სამოქალაქო განათლების ფორუმის კოორდინატორის ლადო აფხაზავას ინიციატივით, ლანჩხუთში ცენტრალური ბიბლიოთეკის სკვერში მეორე დღეა მიმდინარეობს საქველმოქმედო აქცია 13 ივნისს დედაქალაქში მომხდარი სტიქიის შედეგად დაზარალებულთა დასახმარებლად "ლანჩხუთს სტკივა თბილისი!"
აქციის მიზანია დაზარალებულებს გაუწიონ როგორც ფულადი დახმარება, ასევე დაეხმარონ პირველადი მოხმარების ნივთებით, არამალეფუჭებადი საკვები პროდუქტებით, მედიკამენტებით, ჰიგიენური საშუალებებით, ტანსაცმლით, სხვადასხვა საოჯახო ნივთებით, მოკლედ ვისაც რა შესაძლებლობა აქვს.
"დღეს აქციის მეორე დღეა და მეტ აქტიურობას ველით. აქვე საყურადღებოა, რომ განსაკუთრებული გულისხმიერებით პენსიონერები გამოირჩევიან, რომლებიც უწყვეტად მოდიან აქ და საკუთარი მწირი პენსიიდან ცდილობენ დაზარალებულებსაც გაუწიონ დახმარება, როგორც ჩანს, ამ მოხუცებმა განსაკუთრებულად მიიტანეს გულთან სხვისი ტკივილი. ასევე სხვადასხვა ორგანიზაციების წარმომადგენლებმაც მიიღეს აქციაში მონაწილეობა, მაგალითად, სპორტის მუზეუმისა და ცენტრალური ბიბლიოთეკის თანამშრომლებმა და ვისაც რა შესაძლებლობა ჰქონდა იმის მიხედვით დაგვეხმარნენ. აქტიურობენ ცალკეული ოჯახები და მოაქვთ ტანსაცმელი, საკვები პროდუქტები, ასევე სკოლებიც აქტიურადაა ჩაბმული აქციაში, დაგვეხმარა წითელი ჯვარიც", _ ამბობს ლადო აფხაზავა.
