ჩოხატაურის მუნიციპალიტეტში არსებული მძიმე სოციალური მდგომარეობის და მასიური უმუშევრობის ფონზე, “გურია ნიუსი” დაინტერესდა, თუ როგორ ეხმარება ადგილობრივი ხელისუფლება სოციალურად შეჭირვებულ მოსახლეობას _ ჩვენ ჩოხატაურის მუნიციპალიტეტის გამგეობიდან გამოვითხოვეთ საჯარო ინფორმაცია იმის შესახებ, თუ რამდენმა ადამიანმა მიიღო სოციალური დახმარება, რა სახის და რამდენი განცხადება დაკმაყოფილდა 2011 წელს.
გამგეობის საჯარო ინფორმაციის ხელმისაწვდომობის უზრუნველყოფის სამსახურმა ჩვენი მოთხოვნის საფუძველზე შემდეგი ინფორმაცია მოგვაწოდა: “ჩოხატაურის მუნიციპალიტეტის საკრებულოს 2011 წლის 11 იანვრის #13 დადგენილებით დამტკიცებული” ჩოხატაურის მუნიციპალიტეტის 2011 წლის ბიუჯეტიდან სოციალური დახმარების გაცემისა და მიღების წესის” შესაბამისად, დაკმაყოფილდა 283 განცხადება. კერძოდ, დაკმაყოფილდა:
ხანდაზმულთა (100 და მეტი წლის ასაკის) დახმარება _ 5 განცხადება; აფხაზეთიდან დევნილთა დახმარება _ 5 განცხადება; დედ-მამით ობოლი ბავშვების დახმარება _ 3 განცხადება; ახალშობილთა ოჯახების დახმარება, რომლებიც რეგისტრირებულნი არიან სოციალურად დაუცველი ოჯახების მონაცემთა ერთიან ბაზაში _ 35 განცხადება (რომელთა სარეიტინგო ქულა 70 000-ზე მეტია და არ აღემატება 100 000); 18-დან 60 წლამდე ასაკის პირების სასწრაფო-სამედიცინო სტაციონარულ მომსახურებაზე დახმარება, რომლებიც არ ფინანსდებიან სახელმწიფო პროგრამით და რომელთა სარეიტინგო ქულა არის 70 001-დან 120 000-მდე; მეორე მსოფლიო ომის ვეტერანებისა და ონკოლოგიური დაავადებით დაავადებულთა დახმარება _ 60 განცხადება; 3-დან 18 წლამდე ასაკის ბავშვების სასწრაფო სამედიცინო სტაციონარულ მომსახურებასა და მედიკამენტების შეძენაზე დახმარება იმ ოჯახებისადმი, რომელთა სარეიტინგო ქულა იყო 70 001-დან 120 000-მდე _ 3 განცხადება; მეორე მსოფლიო ომის ვეტერანების სარიტუალო მომსახურებაზე დახმარება _ 8 მოქალაქე; უპატრონო მიცვალებულთა სარიტუალო მომსახურებაზე დახმარება _ 17 განცხადება; სტიქიური მოვლენების შედეგად უსახლკაროდ დარჩენილი ოჯახების დახმარება _ 16 განცხადება; ეკონომიკურად შეჭირვებული ოჯახებისადმი ზამთრის სეზონისთვის სათბობის შეძენაზე დახმარება _ 131 განცხადება. სხვადასხვა ობიექტური მიზეზების გამო, უარი ეთქვა 298 განმცხადებელს განცხადების დაკმაყოფილებაზე.
რაც შეეხება იმ პირების განცხადებებს, რომლებმაც მიმართეს მუნიციპალიტეტის გამგეობას სოციალური დახმარების თაობაზე, შეიცავს განმცხადებლის პირად ინფორმაციას და განმცხადებლის თანხმობის გარეშე, ინფორმაცია არ გაიცემა”.
