მსოფლიოს ბევრი ქვეყანა მაქვს მოვლილი, მაგრამ სანერვიულო გურიაში სიმღერაა.
ამ სიტყვებით გახსნა “ალილომ” 15 იანვარს, ოზურგეთში გამართული კალანდის საღამო რესტორან “გურიაში”, რომელსაც რეგიონის სხვადასხვა სამსახურების ხელმძღვანელები, თანამშრომლები და მასმედიის წარმომადგენლები ესწრებოდნენ. კონცერტს მხარის გუბერნატორი, ვალერი ჩიტაიშვილი თავის მეუღლესთან და დასთან ერთად დაესწრო.
ოთხსაათიან შოუში, ანსამბლმა “ალილომ” და ლათინო-ამერიკულმა ბენდმა, მაესტრო მორისის ხელმძღვანელობით, მიიღეს მონაწილეობა.
საღამოს ორგანიზატორმა, ნატო ხომერიკმა ჩვენთან საუბრისას თქვა, რომ “ალილოსა” და მაესტრო მორისის კონცერტი შედგა, რადგან დამსწრე საზოგადოებამ კარგად მიიღეს ისინი.
_ მსგავსი შოუებით გურია განებივრებული არ არის და საღამოების მოწყობის კულტურა ნელ-ნელა მკვიდრდება ჩვენში. მშვენიერი საღამო იყო, _ გვითხრა ერთ-ერთმა სტუმარმა.
